26 ¹ Sa qai tukunia vei Paula ko Akaripa, "sa qai tara mo vakatusai iko mai. " Sa qai dodokia na ligana ko Paula ka tukuni koya: ² "Au sa nanumia ka'u sa kalougata, konu Akaripa, na tui, ni'u na tukuni au edaidai e matamunu, ena vuku ni ka kecelia era sa beitaki au kinia na Jiu: ³ io, ni konu sa kila kecelia na nodrai valavala na Jiu kei na veika era sa dauveiletitakia; o koya koya ka'u sa masuti konu kinia mo ni vosotia mada lia mo ni rogoci au. ⁴ A noqui valavala ni'u a gone ka yacovia na siga ko ya, ni'u a tiko kei ira na kai noqu mai Jeruisalemi, era sa kila kecelia na Jiu. ⁵ Ko ira era sa kilai au e liu, kevaka era sa via tukunia mai, ni'u sai valavala vaka-Farisi me vataki ira era sa daumuria vakamatailalai sara na noda lotu. ⁶ Au sa qai tu vokilia me'u lewai ena vuku ni ka ka'u sa vakanuinuitakia na vosa ni yalayala ka solia na Kalou kivei ira na neimamu qase: ⁷ ia sai koya na ka koya, era sa vakasama me na rawatia ko ira na neimamu yavusa e tinikarua, era dausoro vagumatua ena siga kei na bogi. Ia ena vuku ni nuinui koya i Akaripa na tui, era sa beitaki au kinia ko ira na Jiu. ⁸ E vakaevei, dou sa nanumia beka ni sa ka e dau veivakatitiqataki, me vakaturi ira cake voki na mate ni Kalou? ⁹ Oi au vokilia ka'u a nanumia e lomaqu ni sa dodonu me'u veimecaki ena ka e vuqa kei na yacai Jisu na kai Nasareci. ¹⁰ Ia na ka vokilia koya ka'u a kitakia mai Jeruisalemi: a ra sa lewe vuqa era sa lotu ka'u a sogolati ira ena veivale ni veivesu, ni ra sa lesi au kinia na bete levu, ia ni ra sa vakamatei ka'u sa tukunia me vaka kinia. ¹¹ Ia ka'u a cudruvi ira vakavuqa ena veivale ni lotu kecelia, ka vakasaurarataki ira me ra dainia na lotu, ia niu sa cudru vakalevu sara vei ira; au a vakacacana vokilia ki na vei koro tani. ¹² Ia, ka'u a qai tiko kinia ki Tamasiko ni ra lesi au ka talai au na bete levu, ¹³ ni sa siga levu toka lia, na tui, au a raicia ena sala e dua na rarama mai lomalagi, sa uasivia na kena remoremo na mata-ni-siga, a sa cila vakavolivoliti au kei ira vokilia era qai vata kei au. ¹⁴ Ia ni keitou sa bale kecelia ki na qele, au sa rogocia e dua na domo sa vosa vei au ena vosa va Iperiu, ka tukunia, I Saula, I Saula, o sa vakacacani au ena vuku ni cava? e ca vei iko mo caqetia na mata ni moto. ¹⁵ Au sa qai tukunia, O cei koi konu na Turaga? A sa tukunia na Turaga, Oi au ko Jisu o koya ko sa vakacacana: ¹⁶ ia mo tu cake lia, ka tu e yavamu: ni'u sa rairai vei iko ena vuku ni ka koya me'u lesi iko mei talatala kei na dautukutuku vokilia ena veika ko sa raici au kinia vei iko: ¹⁷ ni'u na vakabulai iko mai vei ira na tamata na Isireli, kei ira na veimatanitu tani, o ira ka'u sa qai talai iko kinia, ¹⁸ mo laki basukia na matadra, me ra saumaki mai na butobuto ki na rarama, mai na kaukauwa vokilia nei Setani ki vua na Kalou me ra kakua ni cudruvi enai valavala ca, me rai taukei vata vokilia e muri kei ira era yalosavasava, ni ra sa vakabauti au. ¹⁹ Ia ni sa oti koya, i Akaripa na tui au sa yali ni talaidredre ki na rai votu vakalomalagi; ²⁰ ia ka'u sa tukunia mada e liu vei ira mai Tamasiko kei Jeruisalemi kei na yasayasa kece vaka Jutia vei ira vokilia na veimatanitu tani, me ra veivutuni ka saumaki mai kivua na Kalou, ka kitakia nai valavala e kilikili kei na veivutuni. ²¹ O koya koya era sa tauri au kinia na Jiu, ena vale ni soro ka segata me ra vakamatei au. ²² Ia ni sa vukei au na Kalou, au sa bula kinia ka yacovia na siga koya, ia kau sa tukunia tiko vei ira era lalai kei ira vokilia era lelevu ka sa yali na ka tani ka'u sa tukunia, koya lia e a tukunia na parofita kei Mosese ena yaco mai: ²³ ni na mate na Karisito, ni na kedrai matai era na tucake voki mai na mate ka na vakatakila na rarama vei ira na tamata na Isireli, vei ira vokilia na veimatanitu tani." ^{24 25 26} Ia ni sa tukuni koya tiko vakakoya ko koya, sa vosa ena domolevu ko Fesito, "I Paula, o sa lialia sa vakalialiai iko na vuku levu" A sa tukunia ko koya, "Fesito vakaturaga sara, au sa yali ni lialia: au sa cavutia lia na vosa sa dina ka vuku; ni sa kila na veika koya na tui, ia ka'u sa vosa doudou kinia ni'u sa kila e yali ni vuni vei koya e dua na ka koya, ni sa yali ni caka na ka e na dua na yasana vuni. ²⁷ I Akaripa na tui, o ni sa vakadinati ira na parofita, se yali? Au sa kila konu sa vakadinata lia." ²⁸ Sa qai tukunia vei Paula ko Akaripa, "sa vo e lailai mo rawai au me'u lotu va-Karisito" ²⁹ Sa qai tukunia ko Paula, au sa masu vua na Kalou, e yali ena vukumunu duadualia, ena vukudra kece vokilia era sa rogoci au e daidai, se me vo e lailai, se me kakua lia ni vo, mo dou vakataki au; ia me kakua lia ena sinucodo koya. ³⁰ Sa qai tucake na tui, kei na kovana, kei Penaise, kei ira era sa tiko vata kei iratou: ³¹ ia ni ra sa vakatikitiki tani, era sa veivosaki vakai ira, ka tukunia, A tamata koya sa yali ni kitakia e dua na ka sa dodonu me mate kinia se me vesu. ³² Sa qai tukunia vei Fesito ko Akaripa, "Na tamata koya kevaka sa yali ni cavuti Sisa me lewai koya, e dodonu lia me sereki."