¹ I nai matai ni siga ni macawa, ina savulaci caca sara, ratou sa qai i nai bulubulu, ratou sa yadjia mai na ka boi vinaka ratou ma varautakia, ka so vokiliga sa qai vata mai ki iratou. ² Ratou sa raicia ni sa vaqiqi tani tu na vatu mai nai bulubulu. ³ Ni ratou sa curu, ratou sa reva ni raicia na yago ni Turaga o Jisu. ⁴ Ni ratou sa raicia na vika sa yaco, ratou sa kurabui valevu kinia, raicia, e le rua na tamata sa tu voleka vi ratou ka vaisulu lumilumisa: ⁵ Ia ni ratou sa rere, ka vacuva sobu na matadratou i na qele, a rau sa tukunia vi ratou, Na cava dou sa vaqara koya kinia sa bula ina kedra maliwa na mate. ⁶ Sa reva i vanua ke o koya sa tucake voki, nanumia na nona vosa vi ikodou ni ma jiko vata ki ikodou mai Kalili, ⁷ ni sa tukunia, "Ni na soli yani na Luve ni Tamata ina ligadra na tamata ca, ka na vakoji ina kauveilatai ka na tucake voki mai nai ka tolu ni siga. ⁸ Ratou sa qai nanumia na nona vosa, ⁹ ka sa lesu voki mai nai bulubuli, ka tukunia na vi ka keceliga ke, vi ira na le jinikadua, vi ira kece vokiliga na kena vo. ¹⁰ O iratou na mai tukunia nai tukutuku ke, vi ira na Apositolo, o Meri na yalewa ni Makitala, o Joana vata ki Meri na jinai Jemesa vata ki ira eso na yalewa tani. ¹¹ Sa va nai tukutuku laliga vi ira na nodratou vosa, ra sa reva ni vadjinajia. ¹² Sa qai tucake o Pita ka cici i nai bulubuli; ni sa cuva sobu sa raicia na i sole lineni ni sa dai lala koto, a sa qai tani sa kurabui i lomana ina vuku ni vi ka sa yaco. ¹³ Ka raicia sa le rua vi ira sa qai na siga gona i na dua na koro lailai o Emeo na yacana, e vitu beka na maile na kodrau viyawaki vata ki Jerusalemi. ¹⁴ Rau sa vivosakitakia na ka keceliga sa qai yaco. ¹⁵ Ia ni rau sa vivosaki jiko ka vitarotarogi, sa toso voleka o Jisu ka qai vata ki rau. ¹⁶ Sa vabuwawatakia na matadrau me rau kua kinia ni kilai koya. ¹⁷ Sa tukunia vi rau o koya, "Na cava drau sa vitalanoatakia jiko mai ina nomudrau qai jiko mai sala"? Rau sa tu vadua ka vaveveku mata. ¹⁸ Sa dua vi rau na yacana o Kaliopasa sa tukunia vua, "O iko duadua beka liga na vulagi i Jerusalemi, sa reva ni kila na vi ka sa yaco kinia ina gauna ke?" ¹⁹ Sa tarogi rau o koya, na cava gona? Rau sa tukunia vua na ka baleji Jisu na kai Nasareci, na parofita sa levu na cakacaka vinaka vata ki na vosa ina mata ni Kalou, ina matadra keceliga na tamata: ²⁰ a ra sa soli koya o ira na bete levu vata ki ira na nimamu turaga me lewai me mate, a ra sa vakojia i na kauveilatai. ²¹ Ia, kimamu sa nuitakia ni o koya liga ke na vabulai ira na Isireli: ia, ke vokiliga sa kena i ka tolu ni siga ni sa caka oji na ka ke. ²² Ia ka so voki liga na nimamu yalewa, ratou sa vakurabuitaki kimamu, ni ratou sa qai ina i bulubulu ina savulaci caca. ²³ Ni ratou sa reva ni raicia na yagona, ratou sa mai tukunia ni ratou raicia eso na agilosi sa basika mai viratou ka tukunia vi ratou, ni sa bula voki o koya. ²⁴ O iratou vokiliga ratou dau jiko vata ki kimamu ratou sa qai i nai bulubulu, ratou sa raicia ni sa va na ka ratou mai tukunia na yalewa: ni ratou sa reva ni raici koya. ²⁵ Sa tukunia vi rau o koya, Drau sa leqa ka reva ni via vabaujia na ka keceliga ra sa tukunia o