¹ Ia ni rau sa vosa jiko vi ira na tamata, sa qai mai vi rau o ira na bete vata ki ira na turaga ni vale ni soro vata ki ira nai tokani ni Setoki. ² Ni ra sa cudruvi rau o Pita vata ki Joni ni sa vavulici ira na tamata ka vunautakia na tu cake voki mai na mate i na vuku i Jisu. ³ Ra sa tauri rau ka daini rau i na vale ni vivesu me savulaci mada ka ni se qai raiyavi na vanua. ⁴ Ia ka le levu ra sa rogocia na vunau ra sa vabaujia, ia na kedrai wiliwili na tagane sa le lima beka na udolu. ⁵ Ia ni sa savulaci ra sa soqoni vata mai Jerusalemi o ira na nodra turaga, vata ki ira na matua, vata ki ira na vunivola. ⁶ O Anasa na bete levu sa jiko kinia vata ki Kaiafa, vata ki Joni, vata ki Alekisada, vata ki ira keceliga na mataqali ni bete levu. ⁷ Ia ni ra sa vaturi rau i na kedra maliwa, ra sa tarogia, "Na kaukauwa cava se na yaca i cei, drau sa caka kinia na ka ke?" ⁸ Sa qai sinai o Pita i na Yalo Tabu, sa tukunia vi ira, "Ikonu na nodra turaga na tamata vata na nodra matua na Isireli, ⁹ ke kirau sa tarogi i na siga ni kua i na cakacaka vinaka vua na tamata lokiloki, se cava sa qai bula kinia, ¹⁰ mo dou kila keceliga vata ki ira keceliga na Isireli ni sa yaca i Jisu Karisito na kai Nasareci, o koya ikodou ma vakojia i na kauveilatai, sa vaturi cake na Kalou mai na mate i na vukuna liga sa tu kinia ke o koya ke i na matamudou ka sa bula vinaka. ¹¹ O koya na vatu ikodou ma cajia sara ikodou na matai ni vale, koya sa yaco me kenai vadei ni yavu i na tutu vale. ¹² Sa reva na bula i na vukuna e dua tani, ni sa reva sara ni dua voki na yaca i na ruku i lomalagi sa soli vi ira na tamata me da bula rawa kinia. ¹³ Ia ni ra sa raicia na nodrau doudou o Pita vata ki Joni ni rau sa kila vokiliga ni rau sa reva so ni vuku, se tamata vuli, ra sa kurabui kinia, ra sa qai nanumia ni ratou ma dau jiko vata ki Jisu. ¹⁴ Ia ni ra sa raici ira na tamata ni ra sa vabulai, ni sa wiri tu vata ki rau, ra sa reva ni tukunia rawa e dua ka me baleji erau. ¹⁵ Ia ni ra sa vatalai rau me rau qai tani i na vale ni bose, ra sa qai bose vataki ira. ¹⁶ Ara sa tukunia, "Na cava me da vayacoya vi rau na tamata ke? Ni ra sa kila o ira keceliga sa jiko i Jerusalemi, ni sa dua na cakacaka-mana rogo rau sa caka, ia da sa reva ni rawa ni vajijiqatakia rawa. ¹⁷ Ia de tukuni valevu vi ira na tamata, me da tukunia liga ka me rau cudruvi sara ke rau vavuvuli voki vua e dua na tamata i na yaca ke." ¹⁸ A ra sa kacivi rau ka varojia vi rau me rau kua sara ni vosa se vatavuvuli i na yaca i Jisu. ¹⁹ Sa qai vosa o Pita vata ki Joni ka tukunia vi ira, "Mo dou lewa liga se sa dodonu se reva i na mata ni Kalou me kirau varorogo vi ikodou, ka kua vua na Kalou. ²⁰ Ni sa mama vi kirau me kirau kua ni tukunia na vika kirau sa raicia ka rogocia." ²¹ Ia ni ra sa reva ni raicia e dua na ka me rau cudruvi kinia, ra sa vosavacudrucudruya voki vi irau, a rau sa qai sere me rau qai, O ira na tamata ni ra sa varokorokotakia na Kalou o ira keceliga i na vuku ni ka sa qai caka. ²² Ni sa vasagavulu vacaca na nona yabaki o koya na tamata sa caka vua na cakacaka-mana ke ka bula kinia. ²³ Ia ni rau sa sereki o Pita vata ki Joni, rau sa qai vi ira na nodrau i tokani ka tukunia na ka keceliga ra ma vosatakia vi rau o ira na bete levu vata ki ira na matua. ²⁴ Ia ni ra sa rogocia, ra sa lomavata ka tabalakia icolo na domodra vua na Kalou ka tukunia, "Ikonu na Turaga, Ikonu na Kalou, ko nu ma bulia na lomalagi vata na vuravura, vata ki na waitui, vata ki na ka kecelilga sa tu kinia. ²⁵ I na gusui Tevita na nomudou tamata, ni sa tukunia, 'Sa daucudru na vimatanitu i na vuku ni cava, a ra sa vananumakia na ka wale o ira na le ni vivanua? ²⁶ Ra sa tuva i valu na tui i vuravura, ra sa soqoni vata na turaga me ra vivala ki Jiova vata ki na nona Karisito.' ²⁷ Ni sa djina ra sa soqoni vata i na koro ke me ra vivala vata na Luvemuni yalosavasava o Jisu, o koya dou ma lumujia, o rau o Erotii vata ki Ponitio Pailato vata ki ira na vimatanitu vata ki ira na Isireli. ²⁸ Me ra vayacoya keceliga na ka ikodou ma lesia iliu me caka me va na nomudou kaukauwa vata ki na nomudou i naki. ²⁹ Ia ke, Ikonu na Turaga, mo dou raicia na nodra vosa vacudrucudruya ka solia vi ira na nomudou i talatala me ra doudou valevu ni tukunia na nomudou vosa. ³⁰ Ni ikodou sa dodokia jiko na ligamudou me ia na vivabulai me caka vokiliga nai vatakilakila eso vata na ka e vivakurabuitaki i na yaca ni Luvemunu yalosavasava o Jisu." ³¹ Ia ni ra sa masu oji, sa vayavalaji na vale ra sa soqoni vata kinia, a ra sa dui vasinaiji keceliga i na Yalo Tabu ka ra sa doudou kinia ni ra tukunia na vosa ni Kalou. ³² Ia o ira na le levu ra sa vabaujia ra sa lomavata ka yalovata. Sa reva ni dua e tukunia me nona duadualiga na ka sa tu vua, a ra sa taukenia vata na nonai yau yadua. ³³ Sa levu na nodra kaukauwa nai apositolo ni ra sa tukunia sa tucake voki mai na mate na Turaga o Jisu, sa vinakaji valevu o ira keceliga. ³⁴ Ni sa reva e dua vi ira sa dravudravua, o ira keceliga sa taukenia na vanua se na vivale ra sa volitakia ka ra sa yadjia nai voli ni ka era volitakia, ³⁵ ra sa taucia i na yavadra nai apositolo, sa votai vi ira keceliga me vaka na nodra dui dravudravua. ³⁶ O Josese vokiliga, o koya ra sa vatoka o ira nai avositolo me o Panapasa, (kenai balebale, Na gone ni Vacegu,) na luvei Livai, na kai Kipiro, ³⁷ o koya sa taukenia e dua na jiki ni vanua sa volitakia ka yadjia na kenai sau, ka taucia i na yavadra nai apositolo.