¹ A ra sa tucake o ira kece liga na le levu, ka ra yadji Jisu vi Pailato. ² Sa ra vatekivu me ra beitakia, ka tukunia, Kitou sa raici koya ke, sa vukicia vatani na vanua, sa vatabuya na soli vacavacava vi Sisa, ka tukunia voki liga ni sa Karisito ka Tui voki liga o koya. ³ Sa tarogi koya o Pailato, ka tukunia, O ikonu na nodra Tui na kai Jutia, se reva? Sa vosa o koya ka tukunia vua. O sa tukunia dina mai. ⁴ Sa qai tukunia o Pailato vi ira na bete levu vata ki ira na le levu, Au sa reva ni raicia e dua voki na ka ca vi koya na tamata ke. ⁵ Ra sa qai cikevia valevu liga ka tukunia, Sa vayavalaji ira na tamata i Juta taucoko, o koya na i vavuvuli, sa vatekivu mai Kalili ka yacovia na tai kadua. ⁶ Ni sa rogocia o Pailato, sa tarogia, se sa kai Kalili voki liga o koya se reva. ⁷ Ni sa nanumia ni ma dau jiko o koya ina yasana sa lewa o Eroti, sa talai koya voki vi Eroti, o koya vokiliga sa jiko mai Jerusalemi ina gauna gona. ⁸ Ni sa raici Jisu o Eroti, sa kalevu na marau, sa vinakajia dede me raicia, ni sa levu na ka sa rogocia vua; ni sa nuitakia me raici koya ni na caka e dua na cakacaka mana. ⁹ Sa levu na ka sa tarogi koya kinia; sa reva na ka sa tukunia vua o koya. ¹⁰ A ra tu kinia na bete levu vata ki ira na vunivola, ra sa beitakia valevu sara. ¹¹ O Eroti, vata ki ira na nona sojia, ra sa vasewasewani koya, ka valialiai, ra vakasulumi koya voki ina dua na i sulu lumilumisa, qai ra vatalai koya voki vi Pailato. ¹² A rau sa vivinakaji voki ina siga gona o Eroti vata ki Pailato: ni ma rau sa vicaji tu i liu. ¹³ O Pailato, ni sa vasoqoni ira na bete levu vata ki ira na turaga vata ki ira vokiliga na tamata. ¹⁴ sa tukunia vi ira, dou sa yadjia mai vi au na tamata ke, me va e dua sa vukici ira vatani na tamata; ia raicia, au sa tarogia i matamudou, ia au sa reva liga ni raicia vua na tamata ke e dua na ka ca dou sa beitakia vua. ¹⁵ O Eroti voki liga e reva; ni'u sa talai ikodou vua; ka raicia, sa reva na ka sa laurai vua sa dodonu me mate kinia: ¹⁶ O koya gona au na motulaki koya ka serekia. ¹⁷ Ni sa dodonu me serekia vi ira e dua i na na solevu gona. ¹⁸ A ra sa qai kailavakia ka tukunia, me yadji tani o ka ke me sere vi kimamu o Parapa. ¹⁹ O koya ka dai ki valeniveivesu, ni sa vatubu visei ina koro ka ni ma laba vokiliga. ²⁰ Sa qai tukunia voki o Pailato, ni sa via sereki Jisu. ²¹ Sa ra qolou ka tukunia "Vakojia liga ina kauveilatai, Vakojia liga ina Kauveilatai." ²² Sa qai tukunia voki vi ira o Pailato nai katolu ni gauna, A ca cava voki sa caka o koya? Au sa reva ni raicia vua e dua na ca vua ka dodonu me mate kinia; o koya gona au na motulaki koya kinia ka serekia. ²³ Ia ra cikevia matua liga ina domolevu, ni ra sa kerea me vakoji ina kauveilatai o koya. Sa qai mani rogoci liga na domodra. ²⁴ Sa qai lewa kinia o Pailato me sa vayacoya liga na ka ra kerea na tamata. ²⁵ A sa serekia o koya na tamata ra ma kerea: o koya liga ma bala ina valenivivesu ina vuku ni visei vata ki na laba, ia sa qai soli liga o Jisu vi ira me ra yaco kinia na lomadra. ²⁶ Ia ni ra sa yadji Jisu jiko, ra sa qai tauri Saimoni, na kai Kirini, ka dainia vua na kauveilatai, me colajia ka muri Jisu. ²⁷ Ra sa le levu sara sa muri koya, vata ki ira a yalewa, era tagi ka osivakia. ²⁸ Sa qai vuki vi ira o Jisu ka tukunia, Ikodou na yalewa ni Jerusalemi, dou kua ni tagicaki au, ia dou tagicaki ikodou liga vata ki ira na luvemudou. ²⁹ Raicia, sa voleka mai na siga, na tukuni kinia, Sa kalougata o ira na yava vata ki na kete sa reva ni sucu