¹ A ra sa qai mai vi koya na daukumuni vacavacava, vata ki ira na tamata i valavala ca, me ra varorogo vi koya. ² A ra sa vosa kudrukudru o ira na Farisi vata ki ira na vunivola, a ra sa tukunia, O koya ke sa dau vilasamaki vata ki ira na tamata i valavala ca, ka kana vata ki ira. ³ Sa tukunia vi ira o koya e dua na vosa vatautauvata ke, ⁴ O cei vi ikodou na tamata, ke sa dua na drau na nona sipi, ke sa vayalia e dua vi ira, na reva beka ni daini ira tu mai na ciwasagavulu ka ciwa i vico, ka qai voki me varaicia na sipi ka yali, me varaicia mada? ⁵ Ia ni sa raicia voki, sa cavotakia i tovuna, ka marautakia. ⁶ Ia ni sa lesu voki i nona vale, sa kacivi ira keceliga na wekana vata ki ira na lewe ni nona koro, ka tukunia vi ira, Tu mai marautakia na noqu sipi, ka ma yali sa laurai voki. ⁷ Au sa tukunia vi ikodou, ni sa levu vakinia na marau mai lomalagi ke le dua liga na tamata i valavala ca e vivutuni, ia ka lailai liga vi ira na ciwasagavulu ka ciwa na tamata yalododonu, sa reva ni yaga vi ira na vivutuni. ⁸ Se ko cei na yalewa sa jini na nona jiki ni siliva, ke sa vayalia e dua liga na jikina, ena reva beka ni tutuvakia na cina, ka tavirakia na vale ka vaqara matua me raicia voki mada? ⁹ Na gauna sa raicia kinia o koya, sa kacivi ira na wekana, vata ki ira na lewe ni koro ka tukunia, Da mai marau vata, ni'u sa raicia voki na tjikina koya ma yali. ¹⁰ Au sa tukunia vi ikodou, Sa tubu valevu na marau vi ira na agilosi ni Kalou, i na vuku la liga ni dua na tamata i valavala ca sa qai vivutuni. ¹¹ Sa tukunia voki o koya, E dua na tamata sa le rua na luvena tagane: ¹² a sa tukunia vi tamana o koya gone vi rau, I Tamaqu solia mai vi au nai votavota ni iyau sa vota me noqu. Sa qai vota vi rau nai yau. ¹³ Sa oji e vica na bogi, sa qai soqonia vata na nona ka keceliga na gone, sa qai tani sara i na dua na vanua vayawa, a sa vayalia kece kinia na nonai yau ina i valavala vamarau ca. ¹⁴ Ni sa vaojia kece, sa qai tubu na dausiga levu i na vanua gona, sa qai yacovi koya na dravudravua. ¹⁵ Ni sa qai jiko vata ki na dua na lewe ni vanua gona, sa qai vatalai koya yani i nona i teitei: me vakani ira na vuaka, ¹⁶ A sa garovia na qana ra dau kania na vuaka, me kuva kinia na ketena; ni sa reva ni dua e vakani koya. ¹⁷ Na gauna sa kilai yalona voki mai kinia, sa tukunia, Sa le levu na tamata ni Tamaqu, sa voli na nodra cakacaka, ra sa kuva tu i na madrai ka vo voki tu yani, ia o au sa mate i na viakana! ¹⁸ au na dainia na vanua ke, ka qai vi Tamaqu, au na qai tukunia vua, Tamaqu, au sa i valavala ca i lomalagi, vi Ikonu vokiliga, ¹⁹ au sa reva kinia ni yaga me'u vatokai voki me'u luvemunu, lesi au liga me va e dua na nomunu tamata sa voli na nona cakacaka. ²⁰ Sa ia ka qai vi tamana. Ni sa raicia o tamana ni se qai vayawa tu mai, sa lomania, sa cici, ka mokojia, ka regucia. ²¹ Sa tukunia na luvena vi koya, I Tamaqu, au sa i valavala ca i lomalagi, vi ikonu vokiliga, au sa reva voki ni yaga me'u vatokai me'u luvemunu. ²² Sa tukunia o tamana vi ira na nona tamata, dou yadjia mai nai sulu vinaka sara, ka vasulumi koya; daramakia vokiliga e dua na mama i ligana, nai vava vokiliga i na yavana; ²³ Dou yadjia mai na luve ni bulumakau sa uro, ka vamatea; me kitatou kana ka marau; ²⁴ ni sa mate na luvequ ke sa qai bula voki, sa yali sa qai laurai voki. Sa qai tekivu me ra marau. ²⁵ Sa jiko mai nai teitei na luvena o koya ka matua vi rau, ia ni sa lesu voki mai ka toso voleka i vale, sa rogocia na domo ni bitu ni vatagi vata ki na meke. ²⁶ Sa kacivia e dua vi ira na tamata ka tarogia vua nai balebale ni ka ke. ²⁷ Sa tukunia vua o koya, Na tacimu sa lesu voki mai, sa motukia o tamamu na bulumakau sa uro ni rau sa virai voki, ka sa bula vinaka. ²⁸ Sa cudru o koya ka sece ni via curu i loma; sa qai mai i tuba o tamana ka vamasuji koya. ²⁹ Sa qai vosa o koya ka tukunia vi tamana, Raicia sa dede na yabaki noqu qaravi ikonu tu kinia, au reva ni baki talaimama i na nomunu vosa: o reva madaliga ni baki solia vi au e dua na luve ni me, me kimamu marau vata ki ira na wekaqu: ³⁰ ia ni sa qai liga mai na luvemu ke, o koya ma vaojia na nomui yau vi ira na yalewa dautagane, o vamatea na kena luve ni bulumakau sa uro. ³¹ Sa tukunia vua o koya, Na luvequ, daru jiko vataliga vadua, na ka keceliga sa tu ke sa nomu. ³² Sa dodonu liga me da reki ka marau; ni sa mate na tacimu ke, sa qai bula voki; sa ma yali sa qai laurai voki,