9 ¹ E na vuku ni cakacaka loloma vei ira era sa lotu, sa yali ni yaga meu volavola kinia vei kodou: ² niu sa kila na nomudou gumatua, kau a vacaucautaki kodou kinia vei ira na kai Masitonia, io, ni sa varau oti tu ko Akaia ka yabaki dua; a sa vakatakatataki ira na lewe vuqa na nomudou lomakatakata. ³ Ia kau sa talai iratou yani na viwekani, de vawaletaki na neitou vacaucautaki kodou e na vuku ni ka koya: io, me vaka lia na ka kau a kaya, mo dou sa varau tu: ⁴ de qai vata kei au eso vei ira na kai Masitonia, ka raici kodou ni dou sa yali ni varau, ia keitou (me kakua ni cavuti kodou,) keitou na madua e na vuku ni vivacaucautaki doudou koya. ⁵ O koya koya kau sa vaka ni sa doudou meu masuti iratou na viwekani, me ratou liu yani vei kodou, me ratou varautakia mada e liu na nomudou i loloma sa vosataki eliu, me varau tu mada ko ya, me vaka sa ka ni loloma, ka me kakua ni vaka na ka ni domo-ni-koco. ⁶ Ia koya, O koya sa kaburakia valailai, ena tamusukia vokilia valailai; ia ko koya sa kaburakia valevu, ena tamusukia voki lia valevu. ⁷ Me ra dui solia me vaka na ka sa vinakatia ko koya yadua e na yalona; me kakua e na voraki, se ni sa vasaurarataki: ia ko koya sa solia e na marau sa vinakatia na Kalou. ⁸ A sa rawarawa vua na Kalou me valevutakia vi kodou na ka-ni-loloma kece lia: me tu vi kodou e na visiga nai yau kece lia e yaga e na ka kece lia, ka mo dou uasivi cake kinia e na cakacaka vinaka kece lia: ⁹ me vaka na ka sa volai, "Sa dui daidai ko koya; sa dau soli ka vi ira na dravudravua: Sa tu dei ka yali ni mudu na nonai valavala dodonu." ¹⁰ Ia ko koya sa dausolia na sila vua na dauvikaburaki kei na madrai me kakana, ena solia mada na sila vei ko dou me levu, ka valevutakia na vua ni nomudou i valavala dodonu; ¹¹ mo dou vavutuniyautaki e na ka kece lia, mo dou ia kinia nai loloma kecelia, sa vayacori kinia vei keitou na vavinavinaka vua na Kalou. ¹² Ni sa ia na cakacaka koya sa yali ni varauti loa lia na nodra dravudravua era sa lotu, ia sa tubu cake valevu voki lia kinia na vavinavinaka valevu vua na Kalou; ¹³ ni dou sa vatovolei e na cakacaka koya, era sa varokorokotakia na Kalou ni dou sa tukunia kinia na nomudou talairawarawa ki nai tukutuku-vinaka kei Karisito, e na vuku voki lia ni cakacaka loloma levu koya kivei ira, vei ira voki lia na tamata kece lia; ¹⁴ ia ko ira voki lia era sa masulaki kodou, ka daulomani kodou e na vuku ni loloma levu ni Kalou sa tu vei kodou. ¹⁵ Me ia na vavinavinaka vua na Kalou e na vuku ni nonai solisoli sa yali ni tukuni rawa.