¹ O koya ke, au sa vamasuji ikodou kinia o au sa vesu tu i na vuku ni Turaga, mo dou caka jiko nai valavala sa kilikili vata nai tutu dou sa kacivi kinia. ² Au sa vamasuji ikodou mo dou yalomalumalumu sara ka yalomalua, mo dou vosojia vadede ka vivosoji vaikodou i na loloma. ³ Mo dou gumatua sara, mo dou maroroya na lomavata ni Yalo Tabu ni dou sa vauci vata i na vivinakaji. ⁴ Sa dua vata nai soqosoqo lotu kece, ka duabau liga na Yalo Tabu, me va dou sa kacivi i nai nuinui e duabau liga ni dou ma kacivi. ⁵ Ia sa duabau liga na Turaga, sa duabau liga na vabaujia, sa duabau liga na papitaiso, ⁶ ka duabau liga na Kalou, na Tamadra na tamata keceliga, o koya sa lewai ira keceliga vata ki ira keceliga. ⁷ Ia sa soli vi kita yadua na loloma me va nai varau ni solisoli ni Karisito. ⁸ O koya gona sa tukunia kinia o koya: "Ni sa qai i colo o koya, sa vabobulataki ira na le levu me ra bobula, sa solia nai solisoli eso vi ira na tamata." ⁹ Na cava nai balebale ni "a sa qai cake," vavo liga ni sa qai sobu vokiliga iliu o koya i na viyasa i vuravura ira? ¹⁰ O koya liga sa qai sobu mai sai koya vokiliga ka qai i colo me yawakalila kece mai lomalagi, me vasinaijia kinia na ka keceliga. ¹¹ Ia sai Karisito sa solia eso me ra apositolo, ka so me ra parofita, ka so me ra tamata dauvunau liga, ka so me rai vatawa kai vavuvuli ¹² me ra vavinakataki kinia o ira sa lotu, me caka na cakacaka ni talatala, me vatataki cake nai vavakoso ni Karisito, ¹³ me da yaco sara o kita keceliga me da lomavata i na vabaujia ka kila sara na Luve ni Kalou, me da tautauvata ki nai varau ni tamata djina ra sa sinai sara vi Karisito. ¹⁴ Sa tarai kita cake na Karisito me da kua voki ni qai gone ka ra sa yadji lesu ka qai yani i na ua, ka viyadjiyaki i na cagi keceliga ni vavuvuli vata na lawaki ca ni tamata i na dauvivaqaseni sa nakijia kinia na vivacalai. ¹⁵ Ia me da caka na ka djina i na loloma, me da tubu cake vi koya i na ka keceliga vi koya, na uluda, na Karisito. ¹⁶ O koya sa sema vata mai vua na yago taucoko, ka vauci vata ina vuku ni kena yaga nai sema yadua, me caka na ka sa caka sara na jikina keceliga ni sa dui vaitavi, sa vatuburi cake i na yago tabu ni sa vatataki cake vata ki koya i na loloma. ¹⁷ O koya ke, au sa vosa kinia ka varojia matua i na vuku ni Turaga, mo dou kua ni valavala jiko me vataki ira na vimatanitu tani, i na lomadra lialia. ¹⁸ Ni sa vabutobutotaki na lomadra, ra sa reva ni viriti ki na bula sa mai vua na Kalou, i na vuku ni lialia sa tu i na yalodra ka ni sa kaukauwa na lomadra. ¹⁹ Ia ni ra sa reva ni madua rawa ra sa soli ira i na cakacaka vasisilia, me ra caka na ka keceliga sa reva ni savasava ni ra sa daugarovia. ²⁰ Ia e reva ni va kena nomu vulicia na vika me baleji Karisito. ²¹ Au sa nanumia ni o sa rogocia na vika me baleji koya, ka o sa vavulici kinia vua, me va sa tu vi Jisu na ka djina. ²² O vavulici mo dainia tani na nomu varau ni bula makawa, me yadji tani kinia na tamata makawa. Na tamata makawa sa ca na nonai varau balejia ni sa tu vua na gagadre ca sa vivakaisini. ²³ Ko ikodou sa vavulici mo dou vavoui mai na yalomudou vata na lomamudou, ²⁴ ka mo dou vaicurucuru i na tamata vou o koya sa caka va na Kalou - i na yalododonu vata na yalosavasava djina. ²⁵ O koya liga ke ni dou sa dainia tani kinia na seni, me vosa djina na tamata yadua vua na kai nona, ni da sa jikina vataki kita. ²⁶ Ni dou sa cudru kua ni dou valavala ca kinia. Me kua ni dromu na matanisiga ni dou sa cudru jiko. ²⁷ Kua vokiliga ni vararawataki ikodou vua na tevoro. ²⁸ Me kua ni butako jiko o koya sa daubutako. Ia me daucakacaka liga ka caka i ligana na ka sa yaga, me so kinia na ka e nona me soli vi koya sa dravudravua. ²⁹ Me kua ni qai mai na gusumudou e dua na vosa velavela. O koya liga sa vinaka me caka kinia na vivakatataki, me va sa raujia, me yaco kinia na vinaka vi ira ra sa rogocia. ³⁰ Ia dou kua ni vararawatakia na Yalo Tabu, o koya dou sa dregaji kinia me yaco mada na siga ni bula. ³¹ Me dai tani kece vi ikodou na yaloca, na cudrucudru, na daunene, na dauviba vata na vosavacaca, vata na vika ca keceliga sa salavata. ³² Ia dou vilomani vataki ikodou, dou lomavinaka, douu vivosoji vataki ikodou, me va sa vosoji ikodou na Kalou i na vuku i Karisito.