3 ¹ Ia koi au, au sa yali ni vosa rawa vi ikodou, na viwekani, me vaka vi ira era sa vayalo, me vaka vi ira era sa vayago lia, me vaka vi ira era sa gone lalai e na nodra tu vata kei Karisito. ² Au sa va somi ikodou e na wai-ni-sucu, ka yali e na kakana dina; ni dou a yali ni rawa, edaidai voki lia dou sa yali ni rawa. ³ Ni dou sa vayago tiko lia: dou sa yali ni vayago tu kai valavala vatamata, ni sa tu vei ikodou na vuvu, kei na vileti? ⁴ Dou sa yali ni vayago, ni sa tukunia tiko e dua, Oi au sa ni Paula; ka dua tani, Oi au sa ni Apolosa?

⁵ Ia ko cei ko Apolosa? se ko cei ko Paula? ai talatala loa lia dou sa vabautia e na vukudrau, me vaka sa solia na Turaga ki na tamata yadua. ⁶ Au sa tea koi au, sa va suasuatakia o Apolosa; ia na Kalou lia sa va tubuya. ⁷ Sa qai ka wale kinia o koya sa tea, ki koya sa va suasuatakia; ia sa levu dua loa lia na Kalou, o koya sa vatubuya. ⁸ Erau sa tautauvata sara ko koya sa tea ki koya sa va suasuatakia: ia na tamata yadua ena rawa na kenai sau me vaka na nona cakacaka. ⁹ Ni da sa daucakacaka vata ki koya na Kalou; dou sa were ni Kalou, dou sa vale ni Kalou. ¹⁰ Me vaka na loloma ni Kalou sa soli mai vi au, me vaka na matai ni vale sa vuku, au sa cavotakia na yavu, a sa tara kina e dua tani. Ia na tamata yadua me sa lewa vinaka nai valavala ni nona tara kina. ¹¹ Ni sa yali ni rawa e dua na tamata me cavotakia na yavu tani, ko ya lia sa cavotaki tu, ko Jisu Karisito lia. ¹² Ia kevaka e dua na tamata sa tara cake e na yavu koya na koula, na siliva, na vatu talei, na kau, na co malai, se na vu-ni-sila; ¹³ ena vatakilai na cakacaka ni tamata yadua: ni na vakatakila mai na siga ko ya, ni na vatakilai e na bukawaqa; ia ena vatovolei e na bukawaqa na cakacaka ni tamata yadua se sa vaevei na kenai valavala. ¹⁴ Kevaka sa tu dei na nona cakacaka e dua na tamata, sa tara cake ko koya, ena rawa na kenai sau. ¹⁵ Kevaka ena visa na nona cakacaka e dua, ena yali vua na kenai sau; ia ko koya lia ena va bulai; ia sa na vaka lia na bula mai na bukawaqa. ¹⁶ Dou sa yali beka ni kila ni dou sa vale ni Kalou, ka sa tiko vi ikodou na Yalo ni Kalou? ¹⁷ Kevaka e dua na tamata sa va rusa na vale ni Kalou, ena va rusai koya na Kalou; ni sa savasava na vale ni Kalou, ia sai ikodou koya. ¹⁸ Me kakua e dua e vaisini koya vakai koya. Kevaka e dua vi ikodou sa nanumia sa vuku vavuravura, me sesewa mada o koya me vuku mai kinia. ¹⁹ Ni sa ka sesewa vua na Kalou na vuku ni vuravura koya. Ni sa volai, Sa rawai ira na vuku o koya e na nodra i lawaki. ²⁰ Ka vaka voki, Sa kila o Jiova na nodra nanumia na vuku, ni sa yali ni yaga. ²¹ Ko koya koya me kakua kinia e dua me vosa doudou e na vukudra na tamata. Ni sa nomudou na ka kece lia; ²² se o Paula, se o Apolosa, se o Kifa, se o vuravura, se na bula, se na mate, se na veika sa tu ni kua, se na veika ena yaco emuri; koya kece lia sa nomudou; ²³ ia dou sa nei Karisito; ia sa nei koya na Kalou na Karisito.