¹ Ia keva dou sa vaturi cake vata ki Karisito, mo dou vaqara na vika mai colo, sa jiko kinia na Karisito ina liga i matau ni Kalou. ² Dou daunanumia na vika mai colo, kakua liga na vika e vuravura. ³ Ni dou sa mate liga, ia na nomudou bula sa vuni vata ki Karisito i na Kalou. ⁴ Ni na rairai mai na Karisito, sa noda vu-ni-bula, dou na qai rairai vata kaya enai ukuuku. ⁵ O koya mo dou qai vamatea na vijikimudou vavuravura, a dauyalewa, nai valavala reva ni savasava, na garogaro ca, na dodomo ca, ki na kocokoco, o koya na dauqaravia na kalou lasu: ⁶ ni sa vika ke sa yaco kinia na cudru ni Kalou vi ira era sa dautalaidredre: ⁷ ia oi ikodou vokiliga, dou a caka eliu nai valavala vakinia, ni dou a bula voki vakinia. ⁸ Ia ke, mo dou dainia na ka keceliga ke, a daucudru, na daulesa, na lomaca, na vosa ca, na vosa dukadukali mai na gusumudou. ⁹ Kakua ni dauvilasuyaki, ni dou sa dania tu na tamata makawa vata ki na nonai valavala; ¹⁰ ka dou sa daramakia na ka vou, o koya sa vavoui jiko ina vuku me va na yaloyalona ka buli koya: ¹¹ sa reva kinia ni nanumia se kai Jutia se kai tani, se cili se reva ni cili, na reva ni vuku, na kai lekutu, na bobula, nai taukei: ia sa uasivi sara ina ka keceliga na Karisito. ¹² O koya mo dou qai vaisulu me va dou sa nona djigitaki na Kalou, oi ikodou sa yalosavasava ka daulomani, ena yalo dauloloma, ena yalovinaka, ena yalomalumalumu, ena yalomalua, ena dauvosotia vadede: ¹³ dou vivosoji vai ikodou, ka kakua ni vicudruvi, kevaka sa dua na ka sa rarawa kinia e dua: me va sa reva ni cudruvi ikodou na Karisito, mo dou va vokiliga kinia. ¹⁴ Ia me liu ena ka keceliga ki na dauloloma, o koya sai vau vinaka sara. ¹⁵ Ia me lewa sara ena lomamudou na vacegu i Karisito, ni dou sa kacivi ki na ka ke, ni dou sa yago e dua bau liga: ia mo dou caka jiko na vavinavinaka. ¹⁶ Me jiko valevu ina lomamudou na vosa i Karisito ina vuku keceliga; dou vivatavulici ka vivunauci vai ikodou ina same vata ki na sere vata ki na meke vayalo, dou sere jiko vua na Kalou ni sa jiko ena yalomudou na loloma. ¹⁷ Ia na ka keceliga dou sa caka, se dou vosa se dou cakacaka, me caka kece ena yaca ni Turaga o Jisu, o koya dou sa caka jiko kinia na vavinavinaka vua na Kalou na Tamada. ¹⁸ Oi ikodou na yalewa vawaji, mo dou talairawarawa vi ira na wajimudou, me va sa dodonu vua na Turaga. ¹⁹ Oi ikodou vokiliga na tagane vawaji, mo dou lomani ira na wajimudou, ka kakua ni yaloca vi ira. ²⁰ Oi ikodou vokiliga na gone, mo dou talairawarawa vi ira na nomudou matua ena ka keceliga: ni sa vinaka sara ke vua na Turaga. ²¹ Oi ikodou na matua, mo dou kakua ni vacudrui ira na luvemudou, de ra datuvu kinia. ²² Oi ikodou na tamata, mo dou talairawarawa vi ira na nomudou turaga vayago ina ka keceliga; kakua ni caka la liga ina matanavotu, me vinakaji ikodou kinia o ira na tamata; dou caka liga ena loma djina, ni dou sa rerevakia na Kalou: ²³ caka na ka keceliga dou sa caka, caka mai na vu ni yalomudou me va vua na Turaga, me kakua ni va vi ira la liga na tamata; ²⁴ ni dou sa kila dou na rawatia mai vua na Turaga nai votavota me kenai sau: dou sa qaravia na Turaga o Karisito. ²⁵ Ia o koya sa caka ca ena rawajia na kenai sau ni ca sa caka; ka sa reva ni vinakajia vailoa e dua na tamata.