27 ¹ Ia ni sa lewai oti me keitou soko ki Itali, era sa soli Paula, ka so voki na tamata sa vesu, vua e dua na turaga ni mata sotia nei akusito, na yacana ko Juliase. ² Ia ni kimamu sa vodokia edua na waqa ni Atiramitio, kimami sa vakarewatakia, ka nakitia me kimamu sokoravitia na baravi kei Esia; a sa dua na kai Masitonia mai Cesalonaika, o Arisitako, sa qai vata kei kimamu. ³ Ia ena savulaci kimamu sauru ki Saitoni, A sa lomavinaka vei Paula ko Juliase, a sa sereki koya me qai vei ira na wekana me vakacegui kinia. ⁴ Kimamu sa qai soko tani yani eke, ka sokoraviti Kipiro, ni sa ca na cagi. ⁵ Ia kimamu sa sokota na wasawasa kei Sisilia kei Pamifilia, ka yaco sara ki Maira mai Lisia. ⁶ A sa kunea kinia na turaga ni valu e dua na waqa ni Alekisadria, sa soko ki Itali; a sa vakavodoki kimamu kinia. ⁷ Ia ni kimamu sa soko malua lia ka bogi vuqa, ka yaco vakadredre me donui Nito, ni sa tarovi kimamu na cagi, kimamu sa sokoraviti Kiriti, ka donui Salimoni: ⁸ a sa vo e lailai me dredre ni sivia, kimamu sa yacovia e dua na yasana na yacana na Toba Vinaka; a sa voleka kinia e dua na koro ko Lasea. ⁹ Ia ni sa qai bogi vuqa, a sa mani dredre na soko, ka ni sa qai oti na gauna ni lolo, sa qai vakasalataki ira ko Paula, ¹⁰ ka tukunia vei ira, "O kemunu na turaga, au sa kila ena levu na ka e ca kei na ka e da na dainia ena soko koya, ena yali ni ca walelia nai usana kei na waqa, oi keda vokilia." ¹¹ Ia na turaga ni valu sa vakabauti rau na turaga ni waqa kei na kenai taukei, ka yali na veika sa tukunia ko Paula. ¹² Ia ni sa yali ni vinaka na toba koya me kele kinia ena vula i liliwa, era sa lewe vuqa vei ira sa lewa me ra soko tani yani, ni ra nanumia de sa rawa ki Finiasi me ra kele kinia ena vula i liliwa; ko ya na toba ki Kiriti, a sa donua na ceva era kei na tokalau vualiku. ¹³ Ni sa qai liwa vakamalua na ceva, era sa vakasama ni ra sa rawatia na ka era a nakitia, era sa cavui kelekele, ka sokoraviti Kiriti. ¹⁴ A sa yali mada ni dede, sa qai laba na cava levu, a yacana ko Urokilitoni. ¹⁵ Ia ni sa lebuka na laca ni waqa, ka yali kinia ni tau rawa ki na mata ni cagi, kimamu sa laiva lia me savu yani. ¹⁶ A sa savu kinia ka volekatia e dua na yanuyanu na yacana ko Kilota, a sa vo e lailai sara me kimamu yali ni rawatia na velovelo: ¹⁷ Ia ni sa vakarewatakia cake mai koya, era sa cakava nai vakatukawalu, a ra sa vakatukawalutakia kinia na waqa, sa serekia na gacagaca, ka savu yani. ¹⁸ Ia ni kimamu sa suaigelegele vakalevu sara ena cava, ena savulaci era sa dainia nai usana: ¹⁹ ia ena bogi tolu kimamu sa dainia e na ligaimamu na gacagaca ni waqa. ²⁰ Ni sa qai bogi vuqa, ka yali ni rairai na matanisiga se na veikalokalo, a sa laba na cava levu, sa qai takali sara vei kimamu na nuitakia na bula. ²¹ Ia ni sa dede na nodra yali ni kana, sa tucake ko Paula ena kedra maliwa ka tukunia, "Oi kemunu na turaga sa dodonu mo ni vakarogoci au e liu, ka kakua ni cavui kelekele mai Kiriti, sa yaco kinia na ca koya kei na biu. ²² Ia koya, au sa masuti konu mo ni kua ni yalo lailai: ni na yali e dua