8 ¹ Ia e na vuku ni ka sa vacabori i na matakau, ita sa kila sa tu vei ita kece lia na vuku. Na vuku sa vu ni viavialevu, a loloma lia sa vu ni vakatataki cake. ² Ia kevaka e dua sa nanumia sa kila e dua na ka, sa yali ni kila na ka me vaka e dodonu me kila. ³ Ia kevaka e dua sa lomania na Kalou, sa kilai vua ko koya. ⁴ E na vuku ni kana ka sa vacabori ki na veimatakau, eda sa kila sa ka loa lia duadua lia e vuravura na matakau, a sa dua loa lia na Kalou ka yali voki e dua tani. ⁵ Io, sa dina sa tu na veika sa vatokai me kalou, mai lomalagi se e vuravura, me vaka ni ra sa lewe levu na kalou, ka lewe levu boki lia na turaga, ⁶ ia vei keda sa dua lia lia na Kalou, na Tamada sa vu vei koya na ka kece lia, eda sa nona lia koi ita; a sa dua loa lia na Turaga ko Jisu Karisito, sa caka kinia na ka kece lia, ia koi ita e na vukuna. ⁷ Ia ka sa yali ni nodra kece lia na tamata na vuku koya: io, sa so era sa nanumia sa dina na matakau, a ra sa kania me vaka sa vacabori ki na matakau, a sa dukadukali kinia na yalodra ni sa malumalumu. ⁸ Ia na kakana sa yali ni ka eda vinaka kinia vua na Kalou: ia kevaka eda sa kana, eda sa yali kinia ni vinaka cake; kevaka eda sa yali ni kana, eda sa yali kinia ni ca sobu. ⁹ Ia mo dou raicia vinaka de yaco na nomudou veitalia va koya me ka era tarabe kinia ko ira era sa malumalumu. ¹⁰ Ia kevaka e dua sa raici iko sa tamata vuku ni ko sa tiko e na vale ni matakau mo kana, ena qai yali ni doudou cake kina na loma i koya sa malumalumu me kania na veika sa va cabori ki na matakau? ¹¹ ia na nomu vuku ena vu ni nona rusa na wekada sa malumalumu, sa mate kinia na Karisito. ¹² Ia ni dou sa cala va koya, vei ira na veiwekani, ka vacacania na lomadra sa malumalumu, dou sa cala vei Karisito. ¹³ O koya, kevaka sa tarabe na wekaqu e na kakana, au na yali sara ni kania na lewe ni manumanu ka yali ni mudu, de tarabe e na vukuqu na wekaqu.