9 ¹ Au sa yali ni lalaga? au sa yali ni apositolo koi au? au a yali ni raici Jisu Karisito na noda Turaga? oi kodou, dou sa yali li ni noqu cakacaka e na Turaga? ² Kevaka kau sa yali ni apositolo vei ira eso tani, au sai apositolo dina vei ikodou: ni sai vadinadina niu sai apositolo na nomudou tu vata kei na Turaga. ³ Au sa tukunia va koya vei ira era sa tarogi au, ⁴ Kitou sa yali beka ni veitalia me kitou kana, se somi? ⁵ kitou sa yali beka ni veitalia me kitou yadia tiko e dua na yalewa lotu, sa wati i kitou, me va taki ira nai apositolo tani, kei iratou na taci ni Turaga, kei Kifa? ⁶ se keirau lia kei Panapasa, keirau sa yali beka ni veitalia me keirau kua so ni cakacaka? ⁷ O cei na sotia sa qai valu e na dua na siga, ka sa saumi koya vakai koya? o cei sa tea na were-ni-vaini, ka sa yali ni somia na vuana? se ko cei sa vakania na qele-ni-sipi, ka sa yali ni somi e na wai-ni-sucu ni qele-ni-sipi? ⁸ Au sa vosatakia lia na veika ko ya me vaka lia na tamata? sa yali beka ni tukunia vakinia na vunau? ⁹ ni sa volai e na vunau i Mosese, Mo kakua ni vaucia na gusu ni pulumokau ni sa buturakia na sila. Sa daunanumia beka na pulumokau na Kalou? ¹⁰ se sa vosa beka ko koya e na vuku i itatou lia? Io, sa volai koya e na vuku i itatou; ni sa dodonu me cuki were e nai nuinui ko koya sa daucuki; kei koya sa buturakia na sila me buturakia e nai nuinui ni na rawatia na ka. ¹¹ Kevaka keitou sa kaburakia oti vei ikodou na veika vakayalo sa ka levu beka me keitou kumunia na nomudou veika vavuravura? ¹² Kevaka sa veitaliataki ikodou ko ira na tamata tani eso, e yali beka ni dodonu sara vei kitou? Ia kitou sa yali ni veitalia va koya; kitou sa vosotia na ka kece lia, de kitou tarovia nai tukutuku vinaka kei Karisito.

¹³ Dou sa yali beka ni kila, ni ra sa kana e na ka ni vale-ni-soro ko ira sa dauia na cakacaka tabu? era sa rawa na kedra mai nai cabocabo-ni-soro ko ira era sa dauqaravia nai cabocabo-ni-soro? ¹⁴ Sa lesia va kinia na Turaga me ra bula e nai tukutuku-vinaka ko ira era sa tukunia nai tukutuku-vinaka ¹⁵ Ia kau sa yali ni vakayagatakia e dua na ka koya; au sa yali voki lia ni vola na veika koya, me sa caka va kinia vei au: ni sa vinaka vei au meu mate, ka ca me dua e tarovia na ka kau sa dokai au kina. ¹⁶ Ia kevaka kau sa vunautakia nai tukutuku-vinaka, sa yali na ka meu dokai au kinia: ni kau sa va saurarataki; io sa ca sara vei au, kevaka kau sa yali ni vunautakia nai tukutuku-vinaka! ¹⁷ Ia kevaka kau sa caka na ka koya ni sa vinakatia na yaloqu, au sa saumia; ia kevaka ni sa yali ni vinakatia na yaloqu, sa qai soli vei au e dua na cakacaka vakaitalatala. ¹⁸ A cava sa qai kenai sau vei au? Na noqu vunautakia nai tukutuku-vinaka meu kakua ni vakaivolitaki, meu kakua ni caka me vaka sa dodonu vei au e nai tukutuku-vinaka. ¹⁹ Ni sa dina lia niu sa lalaga maivei ira kece lia na tamata, ia kau sa qisi au meu nodra bobula na tamata kece lia, meu rawai ira kinia na lewe vuqa. ²⁰ Ia kau sa yaco meu vaka e dua na Jiu vei ira na Jiu, meu rawai ira kinia na Jiu; vei ira sa vauci e na vunau, meu vaka e dua sa vauci e na vunau, ia kau sa yali ni vauci e na vunau, meu rawai ira kinia era sa vauci e na vunau; ²¹ vei ira sa yali kinia na vunau, meu vaka e dua sa yali vua na vunau, meu rawai ira kinia sa yali vei ira na vunau, ia ka sa yali ni yali vei au na vunau ni Kalou, au sa muria lia na vunau i Karisito; ²² vei ira era sa malumalumu kau sa yaco meu vaka e dua sa malumalumu, meu rawai ira kinia era sa malumalumu: au sa yaco meu ka kece lia vei ira kece lia na tamata meu va bula eso e na ka kece lia. ²³ Ia kau sa caka na ka kece lia e na vuku ni tukutuku-vinaka, meu rawa vata kinia kei ikodou na kenai sau. ²⁴ Dou sa yali beka ni kila ni ra sa cici kece lia ko ira sa cicivia na cere, ia sa dua loa lia sa taucia na cere? Dou cici va kinia, mo dou taucia. ²⁵ Ia ko koya yadua sa via gumatua, sa tiko malua e na ka kece lia; ia era caka ko ira koya, me nodra e dua nai sala sa ca rawarawa; ia koi ita, me dua sa yali ni ca rawa. ²⁶ Au sa cici va kinia, ia sa yali ni vaka e dua e yali ni kila: au sa vacu va kinia, ia ka yali⁹ ni vaka e dua sa vacukia na cagi: ²⁷ ia kau sa va malumalumutakia na yagoqu, ka vabobulatakia, de dua na ka, niu sa vunau vei ira na tamata tani, au sa qai dai loa lia tu.