¹ O koya gona, ikonu na wekaqu, dou sa rui ka vamareqeji kinia vi au, sa nanumi ikodou valevu. Sa ka levu na nomudou vamarautakia na yaloqu, au sa cibitaki ikodou djina sara. Sai koya kinia ke, ikodou na wekaqu, na vika mo dou vayacoya me rawa ni dou tu dei kinia ina nomudou bula vata na Turaga. ² Au sa vamasuji rau o Uotia vata ki Sainitiki me rau lomavata ina vuku ni Turaga. ³ Au sa kerei iko vokiliga na noqui tokani yalodjina, mo vukei rau na yalewa ke, ni kitou ma cakacaka vata sara vakaukauwa ina kena vatetei na kosipeli, kitou vata ki Kelemedi vata ki ira keceliga nai tokani dauviqaravi, sa volai tu na yacadra inai vola ni bula ni Kalou. ⁴ Dou reki jikoliga ina nomudou sa tu vata ina Turaga, au sa tukunia voki dou reki jikoliga. ⁵ Me laurai vi ikodou nai tovo ni rai sa yavutaki ina yalomalumalumu. Sa voleka na Turaga. ⁶ Dou kua sara ni lomaocaoca ia na ka keceliga me vatakilai vua na Kalou na nomudou kerekere i na masu vata na daucikecike vata na vavinavinaka, ⁷ ia na vacegu ni Kalou, sa uasivia na kila-ka vatamata, sa vataudeitakia na yalomudou vata na lomamudou ina vuku i Karisito Jisu. ⁸ Meu jinia, ikodou na wekaqu, dou tugania ina nomudou vakasama na vika keceliga e vinaka ka dodonu me vacaucautaki; gona na vika djina, na vika va-turaga, na vika e dodonu, na vika e savasava, na vika e totoka ka dau dokai. ⁹ Dou vayacoya na vika dou sa vulicia ka raicia vi au, vata mai na vika au sa tukunia vata na vika au sa qaravia, na qai jiko vata ki ikodou na Kalou ni vivacegui. ¹⁰ Au sa marau djina valevu ina Turaga ni sa qai vavoui voki na nomudou kauwaitaki au vake. Au reva ni kaya ni sa mai mudu na nomudou kauwaitaki au, ia sa reva liga na gauna mo dou varaitakia rawa kinia. ¹¹ Au reva vokiliga ni tukunia jiko ke meu dusia niu vinakatakia na vika ke; niu sa vulicia oji meu ciqomia liga ina yalo vacegu na vika cava liga sa tu vi au. ¹² Au sa kila na bula dravudravua, au sa kila vokiliga na bula vutuniyau. Au sa vulicia nai walewale ni bula vacegu ni sotavi na vidraki ni bula duidui eso, seu via kana, seu kuva, dravudravua seu vutuniyau. ¹³ Au sa rawa ni sota na vidraki ni bula keceliga ina vukui Karisito o koya sa vakaukauwataki au. ¹⁴ Ia sa vinaka djina na nomudou mai vukei au ina gauna au ma leqa tu kinia. ¹⁵ Dou sa kila vinaka, ikodou liga na kai Filipai, na kena vunautaki na kosipeli, na noqu qai mai Masitonia, e reva ni dua nai soqosoqo lewe ni lotu ma vukei au ina vika ma vacurumi mai vata na vika me saumi. ¹⁶ Na noqu jiko mai Cesalonaika, dou ma vayadjia yani kinia vavica na nomudou ka ni vivuke vi au. ¹⁷ E reva ni vuna ke niu ma via vaqara i loloma liga; au vinakatakia liga meu raicia me wili vi ikodou na vua ni nomudou vabaujia. ¹⁸ Sa tu ke na rasiji ni vika kece dou ma solia vi au; sa vuabale voki. Na ka kece sara au ma vinakatakia au sa tauria ni sa yadjia kece mai o Epafirotaito na nomudou ka ni loloma. Sa va e dua na ka ni va-cabo-i-soro boi vinaka vua na Kalou, nai madrali sa vadonui sa valomavinakatakia na Kalou. ¹⁹ Na noqu Kalou na sota na nomudou gagadre keceliga me va ni sa vutuniyau valevu sara o koya ina vuku i Karisito Jisu. ²⁰ Me caka vua na noda Kalou na Tamada na varokoroko sa reva ni mudu. Emeni ²¹ Au sa loloma yani vi ira keceliga ra sa ni Karisito Jisu. Ra sa loloma yani vi ikodou na noda i tokani ra jiko vata ki au. ²² O ira kece na tamata ni Kalou ra jiko ke ra sa loloma vokiliga yani, vabibi o ratou na jiko ina vale ni Sisa. ²³ Me jiko vata ki ikodou kece sara na loloma savu ni noda Turaga o Jisu Karisito.