¹ Ni sa sinai o Jisu i na Yalo Tabu, sa lesu voki mai i na Joritani, sa yadji koya na Yalo Tabu i na loma ni vikau, ² sa dau veretaki koya na tevoro ka bogi vasagavulu. Sa reva na ka e kania o koya i na visiga gona: ni sa oji sa qai viakana. ³ Sa tukunia vua na tevoro, "Keva o sa Luve ni Kalou, mo tukunia mada me vuki na vatu ke me i buli madrai." ⁴ Sa tukunia vua o Jisu, sa volai, "E na reva ni bula na tamata i na madrai duadua liga, sa bula liga i na vosa keceliga ni Kalou." ⁵ Sa tuberi koya na tevoro i na dua na ulu-ni-vanua cecere, sa varaitakia vi koya vakasauri sara na vi matanitu keceliga i vuravura. ⁶ Sa qai tukunia vua na tevoro, "Na lewa ni ka kece ke au sa solia vi iko, na kedra i ukuuku vokiliga, ni sa soli vi au, ia ke au sa solia vi koya yadua au sa via solia kinia: ⁷ Ke o na varokoroko vi au, ena nomu keceliga." ⁸ Sa vosa vua o Jisu, ka tukunia, "Mo qai i tovuqu, Setani: ni sa volai, Mo varokoroko vi Jiova na nomu Kalou, ia mo qaravi koya duadua liga." ⁹ Sa yadji koya i Jerusalemi, ka daini koya i na taba ni vale ni soro, ka tukunia vua, "Keva o sa Luve ni Kalou, mo rika sobu i vanua ke; ¹⁰ ni sa volai, Ni na varoji ira nona agilosi o koya i na vukumu, me ra maroroi iko: ¹¹ ia ra na keveji iko i na ligadra, De dua na siga sa tavutu kinia na yavamu i na vatu." ¹² Sa vosa o Jisu, sa tukunia vua, "Sa kainaki, Mo kua ni vatovolea vaca na nomu Kalou o Jiova.'" ¹³ Ia ni sa vaojia keceliga na dauvere na tevoro, sa qai tani vua ka yacovia e dua na gauna. ¹⁴ Sa lesu voki o Jisu i na kaukauwa ni Yalo Tabu i Kalili; sa rogovaki na kena i rogorogo i vanua taucoko sa vavolivolijia. ¹⁵ Sa vatavuvuli jiko i na nodra vivale ni lotu, ra sa dokai koya o ira keceliga. ¹⁶ Sa yaco i Nasareci, na koro ma susugi kinia: ia me vaka na nonai valavala, sa curu i na vale ni lotu i na siga ni vacecegu, sa wiri tu me wili vola. ¹⁷ Sa soli vi koya nai vola ni Aisea na varovita, ia ni sa tevukia na i vola, sa raicia na jikina sa volai kinia, ¹⁸ " Sa tu vi au na Yalo i Jiova, Ni sa lumuji au o koya me’u vunautakia nai tukutuku-vinaka vi ira na dravudravua; Meu vunautakia na visereki vi ira na bobula, Vata na rai voki vi ira na mataboko, Me’u valalagataki ira ra sa mavoa, ¹⁹ Me’u vunautakia na yabaki vinaka i Jiova." ²⁰ A sa vivigia nai vola, sa solia voki vua nai talatala, sa jiko sobu; sa varaici koya matua na matadra keceliga era jiko i na vale ni lotu. ²¹ Sa qai tukunia vi ira o koya, Ni kua sa tukuni i na daligamunu nai Vola Tabu ke. " ²² "Sa ra vadjinadjinatakia o ira kece liga, sa ra kurabui i na vuku vosa vinaka sa qai mai na gusuna. "Ra sa tukunia, sa reva beka ni luve i Josefa o ka ke?" ²³ Sa tukunia vi ira o koya, "E djina liga dou sa vosatakia vi au na i bole ke, 'Vuniwai, mo vabulai iko mada: na ka kece liga sa caka mai Kapenaumi, caka vokiliga i na nomudou vanua ke." ²⁴ Sa