10 ¹ Ia kau sa yali ni vinakatia, oi ikodou na veiwekani, mo dou lecavia ni ra a tu e ruku ni o ko ira kece lia na noda matua, a ra sa qai kece lia e loma ni waitui: ² a ra sa papitaisotaki kece lia vei Mosese e na o kei na waitui; ³ a ra sa kania vata kece lia na kakana vakayalo; ⁴ a ra sa somia vata kece lia na wai ni somi vakayalo: ni ra sa somi mai na Vatu vakayalo sa muri ira: ia na Vatu gona na Karisito. ⁵ Ia sa lewe vuqa vei ira sa yali ni vinakati ira na Kalou; ni ra sa dui daidai e loma ni veikau.

⁶ Ia na veika koya sai vatakarakara vei ita, me da kakua kinia ni daugadrevia na veika ca, me vaka na nodra daugadrevia. ⁷ Dou kakua voki lia ni qaravia na matakau, me vakataki ira eso; me vaka sa volai, Era sa tiko sobu na tamata me ra kana ka somi, a ra sa qai tu cake voki me ra qito. ⁸ Me da kakua voki lia ni dauyalewa, me vaka era sa caka eso, a sa bale kinia e na siga e dua bau e lewe ruasagavulu ka mani tolu na udolu. ⁹ Me da kakua voki lia ni dau vatovolei Karisito, me vaka era sa dau vatovolea eso, a sa kati ira mate na veigata. ¹⁰ Dou kakua voki lia ni daudidi, me vaka era sa didi eso a ra sa varusai e na dauveivarusai. ¹¹ Ia na ka kece lia koya sa yaco vei ira mei va takarakara: a ra sa volai me da va tavulici kinia, oi keda sa yacovi keda nai va taotioti ni veigauna. ¹² O koya me qai vakaraici koya ko koya sa nanumia sa tu dei, de bale lia mai.

¹³ Sa yali na vere tani sa yaco vei ikodou, o koya lia sa voratia rawa na tamata: ia sa yalodina na Kalou o koya ena yali ni daini ikodou mo dou dauveretaki valevu cake, me vaka lia na nomudou kaukauwa; ka na caka voki lia kei na vere na sala mo dou tuba kinia, mo dou vosotia rawa. ¹⁴ O koya ko ya, koi ikodou sa lomani, mo dou tuba tani mai na qaravia na matakau. ¹⁵ Au sa vosa me vaka vei ira na tamata vuku; dou lewa na ka kau sa tukunia. ¹⁶ A bilo ni vavinavinaka kitou sa vatonakia, sa yali ni ka sa noda vata kinia na dra i Karisito? Ai buli madrai eda sa dovia, sa yali li ni ka sa noda vata kinia na yago i Karisito? ¹⁷ Ni sa dua loa lia na madrai, sa qai yagona e dua loa lia koi ita e lewe vuqa, ni sa noda nai votavota ni madrai ko ya e dua loa lia. ¹⁸ Dou raici ira na Isireli vakayago: ko ira era sa kania na veimadrali, sa yali li ni nodra nai votavota vata kei nai cabocabo-ni-soro? ¹⁹ A cava na ka kau sa tukunia? ni sa dua li na ka dina na matakau, se na ka dina na ka sa vacaboria ki na matakau? ²⁰ Ia na veika era sa va caboya ko ira era sa yali ni lotu, era sa va caboya vei ira na tevoro, a sa yali lia vua na Kalou: ia kau sa yali ni vinakatia mo dou votai vata kei ira na tevoro. ²¹ Dou sa yali ni somja rawa na bilo ni Turaga, kei na nodra bilo voki lia na tevoro: dou sa yali ni kana rawa e na tepeli ni Turaga, kei na nodra teveli na tevoro. ²² Eda vacudruya na Turaga, ne? eda sa uasivi beka vua e na kaukauwa? ²³ Sa tara lia vei au na ka kece lia, ia sa yali ni yaga na ka kece lia: sa tara na ka kece lia, ia sa yali ni ka ni va tataki cake na ka keceblia. ²⁴ Me kakua e dua me qara na ka sa yaga dua loa lia vei koya, a ka voki lia sa yaga vei koya na tani. ²⁵ A ka kece lia sa volitaki e na rara ni veivoli, mo dou kania, ka kua ni tarogia e dua na ka e na vuku ni lewa-eloma: ²⁶ ni sa nona na Turaga ko vuravura, kei na ka kece lia sa sinai kinia. ²⁷ Kevaka e dua sa yali ni lotu sa sureti ikodou, ka dou sa vinakatia me qai, dou kania lia na ka kece lia sa tauci e matamudou, ka kua ni tarogia e na vuku ni lewa-eloma. ²⁸ Ia kevaka e dua sa tukunia vei ikodou, koya sa vacabori ki na veimatakau, dou kakua ni kania e na vuku i koya sa tukunia, e na vuku ni lewa-eloma voki lia: ²⁹ au sa cavutia na lewa-eloma, ia ka sa yali ni nomu, a nona lia na tani: ni sa lewai vakacava na noqu veitalia e na lewa-eloma ni dua tani? ³⁰ Ia kevaka kau sa kana ka vakavinavinaka kinia, meu sa vosavacacataki e na vuku ni cava e na ka kau sa va vinavinaka kinia? ³¹ O koya lia, se dou kana, se dou somi, se cava na ka dou sa caka, mo dou caka kece lia me varokorokotaki kinia na Kalou. ³² Dou kakua ni vacala e dua, vei ira na Jiu, se vei ira na lewe ni veimatanitu tani, se vei ira nai soqosoqo lewe ni lotu ni Kalou: ³³ me vaka kau sa caka na ka kece lia me vinakatia ko ira na tamata kece lia, ia kau sa yali ni qara na ka sa yaga dua loa lia vei au, na ka voki lia sa yaga vei ira na lewe levu, me ra va bulai kinia.