¹ Ia a rau sa qai vata o Pita vata ki Joni i na vale ni soro i na auwa sa daucaka kinia na masumasu, i na kenai kaciwa. ² Sa dua na tamata sa lokiloki mai na kete i jinana sa colaji jiko, sa vadavori i na visiga i na mata ni darava ni vale ni soro sa vatokai o Lagilagi. Me kere ka-ni-loloma vi ira sa curu i na vale ni soro. ³ O koya ni sa raici Pita vata ki Joni ni rau sa voleka ni curu i na vale ni soro, sa kerekere me dua na nona ka-ni-loloma. ⁴ A rau sa varaici koya o Pita vata ki Joni, ka tukunia, "Raici kirau mai." ⁵ Sa varaici rau o koya, ni sa nanumia ni na rawa mai vi rau e dua na ka. ⁶ Sa qai tukunia o Pita, "Na siliva vata na koula e reva ni tu vi au, ia na ka liga sa tu vi au kau na solia vi iko. I na yaca i Jisu Karisito na kai Nasareci mo tu cake ka qai." ⁷ Sa qai tauria na ligana i matau, sa tuberia icolo sa qai vakaukauwataki sara na yavana vata na nona qurulasawa. ⁸ Sa qai rika icolo o koya, ka wiri tu ka qai wavoki; sa curu vata ki rau i na vale ni soro, sa qai ka rika ka varokorokotakia na Kalou. ⁹ Sa raici koya o ira na tamata keceliga ni sa qai wavoki ka varokorokotakia na Kalou. ¹⁰ A ra sa kila ni sai koya ma dau jiko i na mata ni darava mai Lagilagi, mai na vale ni soro; me kere ka ni loloma ka ra sa kurabui sara i na vuku ni ka sa qai yaco vua. ¹¹ Ia ni sa tauri Pita vata ki Joni na tamata lokiloki sa qai vabulai, ra sa cici vata o ira keceliga na tamata vi ratou i na varada sa vatokai Na ni Solomoni, a ra sa kurabui valevu. ¹² Ia ni sa raicia o Pita sa tukunia vi ira na tamata, "Ikodou na tamata na Isireli, dou sa kurabui i na ka ke i na vuku ni cava? Se cava dou sa varaici kirau matua kinia, me va sa nirau kaukauwa se yalododonu, kirau sa vayacoya kinia vi koya ke me qai rawa? ¹³ Na Kalou ni Eparaama, ni Aisakei, ni Jekope, na nodra Kalou na noda matua, sa varokorokotakia na Luvena o Jisu. O koya dou ma solia yani ka cakitakia i na mata i Pailato, ni sa lewa o koya me serekia. ¹⁴ Ia dou ma cakitaki koya na Yalosavasava, ka masujia me soli vi ikodou e dua na daulaba. ¹⁵ Dou ma vamatea na Vu-ni-bula, o koya sa vaturi voki mai na mate na Kalou - ia kitou sai vadjinadjina i na ka ke. ¹⁶ Ia na yacana, i na vuku ni sa vabauji na yacana, sa vakaukauwataki kinia o koya ke, o koya dou sa raicia ka kila. Ni dou sa vabauji koya, sa soli vua na bula vinaka sara, i na matamudou keceliga. ¹⁷ Ia ke, ikodou na viwekani, au sa kila ni dou ma caka ni dou sa reva ni kila, me vataki ira vokiliga na nomudou turaga. ¹⁸ Ia na vika ke sa vatakila iliu na Kalou i na gusudra keceliga na nona parofita, ni na mate na nona Karisito, sa qai vayacoya vakinia o koya. ¹⁹ O koya mo dou qai vivutuni ka saumaki mai, ²⁰ me bokoci kinia na nomudou i valavala ca ka me yaco kinia na gauna ni vacegu mai na mata ni Turaga; ka talai o Karisito o koya sa djigitaki vi ikodou, o Jisu. ²¹ O koya e dodonu me jiko mada liga mai lomalagi me yaco mada na gauna e na caka voki me vinaka kinia na ka keceliga, ka vosa kinia na Kalou i na gusudra kece na nona parofita yalosavasava i na gauna makawa. ²² Ni sa djina sa tukunia o Mosese, 'Na vatubuya cake vi ikodou o Jiova na nomudou Kalou mai vi ira na wekamudou, e dua na parofita me vataki au. O koya dou na rogocia na ka keceliga na vosatakia vi ikodou. ²³ Ia na yaco na tamata yadua sa na reva ni rogocia na parofita gona, ena varusai tani mai vi ira na tamata.' ²⁴ Ia o ira vokiliga na parofita keceliga sa kenai vatekivu o Samuela vata ki ira vokiliga sa ra taravia, o ira keceliga ra sa vosa, ra sa ma tukunia oji jiko mai na gauna ke. ²⁵ Ikodou sa luvedra na parofita vata ki na vosa ni viyalayalaji ka caka na Kalou vi ira na noda matua, ni sa tukunia vi Eparaama, 'Na kalogata na vimataqali keceliga i vuravura i na vuku ni nomu kawa.' ²⁶ Sa tala na Luvena o Jisu na Kalou, ka liu vi ikodou, ni sa vaturia cake me vakalougatataki ikodou ni sa saumaki ikodou yadua mai na nomudou i valavala ca."