¹ A sa curu o Jisu i lomai Jeriko, ka qai sara yani. ² Ka raicia, sa dua na tamata na yacana o Sakiusa, sa turaga vi ira na kumunia nai vacavacava, ka sa vutuniyau. ³ Sa vasaga me varaici Jisu se ka vacava o koya; ia sa mama sara ina vukudra na le levu, ni sa tamata lekaleka o koya. ⁴ A sa cici i liu ka kaba ina dua na vuni lolo ka me raici koya vavinaka: ni sa voleka ni qai siviji ira o koya. ⁵ Ia ni sa yaco i na yasana gona o Jisu, sa rai i colo ka raicia ka tukunia vua, I Sakiusa, vatotolo sara, mo siro sobu mai, ni'u na jiko i na nomu vale ni kua. ⁶ Sa siro vatotolo sobu mai o koya, a sa cegu na lomana ka marau. ⁷ Ia ni ra sa raicia, ra sa vosa kudrukudru o ira kececeliga ka tukunia, Sa qai o koya me jiko vata ki na dua na tamata i valavala ca. ⁸ A sa tucake tu o Sakiusa ka tukunia vua, na Turaga, Raicia, Ikonu na Turaga , au sa waseruatakia na noqui yau ka me'u solia e dua na kenai wase vi ira na dravudravua: ia ke'u na kovea na nona ka e dua na tamata ni'u sa beitakia vailasu, na vavatakia na kenai sau au na solia. ⁹ Sa tukunia vua o Jisu, Sa yaco ni kua na bula i na vale ke, ni sa luvei Eparaama o koya vokiliga ke: ¹⁰ ni sa qai mai na Luve ni tamata me vaqara ka vabula na ka sa yali. ¹¹ Ia ni ra sa rogocia na vi ka ke, sa qai tukunia vokiliga o koya e dua na vosa vatautauvata, ni sa voleka o koya i Jerusalemi, ka ni ra sa nanumia vokiliga ni na rairai vasauri mai na matanitu ni Kalou. ¹² Koya gona sa tukunia kinia o koya, Sa dua na turaga sa qai ina dua na vanua yawa, me buli me tui, me qai lesu voki mai. ¹³ Sa kacivi ira na nona tamata e le jini ka solia vi ira e jini na paudji, ka tukunia vi ira, dou vivolivoli jiko ka yacovia na noqu lesu mai. ¹⁴ Ia o ira na nona le ni koro ra sa caji koya, ra sa tala na mata me muri koya yani me tukunia, Kitatou sa reva ni vinakajia me lewai kitatou o koya ke. ¹⁵ Ia ni sa lesu voki o koya, ni sa buli me tui, sa tukunia me ra kacivi mai vua o ira na tamata ke, o ira ka ma solia vi ira o koya nai lavo, me kila ra yavica voki ra sa rawa ni ra sa vivoli. ¹⁶ Sa qai mai o koya ma liu ka tukunia, Ikonu na Turaga, sa jini voki na paudji sa rawa ina nomunu paodji e dua. ¹⁷ A sa tukunia vua o koya, E vinaka, na tamata vinaka; ni ko sa djina i na ka lailai sara, mo lewa na koro e jini, ¹⁸ Sa qai mai nai kenai karua ka tukunia, Ikonu na Turaga, sa lima voki na paudji sa rawa i na nomunu paudji e dua. ¹⁹ A sa tukunia vokiliga vua o koya, o iko vokiliga mo lewa na koro e lima,. ²⁰ A sa qai mai e dua voki ka tukunia, Ikonu na Turaga, raicia na nomunu paudji, au sa maroroya ina dua na i tavoi, ²¹ ni'u ma rerevaki ikonu, ni konu sa tamata mama: O sa tauria i colo na ka o sa reva ni dainia sobu, ka taucia na ka o sa reva ni kaburakia: ²² Sa tukunia vua na nona turaga, Au na lewai ikonu ina nomu vosa, ni ko sa tamata cala! o sa kila ni'u sa tamata mama, o sa tauria i colo na ka o sa reva ni dainia sobu ka taucia na ka o sa reva ni kaburakia, ²³ ia ka cava o sa reva ni dainia kinia na noqui lavo ina baqe, me'u tarogia voki na kena i kere ni'u sa qai voki mai? ²⁴ Sa qai tukunia o koya vi ira sa tu voleka kinia, Yadjia