qai tukunia vokiliga o koya, "Au sa tukunia vaidjina vi ikodou, Sa reva ni dua na varovita e vinakaji i na nona vanua. ²⁵ Ia au sa vosa djina vi iikodou, ra le levu na yada i Isireli i na gauna i Ilaija, sa sogo tu o lomalagi ma yabaki tolu ka mani vulaono, ni sa dausiga valevu na vanua taucoko: ²⁶ sa reva ni talai o Ilaija vi dua vi ira, vua liga na yada ni Sarepita, i na yasayasa va Saitoni. ²⁷ Sa le levu vokiliga na vukavuka i Isireli i na gauna i Ilaisa na parofita; sa reva ni dua vi ira sa vasavasavataki, o Neamani liga na kai Siria." ²⁸ Ia o ira keceliga ra tu i vale ni lotu, ni ra sa rogocia na ka ke, ra sa cudru valevu sara. ²⁹ ra sa wiri tu, ka biligi koya i na i bili ni koro, a ra sa yadjia i na baji ni ulu ni vanua sa tara tu kinia na nodra koro, me ra biligia mai na bari ni savu. ³⁰ Sa mani qai o koya i na kedra maliwa, ka qai tani yani. ³¹ Sa qai sobu i Kapenaumi, a koro mai Kalili, a sa vatavuvuli i na visiga ni vacecegu. ³² Ra sa kurabui sara i na nona i vavuvuli, ni sa vosa o koya i na nona kaukauwa liga vataki koya. ³³ Sa tiko i valenilotu dua na tamata, ka curumi koya e dua na yalo ni dua na tevoro velavela, a sa qoqolou i na domo levu. ³⁴ sa tukunia, :Oi lei! na cava vi kita, i Jisu na kai Nasareci? o sa qai beka mai mo rawai kitou? au sa kilai iko, na nona Le Dua Yalosavasava na Kalou." ³⁵ Sa vunauci koya o Jisu, ka tukunia vua, Mo galu liga, ka qai tani mai vua. Ia ni sa tavutavulaki koya mada na tevoro i na kedra maliwa, sa qai tani mai vua, ka reva ni vamavotakia. ³⁶ Ra sa kurabui keceliga, ra sa vivosaki vata ki ira, tukunia, A cava beka na vosa kei ni sa vosa vaturaga ka vosa mana o koya vi ira na yalo velavela, a ra sa qai tani sara. ³⁷ Sa kuruvakia yani na kenai rogorogo i na viyasana keceliga i vanua wavolivolijia. ³⁸ Sa qai tani mai vale ni lotu o koya, ka curu i na vale i Saimoni. Sa tauvia na jinai wati Saimoni e dua na katakata levu; ra sa masuji koya i na vukuna. ³⁹ Sa tu i jikina o koya, a sa vunaucia na katakata: a sa yali vua; sa wiri sara o koya, sa qaravi ratou ⁴⁰ Ia ni sa dromu jiko na siga, o ira keceliga sa tauvimate na nodra ena mate voki eso, ra sa yadji ira vi koya: a sa tabaki ira yadua o koya ina ligana, ka vabulai ira. ⁴¹ Ia ra sa le levu sa qai tani mai vi ira e so na tevoro, ni ra sa qoqolou jiko, ka tukunia, O iko na Karisito na Luve ni Kalou, Sa vunauci ira o koya, ka reva ni dainia me ra vosa, ni ra sa kila sa Karisito o koya. ⁴² Ia ni sa siga sa qai tani mai kinia o koya, a sa qai i na dua na yasana lala: a ra sa vaqarai koya o ira na tamata, a ra sa qai mai vua, ka tarovia me kua ni qai tani mai vi ira. ⁴³ Sa tukunia vi ira o koya, Sa dodonu me'u qai me'u tukunia nai tukutuku-vinaka ni matanitu ni Kalou i na vikoro tani voki eso, ni ka ke au sa talai mai kinia. ⁴⁴ Sa dauvunau o koya i na vivale ni lotu mai Kalili.