¹ Niu sa vinakajia mo dou kila na levu ni noqu lomaocaoca ina vukumudou, ina vukudra vokiliga mai Leotisea, ki na vukudra keceliga era a reva ni raici au vayago; ² me vacegui na yalodra, me ra vaduavatataki ina loloma, me nodra nai yau keceliga ni vuku era na kila dina sara kinia na ka vuni ni Kalou, io na Karisito: ³ o koya sa bini tu vua nai yau keceliga ni vuku ki na yalomatua. ⁴ Ia na ka ke kau sa tukunia, de dua e temaki ikodou ena vosa vicavilaki. ⁵ E dina liga kau sa jiko tani vayago, ia kau sa jiko vayalo liga vi ikodou, ka reki ka raici ikodou ni dou sa dua vata ka tu dei ina vabauti Karisito. ⁶ Ia ni dou sa vabauji Karisito Jisu na Turaga, mo dou caka jiko nai valavala sa vinaka vua: ⁷ dou tauyavutaki ka tara cake vua, ka vataudeitaki ena nomudou vabaujia, me va dou sa vatavulici, mo dou vinaka cake kinia ka vavinavinaka. ⁸ Dou raicia vinaka de dua sa vacacani ikodou ena vuku vavuravura sa reva ni yaga ka lasu vokiliga, e va nai tukuni vatamata, e va nai vavuvuli vavuravura, ka sa reva ni va nai vavuvuli i Karisito. ⁹ Ni sa jiko ina yagona na ka keceliga sa sinai kinia na Kalou. ¹⁰ Ia dou sa vutu ni ka keceliga vi koya; a sa liutaki ira keceliga era sa liu ki ira sa kaukauwa o koya: ¹¹ ia dou sa cilivi vokiliga vua ena vicili sa reva ni caka ena liga, ni dou sa luvajia nai valavala ca ni yago ina vicili sa caka ina vuku i Karisito, ¹² ni dou a bulu vata kaya ina papitaiso: o koya vokiliga dou sa tu cake voki kaya ni dou sa vabaujia na kaukauwa ni Kalou, o koya sa vaturi koya cake voki mai na mate. ¹³ Ia oi ikodou, ni dou a mate tu enai valavala ca, ina vuku vokiliga ni yagomudou sa reva ni cili, sa qai vabulai ikodou vata kaya o koya, ni sa reva ni cudruvi kita ina vuku ni nodai valavala ca; ¹⁴ ni sa qusia nai vola liga ni vivaro sa beitaki kita, sa noda meca jiko, ka sa yadia tani sara, ni sa vakojia ki na kauveilatai; ¹⁵ ia ni sa vacacani ira sa liu ki ira sa kaukauwa, sa vasesevotuni ira, ni sa rawai ira sara ina ka ke. ¹⁶ O koya gona me kakua ni lewai ikodou kinia e dua ina vuku ni kakana, se na ka-ni-gunu, se na siga ni so levu, se na vula vou, se na siga tabu: ¹⁷ gona liga nai vatakarakara ni vika me yaco mai emuri; ia sa nei Karisito na yago. ¹⁸ Me kakua ni tarovi ikodou e dua mai na ikodoui sau, ni sa viavia yalomalumalumu ka daumasu vi ira na agilose, ni sa doudou ena vika sa raicia o koya, a sa dokai koya ena vuku ni yalona sa valewe, ¹⁹ a sa reva ni tauria matua na Uluda, o koya sa dautokoni kinia na yago taucoko, a sa vikabiji vata, ena vuku ni visema ki na viwa, a sa tubu ni sa vatubuya na Kalou. ²⁰ Ia kevaka dou sa mate vata ki Karisito mai nai vavuvuli vavuravura, a cava dou sa muria kinia na vivaro me va dou sa bula vavuravura jiko, ²¹ Kakua ni tara; kakua ni tovolea; kakua ni qumia; ²² Gona keceliga ena oji, ni sa tauria jiko; ni ra sa va na vunau vata nai vavuvuli ni tamata? ²³ Ia e dina liga sa rairai me vuku na vika ke, ena viaviamasu vata na yalomalumalumu vata na vararawatakia na yago; ka reva ni yaga, sa vamamautaki liga kinia na yago.