tani mai vua na paudji, ka solia vua vi koya sa jini na nona paudji. ²⁵ A ra sa tukunia vua, Na Turaga, sa tu mada vua e jini na paudji. ²⁶ Au sa tukunia vi ikodou, O koya yadua sa tu vua na ka, ena soli vua; ia o koya sa reva ni tu vua e dua na ka, ena yadji tani mai vua na ka sa tu vua. ²⁷ Ia o ira na noqu meca ke, ra sa reva ni vinakatakia me'u lewai ira, yadji ira mai vanua ke, ka vamatei ira i mataqu. ²⁸ Ia ni sa vosa oti va ke o koya, sa qai vaka iliu, sa qai sara yani i Jerusalemi. ³⁰ Sa yaco ni sa voleka o koya i Pecifaki i Pecani i na ulunivanua sa vayacani i na violive, sa tala e le rua na nona tisaipeli, ²⁹ ka tukunia , Drau qai i na koro lailai sa donui ikodrau, ia ni drau sa curu kinia, drau ra raicia e dua na luve ni asa sa davo tu, sa reva ni vodokia tu e dua na tamata; drau serekia, ka yadjia mai: ³¹ Ia ke sa tarogi ikodrau e dua, Drau sa serekia i na vuku ni cava? drau tukunia va ke, Ni sa yaga vua na Turaga. ³² A rau sa qai o rau sa talai, a rau sa raicia me vaka na ka sa tukunia vi rau o koya. ³³ Ia ni rau sa serekia jiko na luve ni asa, sa tarogi rau o iratou na kenai taukei, Cava drau sa serekia kinia na asa? ³⁴ A rau sa tukunia, Sa yaga vua na Turaga. ³⁵ A rau sa yadjia vi Jisu, ka rau tevukia na nodrau i sulu i na tovuni luve ni asa ka vavodoki Jisu kinia. ³⁶ Ia ni sa vodo jiko yani o koya, ra sa qai tevukia na nodra i sulu i gaunisala o ira na tamata. ³⁷ Ni sa voleka yani i Jerusalemi, ka yacovia yani na sala sa sirovia sobu o koya na ulunivanua ni violive, sa ra tekivu marau o ira na tisaipeli keceliga vata ki ira na le levu, me ra marau, ka vacaucautakia na Kalou i na domo levu, i na vuku ni cakacaka mana keceliga sa ra raicia oji. ³⁸ Sa ra tukunia, Sa kalougata na Kalou na Tui sa qai mai i na Yaca ni Turaga! sa yaco na jiko sautu mai lomalagi vata na varokoroko i na yasana i colo sara. ³⁹ Sa so na Farisi ka ra jiko i na kedra malima na le levu, sa ra tukunia vua, Vavuvuli, vasalataki ira mada na nomunu tisaipeli. ⁴⁰ Sa qai saumia o koya ka tukunia, Au sa tukunia vi ikodou, Ke ra na jiko lo o ira ke, ra na qoqolou mai na vivatu ke. ⁴¹ Ni sa toso voleka sara yani o koya, ka raicia na koro, sa qai tagicakia. ⁴² ka tukunia, "Isa, ke o kila, o ikonu, ina nomu gauna ke, na vi ka na vavunia na nomu vacegu! Ia ke sa ra vunitakia i matamunu. ⁴³ Ni na yaco mai vi iko na siga, ra na viribaiji iko kinia o ira na nomu meca, ra na wavokiji iko ka sogolaji iko i na viyasana keceliga, ⁴⁴ ka na valolovirataki iko sobu, vata ki ira na luvemu ra jiko vi iko, ka ra na reva ni vo vi iko na vivatu sa vitaqataqai; ni o sa reva ni kila na gauna o sa mai qaivi kinia." ⁴⁵ Sa qai curu i na valenisoro o Jisu ka vatekivu me vatovoci ira tani na vivoli tu kinia, ⁴⁶ sa tukunia vi ira o koya, Sa volai, Sa vale ni masu na noqu vale: ia dou sa caka me nodra qara na daubutako? ⁴⁷ Sa vivatavulici jiko o Jisu i na valenisoro i na visiga. A ra sa qai saga jiko o ira na bete levu vata ki ira na na vunivola vata ki ira na turaga me ra vamatea, ⁴⁸ a ra sa reva ni raicia rawa e dua na ka me ra vayacoya kinia; ni ra sa vinakatakia na le levu me ra varorogo vua.