11 ¹ Au sa vaka mo dou vosoti au mada lia niu lialia valailai; io, dou vosoti au mada lia. ² Niu sa lomani ikodou sara me vaka na loloma ni Kalou: niu a musuki ikodou vua e dua me watimudou, meu varaitaki ikodou vei Karisito e dua na goneyalewa savasava. ³ Ia kau sa rere, de dua na ka ena vacalai kinia na lomamudou mai na kena dina kei na kena savasava vei Karisito, me vaka ka vacalai Ivi eliu na gata e na nonai lawaki ca. ⁴ Ia sa dodonu lia mo dou vosoti koya sa qai qai mai, kevaka sa vunautakia e dua tani na Jisu, o koya keitou sa yali ni vunautakia eliu, se sa yaco vei ikodou e dua tani na Yalo, o koya sa yali ni yaco vei ikodou eliu, se dua tani nai tukutuku-vinaka, dou a yali ni vabautia eliu. ⁵ Niu sa vasama niu sa yali sara ni uasivi sobu vei iratou nai apositolo eratou sa uasivi cake. ⁶ Ia kevaka kau sa yali ni matai ni vosa, sa tu lia vei au na vuku; ia keitou a varaitaki sara vei ikodou e na ka kece lia. ⁷ Au sa qai cala beka niu sa vamalumalumutaki au mo dou valevutaki kinia, niu sa vunautakia vei ikodou nai tukutuku-vinaka ni Kalou ka yali ni voli kinia? ⁸ Au a vadravudravutaki ira nai soqosoqo lewe ni lotu tani eso, niu sa voli vei ira, meu ia kinia na cakacaka vei ikodou. ⁹ Ia niu a tiko vadravudravua vei ikodou, au a yali ni vaogai koya e dua: ni ra sa soli ka me rauti au e na noqu dravudravua ko ira na veiwekani era a qai mai Masitonia: ia e na ka kece lia au a varaici au meu kakua ni vaogai ikodou, kau na vakatiko lia kinia. ¹⁰ Me vaka kau sa dina e na mata i Karisito, e na yali sara ni tarovi na noqu vosa doudou e na ka koya e n yasayasa vaka-Akaia. ¹¹ E na vuku ni cava? niu sa yali li ni lomani ikodou? Sa kila na Kalou. ¹² Ia na ka kau a caka, au na caka tiko lia, meu mudukia tani kinia na vuna maivei ira era gadrevia na vuna: me ra laurai lia me ra vataki keitou e na ka era sa alevulevui ira kinia. ¹³ Ni ra sai apositolo vailasu ko ira sa va koya, era sa tamata daucakacaka vaveivakaisini, era sa vamataliataki ira me rai apositolo kei Karisito. ¹⁴ Ia ka sa yali ni ka e veivakurabuitaki koya; ni sa vamataliataki koya ko Setani me agilose ni rarama. ¹⁵ O koya koya sa yali kinia ni ka levu me vamataliataki voki lia ko ira na nonai talatala me ra vataki ira nai talatala ni valavala dodonu: ia na kedrai tinitini ena vaka na nodra cakacaka. ¹⁶ Au sa tukunia voki, Me kakua na tamata me nanumia kau sa lialia; ia kevaka sa nanumia vakinia e dua, mo dou vosotia lia na noqu lialia, meu valevulevui au voki lia valailai. ¹⁷ A ka kau sa kaya, au sa yali ni kaya me vaka na ka ni Turaga, me vaka lia na ka lialia, niu sa valevulevui au e na vosa doudou koya. ¹⁸ Ni ra sa lewe vuqa era valevulevui ira vayago lia, koi au voki lia kau na valevulevui au. ¹⁹ Ni dou sa reki mo dou vosoti ira era sa lialia, ni dou sa vuku. ²⁰ Ni dou sa vosotia lia, kevaka sa vabobulataki ikodou e dua, kevaka sa vadravudravuataki ikodou e dua, kevaka sa lawakitaki ikodou e dua, kevaka e dua sa valevulevui koya, kevaka sa sabicia na matamudou e dua. ²¹ Au sa vosa, me vaka kau sa beci, me vaka keitou a malumalumu. Ia kevaka e dua sa doudou e na dua na ka, (au sa vosa valialia,) au sa dooudou vaka voki lia kinia. ²² O ira beka era sa Iperiu? au sa vakakinia. Era sa luve i Isireli? au sa vakinia. Era sa kawa i Eparaama? au sa vakinia. ²³ Era sai talatala i Karisito? (au sa vosa me vaka na lialia,) au sa uasivi cake; au a daucakacaka valevu cake, au a yaviti valevu sara, au a tiko vavuqa cake, au a yaviti valevu sara, au a tiko vavuqa cake e na vale ni veivesu, au a voleka ni mate vavuqa. ²⁴ Sa yaviti au valima ko ira na Jiu a sa tau na kuita vayatolusagavulu ka ciwa. ²⁵ Au a warolaki vatolu, au a vaviriki vadua e na vatu, e na noqu visokoyaki au a mate vatolu, au a tiko e na wai titobu ka bogi dua ka siga dua; ²⁶ au a viqaiyaki voli vavuqa, au a ca e na viuciwai, au a ca mai vei ira na daubutako, au a ca mai vei ira na kai noqu, au a ca mai vei ira ira na veiwekani vailasu; ²⁷ au a dauoca ka daurarawa, au a dauyadra vavuqa, au a dauviakana ka dauviasomi, au a daulolo vavuqa, au a liliwa ka televua. ²⁸ Ia ka sa yali ni wili na veika sa vo oqori voki lia sa bitaki au e na veisiga, na daunanumi ira kece lia na visoqosoqo lewe ni lotu. ²⁹ O cei beka sa malumalumu kau sa yali ni malumalumu? ko cei sa vacalai, kau sa yali ni lomakatakata kinia? ³⁰ Kevaka e dodonu meu valevulevui au, au na valevulevui au e na vuku ni noqu malumalumu. ³¹ A Kalou na Tama ni noda Turaga ko Jisu, o koya sa varokorokotaki ka tawa mudu, sa kila niu sa yali ni vosa lasu. ³² Mai Tamasiko, na Kovana nei Arita na tui sa vatawa na koro ko Tamasiko, ni sa via tauri au; ³³ ia kau sa tukuci sobu e loma ni dua na sova, mai na katuba e colo e taudaku ni bai, ka bula kina mai na ligana.