28 ¹ Ia ni kimamu sa cabe bula, kimamu sa qai kila sa yaca ni yanuyanu gona ko Melita. ² A ra sa lomani kimamu vakalevu ko ira nai taukei; ni ra sa vakawaqa nai binibini buka, a ra sa yadi kimamu yadua ki vale, e na vuku ni uca sa qai tau kei na liliwa. ³ Ia ni sa kumuna mai e dua nai vesu buka ko Paula, a sa laki tuva ki na buka sa waqa tu, sa dolo mai na katakata e dua na gata, ka viviga na ligana. ⁴ Ia ni ra sa raicia ko ira nai taukei, ni sa lili tiko lia e ligana na gata, era sa tukunia vakai ira, "E dina sa tamata daulaba o koya koya, ka sa cabe bula mai na waitui, ia na Lewa Dodonu e yali lia ni vakatara me bula." ⁵ A sa qai kuretakia na gata ki na buka waqa ko koya, ka yali ni dua na leqa e yacovia nona bula. ⁶ Ia era sa nanumia ena vuce mai na yagona, se bale sobu vakasauri ka ciba: ia ni ra sa warakia vakadede, ka yali ni kunea e dua na ka ca sa yacovia vua, sa qai veisautakia na lomadra ka ra tukunia sa dua na kalou ko koya. ⁷ Ia sa tiko e na yasana gona eso na tiki ni vanua lia sa nona na turaga ni yanuyanu, o Pupiliu na yacana; a sa vakacegui keitou ko koya, ka vakani keitou vinaka ka siga tolu. ⁸ Ia sa tauvi-mate na tamai Pupiliu, a sa katakata ka cokadra; a sa curu ki na vanua e davo koto kinia ko Paula, ka masu ka sa tabakia e na ligana, ka vakabula. ⁹ Ia ni sa yaco na ka koya, sa qai vokilia mai ko ira era sa tauvi-mate e na yanuyanu, a ra sa vakabulai: ¹⁰ a sa levu na ka era vakarokorokotaki keitou kinia: ia ni keitou sa soko tani, era sa yadia mai ki waqa na veika e yaga vei keitou. ¹¹ Sa oti e tolu na vula, kimamu sa soko ena dua na waqa ni Alekisadria, ka kele e na yanuyanu gona e na vula i liliwa, a kena matakau na drua tagane. ¹² A keimami sa sobu ki Sarakuse, ka tiko kinia ka siga tolu. ¹³ Mai kea kimamu sa soko, ka yacovia na vanua ko Rijio; ia sa bogi dua, sa qai liwa na ceva, ka oti e siga rua, kimamu sa yacovia na vanua ko Putioli: ¹⁴ ia keitou sa kunea na veiwekani eso, a ra sa masuti keitou me keitou tiko lia ka bogi vitu. keitou sa qai qai ki Roma. ¹⁵ A ra sa rogocia maikinia na keitoui tukutuku ko ira na veiwekani, ka ra sa qai mai ki na Makete i Apio kei na Bure e Tolu, me ra mai tavaki keitou kinia: ia ni sa raici ira ko Paula, sa vakavinavinakatakia vua na Kalou, a sa vakayaloqaqataki o koya. ^{16 17 18} Ia ni kimamu sa yaco yani ki Roma, a sa vakadonui ko Paula me tiko duadua lia kei na dua na sotia sa vakatawai koya. Ia ni sa oti e tolu na siga, sa qai vakasoqoni ira vata na nodra turaga na Jiu ko koya: ia ni ra sa soqoni vata mai, sa tukunia ko koya vei ira, Oi kodou na veiwekani, au sa yali ni caka e dua na ka ca vei ira na kai noda, se ki na nodrai valavala na noda qase, ia ka'u a vesuki ga ka soli yani ki na ligadra na kai Roma mai Jerusalemi. Ia ko ira, ni ra sa lewai au, era sa vinakata me ra sereki au, ni sa yali na ka vei au me'u mate kinia. ¹⁹ Ia ni ra sa tukunia ko ira na Jiu me kakua, sa uqeti au na lomaqu me'u cavuti Sisa me lewai au; yali ni dua na ka me'u beitaki ira kinia na kai noqu. ²⁰ O koya koya kau sa vakasoqoni ira vata kinia vei au ni'u sa vesu ena sinucodo koya ena vuku ni nodrai nuinui na Isireli." ²¹ A ra sa tukunia vua, "sa yali e dua mai Jutia sa volai iko vei keitou, e yali voki lia e dua vei ira na veiwekani sa qai mai sa vakatakila se tukunia e dua na ka ca ena vukumu; ²² ia keitou sa via rogoci iko se cava ko sa nanumia: ni keitou sa kila sa vosavakacacatakia na lotu tani koya ena veivanua kecelia. ²³ A ra sa lokucia vua e dua na siga, a ra lewe vuqa sa qai mai ki na nona vale, a sa serekia vei ira ko koya ka tukunia na matanitu ni Kalou, ka vakadinadinataki Jisu vei ira mai na vunau i Mosese, kei ira na parofita, sa vakatekivu ena savulaci, ka yacovia na raiyavi. ²⁴ Ia sa vakadinatia ko ira eso na veika sa vosatakia, ka so sa yali ni vakadinatia. ²⁵ Ia ni ra sa yali ni lomavata vaka i ira, era sa qai tani, ni sa vosatakia oti ko Paula e dua na vosa. Sa vosa dina na Yalo Tabu ni sa tukunia ko Aisea na Parofita vei ira na nomudou qase, ²⁶ ka tukunia, Dou na dau rogocia tikolia, ka lecavia tu. Ia dou na dau raicia tiko lia ka yali ni kunea: ²⁷ Ni sa uro mai na lomadra na tamata koya, A sa didivara na daligadra, A sa bobo na matadra, De dua na siga ena rai na matadra, ka rogo na daligadra, ka kila na lomadra, A ra saumaki mai, Ia kau na vakabulai ira. ²⁸ O koya koya mo dou qai kila, ni sa yadi mai na bula mai vua na Kalou vei ira na veimatanitu tani; ia era na vakarogocia. ²⁹ Ia ni sa vosatakia oti ko koya na veika koya, era sa qai tani ko ira na Jiu, a ra sa veileti vakalevu vakai ira. ³⁰ A sa tiko ko Paula ka yabaki rua taucoko ena vale sa volia tiko ko koya, ka sa vakacegui ira kecelia era sa qai vua: ³¹ ka sa vunautakia na matanitu ni Kalou, ka sa vakatavuvulitakia vakadoudou sara na ka kei Jisu Karisito na Turaga, ka sa yali na tamata sa tarovia.