24 ¹ Sa bogi lima sa qai qai sobu ko Ananaiasa na bete levu kei ira na qase, ka dua na tamata sa vuku ena vosa, ko Teritulu, era sa beitaki Paula vua na turaga. ² Ia ni sa kacivi mai ko koya, sa vakatekivu ko Teritulu me beitakIa, ka tukunia, "Keitou sa vakacegu vakalevu e na vukumunu, a sa yaco me vinaka na matanitu koya ena nomunu lewa vakavuku. ³ Keitou sa vakavinavinakatakia kinia ena veisiga kecelia kei na veiyasana kecelia, I Filikesa vakaturaga sara, ni keitou sa rekitakia. ⁴ Ia de balavu wale lia vei kemunu na noqu vosa, au sa masuti konu mo nu yalovinaka mo nu rogoci keitou mada vakalailai. ⁵ Ni keitou sa kunea na tamata la koya e dau veivakacalai, a sa dauvakatubu ca ko koya vei ira kece lia na Jiu e vuravura, a sa liu vei ira nai tokani na kai Nasareci: ⁶ ka sa ia me vakacacana vokilia na vale ni soro; ka keitou a tauria, ka via lewa me vaka na neitou vunau. ^{7 8 9} Ia ko Laisiasa na turaga levu ni valu sa qai vakaukauwa mai ka kalirakia mai na ligai keitou, a sa vosa vei ira era sa beitaki koya me ra qai mai vei kemunu: ia ni konu sa tarogi koya, ko ni sa kila rawa na ka kecelia keitou sa beitakia vua." A ra sa vakadinadina ko ira na Jiu, ka tukunia, sa dina na veika koya. ¹⁰ Ia ni sa deguvacu na turaga vei Paula me vosa, sa qai tukunia ko koya, "Ni'u sa kila sa vuqa na yabaki ko nu sa turaga ni lewa kinia ena vanua koya, au sa vinakatia vakalevu me'u tukuni au. ¹¹ O nu sa kila, sa qai oti walelia e tinikarua na bogi ni ka'u a qai cake kinia ki Jeruisalemi me'u lotu. ¹² A ra sa yali ni kunei au ni keiraou sa veileti kaya e dua na ena vale ni soro, se niu sa vakatubu ca vei ira na lewe vuqa, sa yali lia ena veivale ni lotu, se ena koro; ¹³ a ra sa yali voki lia ni vakatakilatakia rawa ni sa dina na veika era sa beitaki au kinia. ¹⁴ Ia na ka koya ka'u sa vakatusa vei konu, ai valavala era sa vakatoka mei vakavuvuli vakatani, au sa lotu vakakinia vua na nodra Kalou na noqu qase, ka vakadinata na ka kecelia sa volai ena vunau kei ira na parofita: ¹⁵ ia ka'u sa vakanuinui vua na Kalou, ni na tu cake voki ko ira na mate, koira na yalododonu, kei ira na yali ni yalododonu, o koya era sa nuitakia voki lia ko ira. ¹⁶ Ia na ka koya ka'u sa gumatua kinia, me kakua e dua na siga e cala kinia na lewa-ni-lomaqu vua na Kalou, se vei ira na tamata. ¹⁷ Ia ni sa oti e vuqa na yabaki, ka'u sa qai mai me'u yadia na ka-ni-loloma ki na noqu vanua, kei nai madrali eso. ¹⁸ Ia ka so na Jiu mai Esia era sa kunei au ni'u sa vakasavasavataki ena vale ni soro, ia keitou sa yali ni lewe vuqa, se keitou ue. ¹⁹ E dodonu vokilia me ra mai tu e matamunu eke, ka tukunia, kevaka era sa kila e dua na ka ca vei au. ²⁰ Se me ra tukunia ko ira koya, kevaka era sa kunea e dua na ka ca vei au, ni'u sa tu ena matadra na mataveilewai, ²¹ ena vuku lia ni vosa e dua baulia sa vakakoya, ni'u sa tu ena kedra maliwa, ka kaci, 'Ena vuku ni nodra tu cake voki mai na mate dou sa qai tarogi au kinia ena siga koya.'" ²² Ia ni sa rogocia na veika koya ko Filikesa a sa kila vinaka na Lotu, sa vakasukai ira, a sa tukunia, "Ni sa qai sobu mai ko Laisiasa na turaga levu ni valu, kau na qai lewa na ka dou sa veiletitakia." ²³ A sa tukunia ko koya vua e dua na turaga ni valu me vakatawai Paula, me dainia lia me qai voli, ka me kakua ni vakatatabuya e dua na wekana sa qaravi koya, se qai mai vua. ²⁴ Ia sa bogi vica, sa qai mai ko Filikesa kei na watina ko Tarusila, na yalewa ni Jutia, ka sa talakia me qai mai ko Paula, ka sa vakarogoci koya ni sa vosatakia na vakabauti Karisito Jisu. ²⁵ Ia ni sa vunautakia tiko ko koya nai valavala dodonu, nai valavala malua, kei na veilewai sa bera mai, sa sautaninini ko Filikesa, ka tukunia, "Qai tani mada e daidai; ia ni'u sa lalaga ena dua na gauna ka'u na kacivi iko mai." ^{26 27} Sa nuitakia vokilia ni na soli lavo vua ko Paula: o koya koya sa talakitaki vakavuqa kinia, me rau veivosaki kaya. Ia ni sa oti e rua na yabaki, sa qai mai ko Porisiu Fesito mei sosomi kei Filikesa: ka ni sa vinakatia ko Filikesa me vakayalovinakataki ira na Jiu vua, sa biuti Paula me vesu tu lia.