10 ¹ Ia koi au ko Paula, kau sa masuti ikodou e na yalomalumalumu kei na yalomalua i Karisito, oi au sa malumalumu niu sa tiko vei ikodou, ia kau sa doudou vei ikodou niu sa tiko tani; ² io, kau sa vamasuti ikodou meu kakua ni doudou niu sa tiko vata e na kaukauwa, kau sa nanumia meu doudou kinia vei ikodou eso, o ira sa vasami keitou ni keitou sai valavala me vaka na ka vayago. ³ Sa dina lia sa vayago na neitou bula, ia keitou sa yali ni vala me vaka na ka vayago: ⁴ (ni sa yali ni ka vayago na neitou i yaragi, ia sa kaukauwa lia e na vuku ni Kalou me talaraki kinia na bai ni valu kaukauwa:) ⁵ sa talarakia sobu kinia na veinanuyaki, kei na ka cecere kecelia sa valevulevui me voratia na vuku ni Kalou, ka sa vamalumalumutakia na nanuma kece lia me talairawarawa vei Karisito; ⁶ ia keitou sa varau tu me saumi kece lia na talaidredre, ni na vayacori dina na nomudou talairawarawa. ⁷ Dou sa lewa beka me vaka na ka sa rairai? Kevaka e dua sa vadinatia ni sa nei Karisito ko koya, me nanumia vokilia koya ko koya me vaka sa nei Karisito ko koya, keitou sa nei Karisito vaka voki lia kinia. ⁸ Ia kevaka kau sa dokai au vakalevu cake e na vuku ni lewa (sa solia mai vei keitou na Turaga, mo dou vatataki cake kinia, ia ka yali lia mo dou varusai kinia,) au na yali ni vamaduataki. ⁹ Meu kakua ni vaka ni kau sa via varerei ikodou e na noqu i vola; ¹⁰ ni ra sa kaya, Sa bibi ka kaukauwa na nonai vola; ia sa malumalumu lia ni sa tiko ovei keda, ka sa ka wale na nona vosa; ¹¹ me qai nanumia na ka koya, ko koya sa vakinia, ni rau na tautauvata lia, na neitou vosa e nai vola ni keitou sa tiko tani, kei na neitou i valavala ni da sa tiko vata lia. ¹² Ni keitou sa yali ni doudou me wiliki keitou vata kei ira eso, se vatautauvatataki keitou kei ira era sa dautukuni ira vakai ira; ia ko ira ni ra sa varauti ira vakai ira, ka vatautauvatataki ira vakai ira, era sa yali ni vuku. ¹³ Ia koi keitou, keitou sa yali ni valevulevui keitou e na veika sa uasivitia nai varau, me vaka lia nai varau ni yalayala sa vota vei keitou na Kalou, ai varau me keitou yaco dina vei ikodou. ¹⁴ Ni keitou sa yali ni uasivitia na neitou i yalayala, me vaka keitou sa yali ni yacovi ikodou: ni keitou sa yacovi ikodou voki lia e nai tukutuku-vinaka kei Karisito: ¹⁵ keitou sa yali ni dokai keitou e na veika sa uasivitia nai varau, e na vuku ni nodra cakacaka na tamata tani; ia keitou sa nuinui lia, ni sa valevutaki tiko na nomudou vabautia, keitou na valevulevui kinia vei ikodou me vaka na neitou i yalayala me keitou uasivi, ¹⁶ me keitou vunautakia nai tukutuku-vinaka e na yasana sa uasiviti ikodou, me keitou kakua ni valevulevui keitou e na vuku ni yalayala ni tamata tani, e na veika sa varau tu vei keitou. ¹⁷ Ia ko koya sa vosa doudou, me vosa doudou e na vuku ni Turaga. ¹⁸ Ni sa yali ni vabau ko koya sa tukuni koya, sa vabau lia ko koya sa tukunia na Turaga.