¹ Sa yaco ina dua na siga gona, ni sa vavulici ira jiko na tamata o koya i na vale ni soro, ka vunautakia na i tukutuku vinaka, ra sa qai mai na bete levu, vata ki ira na vunivola vata ki ira na matua; ² A ra sa tarogi koya, Tukunia mai vi kitatou, se o sa lesi mai vei mo caka na vi ka ke? se o cei sa solia vi konu na lesilesi ke? ³ Sa vosa o koya, ka tukunia vi ira, Au na tarogi ikodou vokiliga ina dua na ka; dou tukunia mai vi au: ⁴ Na papitaiso ni Joni, sa vu mai lomalagi, se vu mai vua na tamata? ⁵ A ra sa vivosakitakia vataki ira liga, ka tukunia, Ke ta na tukunia, Mai lomalagi, na qai tukunia o koya, ia dou sa reva ni vadjinati koya i na vuku ni cava? ⁶ Ke ta na tukunia, Mai na tamata; ra na vacavoki kita ina vatu konu keceliga na tamata; ni ra sa vadjinajia ni sa parofita o Joni. ⁷ Ra sa tukunia, ni ra sa reva ni tukunia rawa se sa vu mai vi. ⁸ Sa qai tukunia vi ira o Jisu, Au sa reva vokiliga ni tukunia vi ikodou se sa vu mai vi me'u caka kinia na vi ka ke. ⁹ Sa qai tukunia o koya na vosa vatautauvata ke vi ira na tamata: Sa dua na tamata sa tea e dua na vivaini, ka lisitakia vi ira eso na dau tei vaini; a sa qai i vanua tani ka jiko vadede kinia. ¹⁰ Ni sa yaco na kena gauna, sa tala o koya e dua na tamata vi ira na dau tei vaini, me ra solia vua eso na vua ni vaini: a ra sa yaviji koya o ira na i dauteivaini, ka vatala tani yani. ¹¹ Sa qai tala voki o koya e dua voki na tamata tani: sa ra yaviji koya vokiliga, ka vamaduatakia, qai vatala tani yani. ¹² Sa tala voki o koya na kena i katolu; a ra sa vamavoataki koya vokiliga, ka vatalai koya tani. ¹³ Sa qai tukunia na taukei ni teitei, Na cava me'u caka? au na tala na noqu gone ni toko: era na dokai koya beka ni ra sa raicia. ¹⁴ Sa ra qai raicia o ira nai taukei ni teitei, sa ra mani vivosaki liga vataki ira, ka tukunia, O koya ke na qai taukei ni teitei maimuri, tou vamatea, me noda kinia na vanua ke. ¹⁵ Sa ra qai biligi koya i nai bili ni teitei ka vamatea. Na cava beka na qai caka o taukei ni vaini vi ira? ¹⁶ Sa na qai mai me vamatei ira na i vatawa ni vaini qori, ka solia na ni vaini vi ira na tani. Ni ra sa rogocia, sa ra tukunia, Me kua liga. ¹⁷ Sa varaici ira o koya ka tukunia, Na cava ke sa volai, Na vatu sa ra cajia na matai ni vale, sa qai yaco me i vadei ni tutu ni vale? ¹⁸ O koya yadua sa na lutukia na vatu ke, sa na dasila kinia: o koya sa na lutukia sa na vurumemea me vaka na nuku. ¹⁹ Sa ra vatovolea o ira na bete levu vata ki ira na vunivola, me ra tauria na jiki ni siga gona, a ra rerevaki ira na tamata: ni ra sa kila sa vosataki ira o koya i na vosa vatautauvata gona. ²⁰ Sa ra qai varaici koya ka tala eso na tamata me ra mai veretakia, ka vaka me ra sa yalododonu, me ra varogocia eso na nona vosa, me ra soli koya kinia vua na kovana me lewai koya ka vavitaliataki koya. ²¹ Sa ra qai tarogi koya, ka tukunia, Vavuvuli kitou sa kila ni ikonu sa vosatakia na ka dodonu, ka vavuvulitakia jiko, sa reva ni