¹ Ia me va ni sa vayaloqaqataki ikodou na nomudou tu vata ki Karisito, ka sa vacegui ikodou na nona loloma, ka dou sa vitokani vata jiko ina nona Yalo Tabu, ka sa tu vi ikodou na yalomatua vata na yalovinaka, ² au sa vamasuji ikodou mo dou vamarautaki au djina sara, me tautauvata nai varau ni nomudou vakasama, vata na nomudou jiko vilomani ka mo dou lomavata ka yalovata jiko. ³ Ikodou kua ni caka e dua na ka ina yalo ni nanumi vataki koya, se ina yalo dokadoka, ia ikodou yalo malumalumu liga ka dau okaji ira na tani me ra vinaka cake vi ikodou. ⁴ Me ra kua ni dui nanumia vokiliga na tamata yadua na vika e baleji ira, ia me ra dau nanumia vokiliga na ka baleji ira na tani. ⁵ E dodonu me jiko vi ikodou nai tovo ni rai e jiko vi Karisito Jisu, ⁶ ni sa jikoliga vua ina vigauna kece nai tovo ni Kalou, ia sa reva liga ni suguraki koya yani me rau tautauvata na Kalou. ⁷ Sa dainia vajikijiki na vika kece sa taukenia ka sa matanatakia na bula ni dauviqaravi. ⁸ Sa laurai vua ni sa i tovo vata na tamata ka sa rairai mai ina yalo vatamata, sa vayalomalumalutaki koya ka talairawarawa me mate ina kauveilatai. ⁹ O koya gona sa laveji koya cake kinia na Kalou ina vanua cecere sara, ka solia vua na yaca sa vinaka cake mai na viyaca keceliga, ¹⁰ me tekiduru kinia ina yaca i Jisu na duru vayadua keceliga, mai lomalagi vata i vuravura vata na ruku i vuravura, ¹¹ ra na vatusa na yame keceliga ni sa Turaga o Jisu Karisito, me varokorokotaki kinia na Kalou na Tamada. ¹² O koya ke, ikodou na wekaqu lomani, me va ni ikodou ma dautalairawarawa vi au ina gauna da sa jiko vata kinia, e bibi cake sara mo dou muria na noqu vosa ina gauna eda reva ni jiko vata kinia me vake, Ni vaojia vavinaka na cakacaka ni nomudou vabaujia ina rere vata na sautanini. ¹³ Balejia ni sa daucakacaka maliwai ikodou na Kalou vata ka vukei ikodou mo dou taleitakia ka talairawarawa ina i naki ni lomana. ¹⁴ Ikodou kua ni caka e dua na ka ina vosa kurukudru se vileji, ¹⁵ me rawa kinia mo dou yalosavasava, ka reva ni beitaki ina dua na cala me vataki ira na luve ni Kalou sa reva na nodra cala ka ra sa bula jiko ina kedra maliwa na tabatamata lomatakelo ka ivalavala ca, e dodonu mo dou cila serau ina kedra maliwa me vaka na kalokalo ra sa vararamatakia na lomalagi. ¹⁶ Na nomudou sa solia jiko vi ira nai tukutuku ni bula ke ikodou sa caka gona, sa na rawa kinia vi au me'u vibeitaki ikodou ina siga i Karisito, balejia ni na vatakila gona ni sa reva ni maumau liga na noqui gu vata na noqu cakacaka. ¹⁷ Ke va madaliga au na mani vamatei ina vukumudou, au na sovarakia na noqu dra mei kuri ni nomudou i soro vua na Kalou ina vuku ni nomudou vabaujia, au na marau djina, au na marau vata ki ikodou yadua. ¹⁸ Me vavokiliga kinia o ikodou, mo dou reki ka marau vata ki au. ¹⁹ Ke sa vakinia na loma ni Turaga, meu talai Timoci yani vi ikodou ina dua na gauna laliga ke, ka me na mai vaceguya na yaloqu nai tukutuku baleji ikodou. ²⁰ E reva voki ni dua e jiko vi au me kauwaitakia djina na vika e baleji ikodou me vataki koya. ²¹ Ra sa dui kauwaitakia liga na tamata yadua na ka sa baleji ira, ka reva na vika e baleji Jisu Karisito. ²² Ikodou sara madaliga vai ikodou, dou sa vadjinadjinatakia na nona yaga, ina ni rau ma cakacaka vata ina vuku ni kosipeli, me vaka e dua na tama vata na luvena. ²³ O koya gona au sa naumia me'u na talai koya yani vi ikodou ina gauna liga au sa kila rawa kinia na vika me baleji au. ²⁴ Ia, au sa vanuinui jiko vua na Turaga ni na rawa me'u qai yani vi ikodou ina dua na gauna lekaleka ke. ²⁵ Au naumia vokiliga ni sa raujia me'u tala yani na wekada o Epafirotaito, o koya kirau ma viqaravi vata sa vala vata voli i yasaqu, sa yadjia mai na nomudou i tukutuku ina nona mai vukei au. ²⁶ Sa vinakatakia valevu o koya me raici ikodou kece sara, sa rarawa na yalona ni dou qai rogocia ni sa tauvi-mate. ²⁷ Io, sa tauvi-mate djina o koya, sa voleka sara ni mate. Ia sa yaloloma vua na Kalou, sa reva ni vua taudua liga, sa yaloloma vokiliga vi au, sa reva ni vaikuritakia na noqu rarawa ina dua voki na ka. ²⁸ O koya gona sa gu sara kinia valevu na lomaqu, me'u talai koya yani vi konu, mo dou na marau kinia ni dou sa raici koya voki, sa na seavu vokiliga kinia na noqu rarawa. ²⁹ Dou ciqomi koya, io, ina yalo marau, me va ni sa wekada o koya ina vuku ni Turaga. Dou dokai ira keceliga na tamata ra sa vataki koya. ³⁰ Balejia ni ma voleka sara ni mate ina vuku ni cakacaka i Karisito. Ni solia liga na nona bula me mai qaravia na vivuke eso sa reva ni rawa ni dou qaravia.