mai kinia na gone, vata ki na sucudra sa reva ni vasucumia na gone. ³⁰ Ra na qai tukunia ki na vi ulunivanua, Lutuki kimamu mai; ki na vivanua cecere vokiliga, Ubi kimamu mai. ³¹ Ke ra sa vayacoya na vika ke ni sa drokadroka na kau, na cava voki na qai caka ni sa madu kinia? ³² Sa le rua voki liga na tamata ca, ratou sa kaivesu vata, rau qai voki liga mai me vamatei vata ki koya. ³³ Ni ra sa qai ki na vanua, yacana o Kalivari, [Na vanua ni qavokavoka], ra sa qai vakoji koya kinia vata ki rau na tamata ca, dua na yasana i matau dua ka dua voki na yasana i mawi. ³⁴ Sa qai tukunia o Jisu, I Tamaqu, Nu vosoji ira, ni ra sa reva ni kila na ka sa vayacoya. Sa ra qai vawiri madjigi me ra wasea kinia na nona i sulu. ³⁵ A ra sa vararai tu na le levu, me ra varaicia na vi ka sa yaco. O ira vokiliga na turaga ra sa valialiai koya, ka tukunia, O koya ma dau vivabulai vi ira na tani; me vabulai koya mada, ke sa o koya djina na Karisito, na nona ka djigitaki na Kalou. ³⁶ O ira vokiliga na sotia ra valialiai koya, ka vasomia vua na wai wiwi, ³⁷ ka ra tukunia vua, "Ke ikonu sa nodra Tui na kai Jutia, mo vabulai ikonu mada" ³⁸ Sa ra qai vola toka i colo vua i na vosa va-Kirisi vata na vosa va-Roma, vata na vosa va-Iperiu, "KE NA NODRA TUI NA KAI JUTIA." ³⁹ Sa vosavacacataki koya e dua vi rau na tamata ca koya sa lili tu ka tukunia, Ke nu sa Karisito djina o ikonu, vabulai ikonu vata ki kirau vokiliga. ⁴⁰ Ia sa qai vunauci koya o koya ka dua ka tukunia, "O sa reva beka ni rerevakia na Kalou, ni o sa lewai mo mate vakinia? ⁴¹ ni ss dodonu vi kitaru, me saumi kinia vi kitaru na nodarui valavala; ia na tamata ke sa reva ni dua na nona cala sa caka". ⁴² Sa qai tukunia vi Jisu o koya, "Ikonu na Turaga, nu qai nanumi au ni konu sa qai ina nomunu matanitu". ⁴³ Sa tukunia vua o Jisu, "Au sa yalatakia vi ikonu, ina siga liga ni kua taru na jiko vata kinia mai Parataisi. ⁴⁴ Ni sa yacovia nai ka ono ni auwa, sa solegia na butobuto na vuravura taucoko ka yacovia na i ka ciwa ni auwa. ⁴⁵ a sa vabutobutotakia na matanisiga ka kavida rua na i laji ni valenisoro. ⁴⁶ Sa qai qolou i na domo i levu o Jisu, ka tukunia, "I Tamaqu, au sa solia na yaloqu ki na ligamunu:" ni sa cavujia oji na vosa gona, sa qai mate. ⁴⁷ Ni sa raicia na turaga ni valu na ka keceliga sa yaco, sa varokorokotakia na Kalou, ka tukunia, "Sa djina liga sa yalododonu na tamata ke". ⁴⁸ O ira keceliga na tamata ra ma qai mai ka ra vadjinadjinatakia na vi ka sa yaco, ra sa tavia liga na mabudra ka ra lesu voki yani. ⁴⁹ O ira keceliga na wekana vata ki ira na yalewa ra ma muri koya mai Kalili, sa ra tu vayawa yani ka varaicia tu na vi ka sa caka. ⁵⁰ Sa dua na tamata o Josefa na yacana, ka dua via ira na lewe ni matavilewai; sa tamata vinaka ka dodonu o koya. ⁵¹ (sa reva ni lomavata se cakacaka vata ki ira:) sa kai Arimacea, e dua na nodra koro na kai Jutia: sa warakia vokiliga o koya na matanitu ni Kalou. ⁵² Sa qai o koya vi Pailato, ka qai kerea na yagoi Jisu. ⁵³ Sa qai luvajia mai ra ka solegia ina dua nai sole lineni, ka vadavoya i na dua nai bulubulu sa ta ina vatu ka se reva ni bau davo kinia e dua i liu. ⁵⁴ Ia na siga gona sa siga varau, ni sa voleka mai na siga ni vacecegu. ⁵⁵ O iratou vokiliga na yalewa, ratou ma qai vata mai Kalili, ratou sa muri koya yani, a ratou sa raicia nai bulubulu vata nai varau ni kena vadavori na yagona. ⁵⁶ A ratou sa qai voki ka varautakia eso na ka boi vinaka vata ki nai lumu: a ratou sa vacegu ina siga ni vacecegu me va nai vunau.