vei kemunu ena yali na nona bula ena ca lia na waqa: ²³ ni sa tu voleka vei au ena bogi koya e dua na agilose ni Kalou, o koya ka'u sa nona, o koya vokilia ka'u sa qaravia, ²⁴ a sa tukunia 'Kakua ni rere, Paula; o na yadi lia kivei Sisa: ka raicia, sa soli ira kecelia vei iko na Kalou o iratou dou sa soko vata." ²⁵ O koya koya, koi konu na turaga, mo ni vakacegu ni'u sa vakadinata na Kalou, ni na yaco lia me vaka sa tukuni mai vei au. ²⁶ Ia, sa da na dai lia ki na dua na yanuyanu. ²⁷ Ia ni sa yaco mai nai ka tinikava ni bogi, ni keitou sa veisavuyakia tiko ena wasawasa ko Atiria, ni sa lomaloma ni bogi, era sa nanumia na lewe ni waqa era sa volekatia e dua na vanua: ²⁸ a ra sa vakarautakia na wai, a ra sa kila sa katu ruasagavulu: ia ni ra sa savu yani vakalailai, ka vakarautakia voki na wai, era sa kila sa katu tinikalima. ²⁹ Ia ni ra sa rere de kimamu kasa kina veivatu, era sa dainia nai kelekele e va mai na mua ni turaga, a ra sa gadrevia tu me siga na vanua. ³⁰ Ia ni ra sa vakarau me dro tani ena waqa ko ira na kai mua, ni ra sa tukuca na velovelo ki wai, me vaka era sa ia me dainia nai kelekele mai na mua ki liu ³¹ a sa tukunia ko Paula vua na turaga ni valu, vei ira voki lia na sotia, "kevaka era sa yali ni tiko lia ena waqa ko ira koya, kemunu na yali ni bula rawa." ³² Era sa qai seledrutia nai noka ni velovelo o ira na sotia, a ra sa dainia me ciri yani. ³³ Ia ni sa voleka mai na siga, sa cikevi ira kecelia ko Paula me ra kana, ka tukunia, "Koya na kenai katinikava ni bogi kemunu sa wawa lia ka lolo, ka yali ni kania e dua na ka: ³⁴ o koya koya ka'u sa masuti kemunu kinia mo nu kana mada: e na yaga mo ni bula kinia: ni sa yali e dua veikemunu ena lutu mai e dua na drau na uluna." ³⁵ Ia ni sa vosa oti vakakoya, sa tauria na madrai, a sa vakavinavinakatakia vua na Kalou ena matadra kecelia; ia ni sa dovia, sa vakatekivu me kania. ³⁶ A ra sa vakacegui kecelia ka ra kana voki lia ko ira. ³⁷ Ia koi kimamu kecelia sa tiko e waqa, kimamu sa le rua na drau ka vitusagavulu ka ono. ³⁸ Ia ni ra sa kana oti ka mamau, era sa vakamamadatakia na waqa, ka dainia na sila ki wai. ³⁹ Ni sa qai siga mai, era sa yali ni kila na vanua: a r sa kunea e dua na toba sa vakamatasawa, a ra sa bosea me ra vakasa kinia na waqa, kevaka e rawa. ⁴⁰ Ia ni ra sa drutia laivi nai kelekele ni waqa, era sa dainia tu mai wai, ka serekia nai noka ni uli, ka vakarewatakia na laca levu ki na cagi, ka soko vaka ki vanua. ⁴¹ A ra sa ciri kina yasana e sota vata kinia e rua na drodro, a ra sa vakasatakia na waqa, a sa coba sara na mua ki liu, ka yali ni yavala rawa, a sa kasere na mua turaga ena kaukau ni biau. ⁴² A ra sa bose ko ir na sotia me ra akamatei ira na tamata era sa vesu tu, de ra qalo dro eso, ka bula. ⁴³ Ia sa vinakatia na turaga ni valu me vakabulai Paula, a sa taro ira kinia mai na ka era sa nanumia, a sa tukunia me rika e liu ko ira sa qalo rawa; me ra liu ki vanua; ⁴⁴ ia ko ira na kena vo, e so ena rara eso, ka so ena ka tani ni waqa. A sa vaka koya, era sa cabe bula kecelia ki vanua.