¹ Me'u jinia, ikonu na wekaqu, dou reki ka marau ina nomudou sa jiko vata na Turaga. E reva ni oca nomudou sa jiko vata na Turaga! E reva ni oca vi au me'u vola voki yani na vika au sa vola oji yani iliu, ni na vinaka cake sara vi konu ke. ² Dou qarauni kemunu vinaka mai vi ira na dau caka ca, o ira na koli, o ira na tamata ra sa daucikevia me tavalakia na yago.

³ Ni sai kita liga ke, e reva ni o ira, sa yaco vi kita na vicilivi djina, ni da sa qaravia na Kalou ina viliutaki ni Yalo Tabu, sa noda vata na marau ni da sa tu vata ki Karisito Jisu, da sa reva liga ni vararavi ina vika vayago. ⁴ Ka djina liga ni sa rawa vi au meu vararavi ina vika ke. Ke dua sa nanumia ni sa tu vua na ka me vuni nona vararavi ina vika vayago, sa levu sara na ka e tu ke vi au. ⁵ Au ma cilivi ina i kawalu ni siga ni noqu bula, au ma sucu meu luvei Isireli, mai na yavusa i Penijamini, au dra djina va-Iperiu; au ma dua vi ira na Farisi. ⁶ Ina vika me balejia na kena cuqeni vagumatua sara na vabaujia va-Jiu, au ma vacacania kinia nai soqosoqo lotu va-Karisito, ina vika me balejia na nona vadonui e dua mai na kena muri na lawa, au ma reva ni beitaki rawa kinia. ⁷ Na vika kece au ma dau taleitakia iliu, au sa okajia ke me ra tawayaga ina vuku i Karisito. ⁸ E reva laliga ni o ira na vika gona, au sa okajia na vika kece sara gona me ra reva ni yaga ni vatauvatani vata na kena rui talei na vikilai vata ki Karisito Jisu na noqu Turaga. Au sa dainia tani na ka keceliga ina vukuna, au sa okajia me benu, me noqu liga kinia na Karisito ⁹ ka me kirau visemaji djina sara. Sa reva kinia ni tu vi au na vivadonui sa soli ina vuku ni vabauji Karisito, na vivadonui sa taka mai vua na Kalou sa yavutaki ina vabaujia. ¹⁰ Au vinakatakia meu kilai Karisito vata na kaukauwa ni nona tucake voki mai na mate, ka meu wasea vata ki koya na nona rarawa, ka meu vataki koya ina nona mate, ¹¹ ina vuku ni vanuinui meu na tucake vokiliga vakinia o au mai na mate ina bula. ¹² Au sa reva ni tukunia niu sa rawa sara na vika ke, seu sa vinaka sara. Au sa tovolea jikoliga meu rawa nai cocovi ka sa qaqa oji kinia o Karisito Jisu ina vukuqu, ni sa rawai au meu nona vadua. ¹³ Kemunu na wekaqu, au sa reva sara ni tukunia niu sa rawa oji, sa dua liga na ka au sa caka, gona meu nanulevajia na vika sa sivi, au tovolea ina noqui gu taucoko meu rawa na vika sa tu mai liu. ¹⁴ O koya gona, au sa cici vadodonu sara ina kena i cavacava meu rawa kinia nai ulu ni cocovi, gona na kaci ni Kalou ina vuku i Karisito Jisu me balejia na bula mai colo. ¹⁵ O kita kece sa matua vayalo, sa dodonu me tu vi kita nai tovo ni rai vake; ke so vi ikodou sa duatani nai tovo ni nomudou rai, na qai vamatatatakia liga vi ikodou na Kalou. ¹⁶ Me da toso jikoliga iliu, me va nai varau da sa muria jiko mai me yacovia mai na gauna ke. ¹⁷ Ikodou na wekaqu, dou vadamurimuri au jikoliga. Dou muri ira vokiliga o ira sa bulatakia jiko nai varau ni bula kitou sa varaitakia jiko vi ikodou. ¹⁸ Au ma sa tukunia oji vawasoma vi ikodou iliu, au sa na tukunia voki ke vata na tonawanawa ni mataqu: na nodra i varau ni bula e le levu sara, sa vavuna me ra vimecaki vata na mate ni Karisito ina kauveilatai. ¹⁹ Ra sa jini djina liga i eli o ira ke. Ni sa nodra Kalou na vika sa vinakatakia na yagodra, ra sa dau dokadokatakia na ka e dodonu me ra maduatakia, ra sa dauvakasamatakia liga na ka ni bula ke. ²⁰ O kita, da sa lewe ni koro mai lomalagi, da sa warakia jiko liga ina yalo nanamaki na nodai Vabula, na Turaga o Jisu Karisito me qai mai lomalagi. ²¹ Na qai visautakia o koya na yagoda malumalumu ke, na yago sa rawa ni mate, me vukicia me va na yago vaiukuuku; ina nona vayagatakia na kaukauwa sa rawa vua me yadjia kinia na ka keceliga ina nuiniu ni nona lewa.