4 ¹ Me vakasami kitou na tamata yadua, ni kitou sa nona tamata cakacaka na Karisito, ki nai talatala e na veika vuni ni Kalou. ² Ia koya sa kilikili ki ira nai talatala, me ra raicia ni ra tamata dina. ³ Ia sa ka lailai sara vei au mo dou lewai au, se me ra lewai au na tamata; io, au sa yali dina ni lewai au vakai au. ⁴ Niu sa yali ni kila e dua na ka kau sa cala kinia; ia kau sa yali ni vadonui kinia: ia sai koya lia na Turaga ka lewai au. ⁵ O koya mo dou kakua ni lewa e dua na ka ni sa bera na kena gauna, dou wawa mada me qai mai na Turaga, ko koya ena varaitakia na veika ni butobuto sa vuni tu, ena va votuya voki lia na nanumia ni yaloda: ia ena qai dokai na tamata yadua mai vua na Kalou. ⁶ Ia na veika koya kau sa vaibalebaletakia vi kirau ki Apolosa ena vukumudou, na viwekani; mo dou vatavulici kinia mai vikirau mo dou kakua ni uasivia na ka sa volai tu, mo dou kakua kinia ni doka cake e dua, ka becia e dua. ⁷ Io, o cei sa qisi iko mo uasivi cake? se cava sa tu vi iko sa yali ni soli vi iko? ia kevaka sa soli vi iko, ko sa dokai iko kinia ena vuku ni cava, me vaka sa yali ni soli vi iko? ⁸ Dou sa qai mamau dou sa qai vutuniyau, dou sa lewa vaka na tui ni kitou sa takali: ia kau sa vinakatia kevaka dou sa lewa dina, me da lewa vata voki lia ki ikodou. ⁹ Ni kau sa nanumia sa lesi kitou nai apositolo na Kalou me kitou muri sara, me kitou vataki ira era sa lesi me mate: ni kitou sa varaitaki i vuravura, vei ira voki lia na agilose, ki ira na tamata. ¹⁰ Kitou sa lialia e na vuku i Karisito, ia koi ikodou dou sa vuku ni dou sa tu vata kei Karisito; kitou sa malumalumu, ia dou sa kaukauwa; dou sa va rokorokotaki, ia kitou sa beci. ¹¹ Ka yacovia na gauna koya kitou sa viakana, ka viagunu, ka luvawale, ka sa vamavoataki, ka yali na nitou i tikotiko; ¹² kitou sa oca, ni kitou sa daucakacaka e na liga i kitou: ni kitou sa vasewasewani, kitou sa vosa vinaka; ni kitou sa va cacani, kitou sa vosotia: ¹³ ni kitou sa vosa vacacataki, kitou sa va mamasu lia: kitou sa yaco me vaka na soqosoqo ni vuravura koya, io, na duka sa quarakia mai na ka kece, ka yacovia na siga nikua. ¹⁴ Au sa yali ni vola na vika koya meu vamaduataki ikodou, ia kau sa va tavulici ikodou ni dou sa vataki ira na noqu gone ni toko. ¹⁵ Ia kevaka sa udolu vakatini na nomudou i vavuvuli vi Karisito, sa yali ni lewe levu na tamamudou; niu sa va tuburi ikodou mo dou nei Karisito Jisu e nai tukutuku-vinaka. ¹⁶ O koya kau sa masuti ikodou kinia, mo dou va murimuri au. ¹⁷ Au sa talai Timoci vi ikodou e na vuku ni ka koya, o koya na noqu gone ni toko ka yalodina e na Turaga, ia ena va nanumi ikodou o koya e na noqu i valavala vei Karisito, me vaka na ka kau sa va vulicia e na viyasana kece lia e na visoqosoqo lewe ni lotu kece lia. ¹⁸ Sa viavialevu ko ira eso, me vaka niu na yali ni qai yani vi ikodou. ¹⁹ Ia kau na qai va totolo vi ikodou, kevaka sa vinakatia na Turaga, ia kau na yali ni kila na nodra vosa era sa viavialevu, na kena kaukauwa lia. ²⁰ Ni sa yali ni ka ni vosa loa lia na matanitu ni Kalou, sa ka lia ni kaukauwa. ²¹ A cava dou sa vinakatia? meu qai vei ikodou niu sa tara na motu, se meu qai e na loloma, kei na yalo malua?