¹ O koya koya ni kitou a yali ni vosotia rawa, kirau sa vinakatia me kirau dai taudua tu lia mai Aceni, ² ia kirau sa talai Timoci na wekai kirau, kei nai talatala ni Kalou, kei na nirau tokani enai tukutuku vinaka kei Karisito me vataudeitaki ikodou, ka varoti ikodou ena vuku ni nomu dou vabautia: ³ me kakua e dua me vayavalati ena vuku ni rarawa koya: ni dou sa kila sai koya eda sa lesi kinia. ⁴ Sa dina ni keitou a tiko kei iko dou, kitou a tukunia mada e liu vei iko dou ni da na vakararawataki: a sa yaco vakakinia, ia dou sa kila lia. ⁵ Ena vuku ni ka koya, niu a yali vosotia rawa, au a qai talatala yani meu kila na nomu dou vabautia, de sa veretaki iko dou beka ko koya na dauvere, a sa yaco kinia me ka loa lia na nitou cakacaka. ⁶ Ia ni sa qai mai vi ikodou ko Timoci vi kitou, a sa yadia mai nai rogorogo vinaka ni nomudou vabautia kei na loloma, kei na nomu daunanumi kitou vinaka tiko lia, kei na nomudou vinakatia valevu mo dou raici kitou, me vaka na nitou vinakatia voki lia me raici ikodou: ⁷ ko koya koya kitou sa vacegui kinia ena vukumudou, na viwekani, ena vuku ni nomudou vabautia, ena nitou rarawa kece lia kei na vuturi. ⁸ ni kitou sa qai bula, kevaka dou tudei tiko vua na Turaga. ⁹ Ia ka vaevei na levu ni vavinavinaka me kitou caka voki vua na Kalou ena vukumudou, ena vuku ni reki kece lia kitou sa reki kinia ena vukumudou ena mata ni noda Kalou: ¹⁰ ni kitou a masu valevu sara ena bogi kei na siga, me kitou raicia na matamudou, me kitou tinia vinaka voki lia na ka sa yali ena nomudou vabautia. ¹¹ Ia me tuberi kitou mada vi ikodou na Kalou na Tamada, kei na noda Turaga ko Jisu. ¹² Ia me valevutaki ikodou na Turaga mo dou uasivi cake e na loloma vakai ikodou, ka vi ira kece lia na tamata, me vaka na nitou vi ikodou: ¹³ me vataudeitakia kiia ko koya na yalomudou me kakua ni ca ni sa savasava ena mata ni Kalou ko Tamada, ni na qai mai na noda Turaga ko Jisu Karisito kei ira vata kaya na nona yalo savasava kece lia.