¹ Oi Ikodou na turaga, dou solia vi ira na tamata na ka e dodonu ka tautauvata; ni dou sa kila sa dua vokiliga na nomudou Turaga mai lomalagi. ² Mo dou daumasu jikoliga, ka cikevakia jiko ka vavinavinaka; ³ ka masulaki kitou vokiliga, me dola vi kitou na Kalou na sala ni vosa, me kitou tukunia na ka vuni ki Karisito, o koya kau sa vesu tu kinia: ⁴ meu varaitakia ke, me va sa kilikili ki au meu tukunia. ⁵ Dou caka jiko nai valavala vuku vi ira i taudaku, ka volia me nomudou na gauna. ⁶ Me caka jikoliga na nomudou vosa ina yalovinaka, ka vakokonatakia ina masima, mo dou kila kinia se cava sa dodonu mo dou tukunia voki vi ira na tamata yadua. ⁷ Ena tukunia vi ikodou na ka keceliga sa yacovi au o Tikiko, a wekaqu kau sa lomania, ki nai talatala yalodina, ki na noqu i tokani ina Turaga: ⁸ ia au sa talai koya vi ikodou ina vuku ni ka ke, mo dou kila na nitou jiko, ka me vaceguya na yalomudou o koya; ⁹ oi rau vata ki Onesimo, na wekaqu sa yalodina au sa lomania, o koya sa dua vi ikodou. Erau na vatakila vi ikodou na ka keceliga sa caka eke. ¹⁰ Sa loloma yani vi ikodou o Arisitako kirau sa vesuki vata kaya, vata ki Marika na luve ni gane i Panapasa, (o koya dou sa varoji oji kinia: keva sa qai vi ikodou, dou vacegui koya;) ¹¹ vata ki Jisu, a yacana vokiliga o Jusito, eratou sa cili. O iratou liga ke eratou sa daucakacaka vata ki au ina ka ni matanitu ni Kalou, a ratou sa dauvacegui au. ¹² Sa loloma yani vi ikodou o Epafira, sa dua vi ikodou, ai talatala i Karisito Jisu, sa daugumatua jikoliga ni sa masulaki ikodou, mo dou tu dei ka vinaka sara ka vasinaiji tu ina ka keceliga sa loma ni Kalou. ¹³ Niu sa vadinadina vua, ni sa lomakatakata sara ina vukumudou, ina vukudra vokiliga mai Leotisea, vata ki na vukudra mai Aiarapoli. ¹⁴ Sa loloma yani vi ikodou o Luke, na vuniwai lomani, ki Timasa. ¹⁵ Au sa loloma yani vi ira na viwekani mai Leotisea, vi Nimifa vokiliga, vi ira vokiliga nai soqosoqo lewe ni lotu mai nona vale. ¹⁶ Ia ni sa wili oji nai vola ke vi ikodou, dou lewa me wili vokiliga vi ira nai soqosoqo lewe ni lotu mai Leotisea; mo dou wilikia vokiliga nai vola vi ira vata ki Leotisea. ¹⁷ Tukunia vokiliga vi Akipo, Mo varaicia na cakacaka o sa rawajia mai vua na Turaga, mo vayacoria sara. ¹⁸ Au sa loloma voki yani ka vola ina ligaqu djina, oi au o Paula. Dou nanumi au niu sa vesu jiko. Me nomudou na loloma. Emeni.