25 ¹ Ni sa qai mai ki na vanua ko Fesito, ka oti e tolu na bogi, sa qai cavu tu e Sisaria me qai cake ki Jeruisalemi. ² Sa qai beitaki Paula vua ko ira na bete levu kei ira na nodra turaga na Jiu, a ra sa vakamasutia, ³ ka kerekere vua me lomani ira ena vukuna, me talakitaki , me qai mai ki Jeruisalemi ko koya, a ra sa lawavaka me na vakamatea ena gaunisala. ⁴ Ia sa tukunia ko Fesito, ni sa vakatawai tiko mai Sisaria ko Paula, a sa vakarau me qai yani kinia ko koya. ⁵ A sa tukunia, "Oi kodou na turaga, me da qai sobu vata, ia ke dua na ka sa tu vua na tamata ko ya, mo dou qai beitaki koya kinia." ⁶ A sa tiko vata lia kei ira ko koya ka bogi walu se bogi tini sa qai qai sobu ki Sisaria, ena savulaci cake sa tiko ko koya enai tikotiko ni veilewai, a sa tukunia me yadi mai ko Paula. ⁷ Ia ni sa yaco mai ko koya, era sa tu vakavolivolita ko ira na Jiu era a qai sobu mai Jeruisalemi, a ra sa beitaki Paula ena ka ca sara e vuqa, ia era sa yali ni vakadinadinatakia rawa. ⁸ Ia sa tukuni koya ko Paula, Au sa yali ni kitakia e dua na ka ca, ki na nodra i vunau na Jiu, se ki na vale ni soro se kivei Sisa. ⁹ Ia ni sa vinakatia ko Fesito me vakayalovinakataki ira na Jiu, sa vosa vei Paula, ka tukunia, "O ni sa vinakatia mo qai cake ki Jeruisalemi, mo lewai kinia e mataqu ena veika koya se yali?" ¹⁰ Sa qai tukunia ko Paula, "Au sa tu ena mata ni tikotiko ni veilewai nei Sisa, a tikina e dodonu me'u lewai kinia, au a yali ni kitakia e dua na ka ca vei ira na Jiu, koya ko sa kila vinaka sara." ¹¹ Kevaka ka'u sa tamata i valavala ca, se'u kitakia e dua na ka e dodonu me'u mate kinia, au sa yali ni bese ni mate: ia kevaka e yali na veika koya era sa beitaki au kinia, sa yali e dua e rawatia me soli au vei ira. Au sa cavuti Sisa me lewai au. ¹² Ia ko fesito, ni sa veivosaki oti kei ira na mataveilewai, sa tukunia, "O sa qai cavuti Sisa, ia ko na yadi vei Sisa. ¹³ Sa bogi vica , erau sa qai qai mai ko Akaripa na tui kei Perinaise ki Sisaria, me rau veikidavaki kei Fesito. ¹⁴ Ia ni rau sa bogi vuqa kinia, sa tukuni Paula ko Fesito vei koya na tui, ka tukunia, "Sa dua na tamata sa vesu tu, ko koya ka vakalaiva ko Filikesa: ¹⁵ ia ni'u a tiko mai Jeruisalemi, era sa beitaki koya ko ira na bete levu kei ira na nodra qase na Jiu, a ra sa tukunia me'u lewai koya me cudruvi. ¹⁶ Au sa qai tukunia vei ira, e yali ni nodrai valavala na kai Roma me solia wale lia e dua na tamata me vakamatei, ka malua me veirai mada kei ira sa beitaka, me sa rawa vokilia na nona tukuni koya e na vuku ni ka ca sa beitaki vua. ¹⁷ Ia ni rau sa yaco mai ki ke, au sa yali ni vaberaberatakia, ia ena savulaci cake ka'u sa tiko enai tikotiko ni veilewai, ka tukunia me yadi mai na tamata koya. ¹⁸ Ia ni ra sa tucake ko ira era sa beitaki, era sa yali ni beitaki koya ena ka ca, me vaka na ka ka'u nanumia: ¹⁹ ia ka so ga na ka sa veiletitaki kaya ena nodra lotu, kei na dua na tamata ko Jisu, ko koya sa mate, ia ka tukunia ko Paula sa bula tiko ko koya. ²⁰ Ia ni ka'u sa yali ni kila vinaka me'u lewa na veika koya, au sa tarogia se via qai cake ki Jeruisalemi ko koya, me lewai kinia e na veika koya se yali? ²¹ Ia ni sa vaka ko Paula, me tiko mada me lewai koya ko Akusito, au sa qai tukunia me vatawai tiko ka malua me vatalai ko ya yani vei Sisa." ²² Sa qai tukunia vei Fesito ko Akaripa, "Oi au vokilia ka'u sa via rogocia na tamata koya," "E na savulaci ko na rogoci koya" ²³ Ena savulaci ni rau sa qai mai ko Akaripa, kei Perinaise, erau ukucavu mai, a rau curu ki na vale ni veitarogi, kei ira vata na turaga levu ni valu, kei ira na turaga ni koro, ia ni sa varotakia ko Fesito, sa yadi mai ko Paula. ²⁴ A sa tukunia ko Fesito, "konu Akaripa na tui, kei kodou kecelia na tamata sa tiko kei keitou eke, dou sa raicia na tamata koya, ena vuku i koya era sa cikevi au ko ira na Jiu e lewe levu, mai Jeruisalemi eke vokilia, ka ra sa tukunia e yali ni dodonu me bula ko koya. ²⁵ Ia ni ka'u sa kunea sa yali ni cakavia ko koya e dua na ka ca sa dodonu me mate kinia, a sa cavuti Akusito ko koya me lewai koya, au sa qai lewa me'u vatalai koya kinia. ²⁶ Ia ka yali na ka e macala me'u volai koya kinia vua na noqu turaga. O koya lia koya ka'u sa yadra mai kinia ki na matamudou, ia ka vakaidina veikemunu, Akaripa na tui, me tarogi mada me macala kinia na ka me'u vola. ²⁷ Ni sa rairai vei au me ka lialia me tala e dua sa vesu, ka yali vatakilatakia vokilia na ka ca sa beitaki vua.