ira na parofita! ²⁶ Sa reva beka ni yaga vi koya na Karisito me vosojia mada na vi ka ke ka me qai curu i na nona i ukuuku? ²⁷ Sa qai vadewatakia vi rau mai nai Vola Tabu me vatekivu mai na i vola i Mosese ka yacovi ira kece na parofita na vosa ka cavuji me baleji koya. ²⁸ Ni ratou sa voleka ina koro lailai a rau sa qai jiko kinia: a sa qai o koya me va sa via siviji rau iliu. ²⁹ Rau sa cikevia matua ka tukunia, Nu jiko liga vata ki kirau, ni sa raiyavi, sa kala na siga. Sa curu o koya me jiko vata ki rau. ³⁰ Ia ni ratou sa dabe sobu me ratou kana, sa tauria na madra o koya ka masulakia ka suvia ka solia vi rau. ³¹ Sa qai rai na matadrau, a rau sa kilai koya: sa yali vasauri o koya mai matadrau. ³² Rau sa vikayakia vairau, Sa reva beka ni katakata sara na yalodaru ni tu sa vivosaki vata mai sala, ni sa vamacalatakia vi kitaru na i Vola Tabu o koya? ³³ Rau sa qai ina raiyavi jikoliga gona, ka lesu voki i Jerusalemi, rau sa raci ira na le jinikadua ni ra sa soqoni vata mai vata ki ira ra ma dau jiko vata, ³⁴ ra sa tukunia, "Sa djina sa tucake voki na Turaga, sa rairai vi Saimoni," ³⁵ A rau sa tukunia vokiliga na ka ma yaco mai sala ka ni rau sa kilai koya vokiliga ni sa suvia jiko na madrai. ³⁶ Ni ra sa vivosaki jiko vake, sa tu sara ina kedra maliwa o Jisu ka tukunia vi ira, "Dou vacegu liga," ³⁷ a ra sa kidroa ka rere sara, ni ra sa nanumia de ra sa raicia e dua na yalo. ³⁸ Sa tukunia vi ira o koya, "Dou sa kidroa ina vuku ni cava, ka dou sa vinanuyakia i lomamudou ina vuku ni cava? ³⁹ Raicia na ligaqu vata na yavaqu, o au djina liga ke, ka raicia ni sa reva ni valewena se vasuina na yalo, me va dou sa raicia vi au. ⁴⁰ Ni sa vosa oji vake o koya, sa varaitakia vi ira na ligana vata na yavana. ⁴¹ Ni ra sa reva ni vabaujia ina vuku ni ra sa marau ka kurabui, sa tarogi ira o koya, "Sa dua na kakana sa tu vi ikodou i vanua ke se reva? ⁴² Ra sa solia vua e dua na jiki ni ika tavu ka so vokiliga na qa ni oni sa tawa. ⁴³ Sa tauria o koya, ka kana i matadra. ⁴⁴ Sa tukunia vi ira o koya, Ke na vosa au dau tukunia jiko vi ikodou, ni'u ma se jiko vata ki ikodou, ni na yaco keceliga na vosa sa tukuni au, ka sa volai ina vunau ni Mosese vata na nodra i vola na parofita vata na Same. ⁴⁵ Sa qai vararamatakia na lomadra o koya, me ra kila rawa nai Vola Tabu. ⁴⁶ Sa tukunia vi ira, Ni sa volai, ni sa yaga me vosojia vika rarawa na Karisito ka tucake voki mai na mate ina i katolu ni siga; ⁴⁷ me vunautaki vokiliga na vivutuni vata na vosoji ni valavala ca ina vuku ni yacana, vi ira na le ni vanua keceliga me vatekivu i Jerusalemi. ⁴⁸ Ia o ikodou, dou na dau tukunikatakia ina vi ka ke. ⁴⁹ Ia, raicia au sa tala vi ikodou na ka sa yalatakia o Tamaqu: ia dou jikoliga ina koro o Jerusalemi, me yaco mada vi ikodou na kaukauwa mai colo. ⁵⁰ Sa yadji ira i nai bili i Pecani, sa qai dulakia i colo na ligana ka vosa vakalougatataki ira. ⁵¹ Sa yaco ni sa vosa vakalougatataki ira jiko, sa yadji tani vi ira, sa vayadji i lomalagi. ⁵² Ra sa varokoroko vua, ka lesu voki i Jerusalemi, ka ra sa marau valevu. ⁵³ Ra sa dau jiko ina valenisoro, ra sa varokorokotakia jiko na Kalou ka vavinavinaka vua. Emeni