dua o nu sa vinakajia laliga, ia o sa vavuvulitakia vaidjina nai valavala sa vinaka vua na Kalou: ²² Sa tara me da soli vacavacava vi Sisa, se reva? ²³ Sa kila na nodra i lawaki o koya, ka tukunia vi ira, ²⁴ vatakila mai vi au e dua na silini: na matai cei, vata na yaca i cei, sa volai tu kinia? Sa ra qai vosa ka tukunia, Na ni Sisa. ²⁵ Sa qai tukunia vi ira o koya, Mo nu solia vi Sisa na ka sa ni Sisa, vua na Kalou vokiliga na vi ka sa nona na Kalou. ²⁶ Sa reva ni dua na vosa ra sa tauria rawa i na matadra na tamata: a ra sa kurabui i na nona vosa, a ra sa galu liga ²⁷ Sa ra qai mai eso nai tokani i Setoki, ka ra tukunia, sa reva ni na tucake voki mai na mate o koya: sa ra qai tarogi koya, ²⁸ ka tukunia, Vavuvuli, sa vola vi kitatou o Mosese, Ke sa mate e dua na tamata vawaji qai reva na luvena, me qai vawajitakia na nona yada o tuakuana se tacina, me vakawa kinia vua na tuakana se tacina koya sa qai mate. ²⁹ Sa jiko na vitacini ratou le vitu: sa vawaji o koya sa matua, sa mate ka reva na luvena: ³⁰ rau sa qai viwajini vata ki na yada nai karua, sa mate ka reva na luvena: ³¹ rau sa qai viwajini voki vata na kena i katolu: sa vavokiliga kinia o iratou na vitu; ratou sa mate ka reva na luvedratou. ³² Sa qai mate vokiliga i muri na yalewa. ³³ Sa tucake vokiliga mai na mate, sa na waji cei o koya ke? ni ratou sa le vitu sa viwajini vata kaya. ³⁴ Sa vosa o Jisu, ka tukunia vi ira, A ra vawaji ka vimusumusuki me ra vawaji na gone ni vuravura ke; ³⁵ ia o ira ra sa vawili me ra yaga me nodra na bula gona, na tucake voki mai na mate, sa na reva na vawaji se vimusumusuki me ra vawaji: ³⁶ Sa ra na qai reva ni rawa voki ni mate ni ra sa tautauvata ki ira na agilosi: a ra sa Luve ni Kalou, ni ra sa luve ni tucake voki mai na mate. ³⁷ Ni ra na vayadji cake voki o ira na mate, sa tukunia o Mosese mai na kau ni sa vatoka na Turaga, Na Kalou i Eparaama, vata na Kalou i Aisake, vata na Kalou i Jekope. ³⁸ Ni sa reva ni nodra Kalou na mate o koya, sa nodra liga o ira sa bula jiko: ni ra sa bula keceliga vi koya. ³⁹ Sa qai vosa eso na vunivola, ka tukunia, Vavuvuli o nu sa vosa vinaka. ⁴⁰ Sa ra reva ni doudou i muri me ra tarogia e dua na ka. ⁴¹ Sa qai tarogi ira o koya, Sa tukuni vacava ni sa luvei Tevita na Karisito? ⁴² Sa kaya o Tevita i nai vola ni Same, Sa kaya o Jiova vua na noqu Turaga, Mo jiko ina ligaqu i matau, ⁴³ Me'u vamalumalumutaki ira mada na nomu mece me ra i butubutu ni yavamu. ⁴⁴ Sa vatokai koya o Tevita me Turaga, sa qai luvena vacava? ⁴⁵ Sa qai vosa o koya vi ira na nona tisaipeli, ni sa rogocia jiko o ira keceliga na tamata, ⁴⁶ Dou qarauni ikodou mai vi ira na vunivola, ra sa vinakatakia me ra qai jiko i nai sulu balavu, ka sa vinakatakia na vikidavaki i na rara ni vivoli, vata nai jikojiko ni qase i na vivalenilotu, vata nai jikojiko vaturaga i na kana vata: ⁴⁷ sa ra kovea na nodra iyau na yada, sa ra ia na masu balavu me vivakaisini; o ira ke ra na cudruvi valevu cake.