¹ Ni dou sa kila na viwekani, na nitou qai ka tiko vi ikodou, ni sa yali ni ka loa lia: ² ia kitou a vararawataki mada e liu, ka vacacani sara mai FIlipai, me vaka dou sa kila, kitou sa qai doudou lia ena vuku ni nitou Kalou me tukunia sara vi ikodou nai tukutuku vinaka ni Kalou, a sa ka levu na vivorati. ³ Ni sa yali sara ni caka na nitou i varo ena vivacalai, se na yalo yali ni savasava se na vivakaisini: ⁴ ia ni sa vinakati kitou na Kalou me kitou lesi me vunautakia nai tukutuku vinaka, kitou sa vosa vakinia, sa yali lia ni kitou valoma vinakataki ira na tamata, ia me valoma vinakatakia lia na Kalou, o koya sa lewa na yalo i kitou ⁵ Ni dou sa kila kitou sa yali ni vosa vavicavilaki, se ia na kocokoco enai lawaki rairai vinaka; ka sai vadinadina na Kalou: ⁶ kitou yali voki lia ni qara me ra dokai kitou ko ira na tamata, se ko ikodou, se ko ira na tamata tani, ka dina lia ni kitou sa vivacolati beka ena vuku ni kitou sai apositolo i Karisito. ⁷ Ia kitou a yalovinaka ena kemudou maliwa me vaka na dau meimei ni sa susugi ira na luvena; ⁸ ia sa vaka kinia, ni kitou sa yalo loloma sara vi ikodou, kitou sa vinakatia me solia vi ikodou na tukutuku vinaka ni Kalou, ia ka yali ni o koya loa lia, a nitou bula voki lia, ni kitou sa lomani iko dou valevu. ⁹ Ni dou sa nanumia, na viwekani, na nitou daucakacaka kei na nitou oca ni kitou sa dau cakacaka tiko ena bogi kei na siga me kitou kakua sara kinia ni vabibitaki ikodou ni kitou sa vunautakia vi ikodou nai tukutuku vinaka ni Kalou. ¹⁰ Dou a raicia dina kei na Kalou voki lia ni savasava ka dodonu ka yali ni cala na nitou i valavala ena ikodou maliwa, oi ikodou sa vabautia. ¹¹ NI dou sa kila kitou sa vasalatakia vi ikodou ka vadretia vi ikodou yadua, me vaka na tamana vi ira na luvena, ¹² mo dou caka nai valavala sa kilikili kei ira sa nona na Kalou, o koya sa kacivi ikodou kinia na nona matanitu ki na vanua vaiukuuku. ¹³ Ena vuku ni ka koya, kitou sa vavinavinaka tiko lia vua na Kalou, ni gauna dou a vabautia kinia na vosa ni Kalou dou a rogocia mai vi kitou dou sa yali ni vabautia me vaka e vosa ni tamata, me vaka lia na kena dina, na vosa ni Kalou, koya na cakacaka yaco voki lia vi ikodou sa vabautia. ¹⁴ Ni dou a vadamurimuri ira na vi soqosoqo lewe ni lotu ni Kalou mai Jiutia era sa tu vata kei Karisito Jisu ko ikodou na viwekani: ni dou a vosotia na veika ca mai vi ira na wekamudou, me vaka era sa vosotia mai vi ira na ka Jiutia, ¹⁵ ko ira sa vamatea na Turaga ko Jisu, kei ira voki lia na parofita a ra sa vacacani kitou, e ra sa yali vinaka vua na Kalou, a ra sa vicati voki lia kei ira na tamata, ¹⁶ a ra sa tarovi kitou, ni kitou sa vosa vi ira era sa yali ni lotu me ra bula kinia, me ra sa vasinatia tiko lia na nodrai valavala ca: ia sa yaco vi ira na cudruvi ni ra sa ca sara lia. ¹⁷ Ia ko kitou ni kitou sa yadi tani mai vi iko dou na viwekani ena gauna lekaleka lia, sa vayago lia ka yali ni vayalo kitou sa gumatua sara kinia ka vinakatia sara valevu me da vi raici ena matana votu. ¹⁸ o koya koya kitou a via qai yani kinia vi iko dou, ko au ko Paula, kau a sasaga vavica, ia ka sa vataotakia na nitou sala ko Setani. ¹⁹ Ia ka cava na nitou nuinui se marau, se nitou sala ni reki? sa yali lia ni ko ikodou ena mata ni noda Turaga ko Jisu ena nona lesu voki mai? ²⁰ Ni sai iko dou na vuni nitou lagilagi kei na vuni nitou reki.