5 ¹ Sa rogo sara ni sa dua vei ikodou sa dauyalewa, ia na dauyalewa vaka ko ya sa yali ni vosataki vei ira era sa yali ni lotu, ni sa dua sa tara na wati i tamana. ² Ia dou sa viavialevu, ka yali ni tagicakia, me dai tani kinia vei ikodou ko koya sa caka na ka koya. ³ Ia koi au, niu sa yali vayago, ia sa tiko vata kei ikodou na yaloqu, au sa lewai koya sa caka na ka koya, me vaka kau sa tiko kinia, ⁴ e na yaca ni noda Turaga ko Jisu Karisito, ni dou sa soqoni vata tu, kei na yaloqu, kei na kaukauwa ni noda Turaga ko Jisu, ⁵ me soli koya sa va koya vei Setani me va rusai kinia na yagona, me vabulai na yalona e na siga ni Turaga ko Jisu. ⁶ Sa yali ni vinaka na nomudou vosa doudou. Dou sa yali beka ni kila sa dauvalevenitakia nai buli taucoko na leveni lailai? ⁷ O koya mo dou qai dainia tani na leveni makawa, mo dou yaco kinia mei buli vou, me vaka dou sa yali ni va levenitaki. Ni sa va matei oti e na vukuda na noda qai-sivia, io na Karisito. ⁸ O koya meda qai ia na soqoni, me kakua lia e na leveni makawa, se na leveni ni yaloca, kei nai valavala ca; e na yalosavasava lia kei na yalodina sa yali ni va leveni. ⁹ Au a vola vei ikodou e nai vola mo dou kakua ni dautiko vata kei ira na dauyalewa: ¹⁰ ia ka sa yali lia vei ira na dauyalewa ni vuravura koya, se vei ira na daukocokoco, se na daukovekove, se na dausoro ki na matakau, ni sa rawa lia koya kevaka dou qai tani e vuravura. ¹¹ Ia koya lia, kau sa vola vei ikodou, mo dou kakua ni dautiko vata kei na dua sa vatokai me wekada, o koya sa dauyalewa tiko, se daukocokoco, se dausoro ki na matakau, se dauveivasewasewani, se daumateni, se daukovekove: mo dou kakua ni kana vata kaya sa vakakinia. ¹² Sa noqu i tavi li meu lewai ira era sa yali ni curu? Ia ko ira era sa curu dou sa lewa se yali? ¹³ Ia ko ira sa yali ni curu sa lewa na Kalou. O koya mo dou qai dainia tani vei ikodou na tamatai valavala ca gona.