¹ Sa vo lia o ikodou na viwekani, me kitou vamasuti ikodou, ka vasalataki ikodou ena vuku ni Turaga ko Jisu, mo dou uasivi cake valevu sara, me vaka dou a vavulici mai vi kitou enai valavala sa kilikili sara lia ki ikodou mo dou caka tiko, mo dou vinaka vua na Kalou. ² Ni dou sa kila nai varo kitou a tukunia vi ikodou ena vuku ni Turaga ko JIsu ³ Ni sa loma ni Kalou koya, mo dou yalo savasava, mo dou kakua ni dauyalewa: ⁴ ia dou dui kila yadua mo dou maroroya na yagomudou me vasavasavatakia me dokai; ⁵ me kakua ni rawai koya na dodomo ca, me vakai ira na vimatanitu era sa yali ni kila na Kalou: ⁶ me kakua e dua me la'ki lawaki ca se vacacania na kai nona ena ka koya, ni sa cudrutakia na ka kece lia koya na Turaga, me vaka voki lia ni kitou a vasalataki ikodou kinia iliu ka dau tukunia. ⁷ Ni sa yali kacivi ita na Kalou me da dukadukali, me da yalo savasava lia. ⁸ Ia ko koya sa becia, sa yali ni becia na tamata, sa becia na Kalou, o koya ka solia mai vi ita na nona Yalo Tabu. ⁹ Ia ena vuku ni vilomani vavitacini, sa yali ni yaga meu vola vi ikodou; ni dou sa vatavulici mai vua na Kalou mo dou vilomani tiko. ¹⁰ Ka sa dina ni dou sa caka voki lia vi ira kece na viwekani mai Masitonia taucoko: ia kitou sa vamasuti ikodou, na viwekani, mo dou uasivi cake valevu sara lia; ¹¹ ka mo dou gumatua sara mo dou toka vamalua, ka dau caka tiko lia na nomudou cakacaka, ka dou cakacaka ena ligamudou, me va kitou a vasalatakia vi ikodou; ¹² mo dou ia tiko lia nai valavala e kilikili kivei ira e taudaku, ka mo dou kakua ni dravudravua ena dua na ka. ¹³ Ia kau sa vinakatia, oi ikodou na viwekani, mo dou kakua ni guilecavia ena vukudra era sa moce tu, mo dou kakua kinia ni yasovakia, me vataki ira na tani sa yali na nodrai nuinui. ¹⁴ Ia kevaka eda sa vadinatia ni sa mate ko Jisu ka tucake voki mai, ena vaka voki lia kinia ko ira sa moce ni ra tu vata kei Jisu, ena yadi ira voki vua na Kalou. ¹⁵ Ni keitou sa tukunia lia koya vi ikodou me vaka na vosa ni Turaga, ni da na yali ni liu vi ira era sa moce tu koi itaa eda sa bula tiko me ycovia na nona qai voki mai na Turaga. ¹⁶ Ni na qai sobu mai lomalagi ko koya na Turaga ena kaila, kei na domo ni agilosi turaga, kei na davui ni Kalou: ena qai tucake mada iliu ko ira na mate era sa tu vata kei Karisito: ¹⁷ e muri ko ita, eda sa bula tiko lia, eda na yadi cake vata kei ira e na o, me da vitata kei na Turaga ena macawa: ia ena vaka kinia eda na qai tiko vata kaya na Turaga ka yali ni mudu. ¹⁸ O koya mo dou qai ia na vivacegui vataki ikodou ena vosa koya.