¹ A sa vararai wavoki o Jisu ka raici ira na vutuniyau ni ra dainia jiko na nodra i solisoli i na kato ni lavo ni valenisoro. ² A sa raicia vokiliga o koya e dua na yada sa dravudravua ni sa dainia kinia e rua na ilavo lalai sara. ³ Au sa tukunia vaidjina vi ikodou, sa levu cake sara na ka sa solia na yada dravudravua ke mai vi ira na kena vo; ⁴ ni ra sa solia na nodra ka ni loloma i na vuabale ni nodra iyau. Ia na yada ke, ni sa dravudravua sara, sa solia na vo ni nona iyau e se koto vua me bula kinia. ⁵ Sa ra vitalanoa jiko i na valenisoro me balejia na kena ukutaki tu i na vivatu totoka vata ki na vimataqali loloma ra tu kinia, sa qai tukunia, ⁶ Me balejia na vi ka dou sa raicia jiko ke, na yaco mai na gauna e na reva ni vo voki i vanua ke eso na vatu me ra vituvatuvai tu, ra na talarakia sobu kece liga. ⁷ Sa ra qai tarogi koya, ka tukunia, Vavuvuli, ena yaco ni naica na vi ka ke, ka na cava na kena i vatakilakila ni sa varau vayacori na vi ka ke? ⁸ Sa qai saumia o Jisu, dou qaraunia mo dou kua ni vacalai; ni ra na qai mai e levu ina yacaqu, ra na mai tukunia, sai au liga o koya; ka ra tukunia vokiliga, sai koya ke na kena gauna: dou kua ni muri ira. ⁹ Ni dou sa rogocia na vivaluvaluji, vata ki na jiko visei, dou kua ni reucalatakia: ni sa dodonu me yaco mai na vi ka gona; ia ena reva mada ni se yaco sara nai vataojioji. ¹⁰ Sa qai tukunia vi iratou o koya, Ra na vivaluvaluji na vivanua, vata ki na matanitu eso: ¹¹ ena yaco na uneune lelevu, vata na dausiga, vata na mate ca; i na vivanua eso, ka na rairai na vi ka vadomobula vata na vatakilakila lelevu eso mai lomalagi. ¹² Ia ni bera ni yaco na vi ka gona, ra na tauri ikodou, ka vacacani ikodou, ka soli ikodou yani ina vivalenilotu vata na vale ni vivesu, ia dou na yadji i matadra na tui vata na kovana eso ina vuku ni yacaqu. ¹³ Ia na ka ke ena yaco me nomudou i vadjinadjina. ¹⁴ O koya ke mo dou qai vataudeitakia na lomamudou, mo dou kua ni vananumakia na ka mo dou tukunia: ¹⁵ ni'u na solia vi ikodou na gusu vata na vuku ni na reva ni dua na nomudou meca ena vilejitakia rawa se vorajia. ¹⁶ Ia ra na soli ikodou yani na nomudou qase vata ki na tacimudou, vi ira na kai nomudou, ira na wekamudou; a ra na vavunia me mate eso vi ikodou. ¹⁷ Ia era na caji ikodou na tamata keceliga, ina vuku ni yacaqu. ¹⁸ Ia na reva ni rusa e dua na drau ni ulumudou. ¹⁹ Dou na maroroya na yalomudou ni dou sa dau vosojia. ²⁰ Ia ni dou sa raicia sa varau na vacibi i valu mai Jerusalemi na mataivalu eso, dou kila kinia ni sa qai voleka na kena ca sara: ²¹ me ra qai tuba i na viulunivanua o ira ra sa jiko i Jiutia; ia o ira sa jiko i loma me ra qai tani yani; me kua vokiliga ni curu mai kinia o ira sa jiko i na viyasana i vanua. ²² Ni sa gauna ni visausaumi ke, me vayacori vokiliga kinia na ka sa volai. ²³ Ka na ca vi ira sa bukete vata ki ira sa vasucu gone, i na gauna gona! ni na ca valevu sara na vanua, a ra na cudruvi valevu na tamata ke. ²⁴ A ra na vamatei i nai seleiwau, a ra na yadji vabobula i na vivanua: a ra na butuki Jerusalemi sobu o ira na vimatanitu, me yacovia nai cavacava ni nodra gauna na vimatanitu. ²⁵ A ra na qai tu nai vatakilakila eso i na matasiga vata na vula vata na vi kalokalo; a ra na ca na lewe ni vivanua i vuravura, ni ra na kidroa na kena na vadugu na wasawasa vata na biau; ²⁶ ena kani yatedra na tamata ina rere, ni ra sa warakia na vi ka sa voleka ni yaco i vuravura: ni na vitosoyaki na vi ka kaukauwa ni lomalagi. ²⁷ Ia e ra na qai raicia na Luve ni tamata ni sa qai mai i na o vata i na nona kaukauwa vata na nona i ukuuku levu. ²⁸ Ia ni sa vatekivu me yaco na vi ka ke, nu na ta cake i colo ka tu vadodonu; ni nu sa qai voleka ni vabulai. ²⁹ A sa vosakia vi ira e dua na vosa vatautauvata: ³⁰ Raicia na lolo vata na vikau keceliga; ni ra sa tubu, dou sa raicia ka kila kinia vakai ikodou ni sa voleka na vula i katakata. ³¹ Sa vavokiliga kinia o ikodou, ni dou sa raicia na kena yaco na vi ka ke, dou kila kinia sa qai voleka na matanitu ni Kalou. ³² Au sa tukunia vaidjina vi ikodou, Ena reva ni takali nai tabatamata ke ena yaco mada i liu na vi ka keceliga ke. ³³ Na seavu o lomalagi vata ki na vuravura; ia na noqu vosa na reva ni seavu. ³⁴ Ia dou qarauni ikodu vinaka, de dua na siga sa bibi kinia na yalomudou i na daukana vata na daumateni vata ki na lomaocaoca i na vi ka ni bula ke, ka yaco reucala kinia vi ikodou na siga gona. ³⁵ Ni na va liga na i cori ni sa yaco vi ira keceliga ra sa jiko i dela i vuravura taucoko. ³⁶ O koya mo dou qai vatawa, ka daumasu jikoliga, mo dou vabau kinia mo dou yaga, me bula mai na ka keceliga ke, ni na yaco mai, ka tu i na mata ni Luve ni tamata. ³⁷ A sa vatavuvuli jiko o koya ina valenisoro ni sa siga; ia ni sa bogi sa qai yani, ka moce ina ulunivanua sa vayacani i na violive. ³⁸ A ra sa qai keceliga mai vua na le levu i na valenisoro ni sa savulaci caca, me ra rogoci koya.