¹ Ia ni sa yaco sara na siga ni Penitiko, ra sa jiko lomavata o ira keceliga i na dua na vanua. ² Sa qai vasauri mai lomalagi e dua na rorogo, sa va na cagi vacevaruru kaukauwa, sa vasinaijia na vale taucoko ra sa jiko kinia. ³ Sa rairai vi ira na ka e va na viyameyame ni bukawaqa sa dui vibaleyaki, sa jiko yadua vi ira vayadualiga. ⁴ A ra sa vasinaiji keceliga i na Yalo Tabu ka ra sa vatekivu me ra vosatakia na vosa tani eso, me va sa solia vi ira na Yalo Tabu me ra cavujia. ⁵ Sa jiko mai Jerusalemi eso na kai Jutia, ra sa tamata lotu, mai na vivanua keceliga i ruku i lomalagi. ⁶ Ia ni sa rogovaki yani na ka ke, ra sa soqoni vata na le levu ka ra sa kurabui ni ra sa dui rogoci ira na tamata yadua ni ra sa vosatakia na nona vosa. ⁷ A ra sa reucala keceliga ka kurabui; ka vitukutukunitakia vataki ira , "Raicia, ra sa reva beka ni kai Kalili o ira keceliga ke ra sa vosa?" ⁸ Ia ka vacava ke ni da sa rogocia o kita keceliga, na noda vosa da ma sucu kaya? ⁹ O ira na kai Paricia, vata ki Mitia, ki Ilama, vata ki ira sa jiko mai Mesopotemia, ki Jutia, ki Kapatosia, mai Ponita, vata ki Esia, ¹⁰ mai Firijia, ki Pamifilia, mai IIjipita, ki na yasayasa va-Lipea ka voleka i Kirini, vata ki ira na vulagi mai Roma, o ira na kai Jutia, vata ki ira sa vuki i na lotu va-Jiu, ¹¹ o ira na kai Kiriti vata ki Arepea, da sa rogoci ira ni ra sa tukunia i na noda vosa na nona cakacaka e vivakurabuitaki na Kalou. ¹² A ra sa kurabui keceliga ka taqaya; ka ra sa vitukutukunitakia vataki ira, "Na cava nai balebale ni ka ke?" ¹³ Sa valialiai ira eso tani ka tukunia, "Ira sa mateni i na waini vou." ¹⁴ Sa qai tu cake o Pita vata ki ira na le jinikadua, ka sa tabalakia cake na domona, ka tukunia vi ira, "Ikodou na kai Jutia, vata ki ikodou keceliga sa jiko i Jerusalemi, mo dou kila na ka ke; ka rogocia na noqu vosa. ¹⁵ Ni ra sa reva ni mateni o ira ke me va na ka dou sa nanumia, ni sa qai kenai katolu liga ni auwa. ¹⁶ Ia sai koya liga ke na ka ma tukunia na parofita o Joeli: ¹⁷ 'Ni na yaco i na gauna mai muri,' Sa tukunia na Kalou, 'Au na sovarakia na Yaloqu vi ira na tamata keceliga. Ra na parofisai kinia, o ira na nomudou gonetagane vata ki ira na nomudou goneyalewa, ia ra na raicia na raivotu eso o ira na nomudou cauravou ka ra na tadra na tadra eso o ira na nomudou matua. ¹⁹ Io vi ira vokiliga na noqu tamata vata ki ira na noqu vada au na sovarakia na Yaloqu i na gauna gona, ra na parofisai kinia. ¹⁸ Ia au na vatakila na ka e vivareucalataki eso mai lomalagi icolo, vata nai vatakilakila eso i vuravura ira, na dra vata na bukawaqa vata na o kubou. ²⁰ Ka na vuki na mata-ni-siga me butobuto vata na vula me dra ka na qai yaco imuri na siga i Jiova, sa levu ka rogo jiko. ²¹ Ia na yaco o koya yadua na masujia na yaca i Jiova na bula. ²² Ikodou na tamata na Isireli, rogocia na vosa ke: o Jisu na kai Nasareci na tamata sa vadjinadjinatakia vi ikodou na Kalou i na cakacaka mana vata na ka e vivakurabuitaki eso vata nai vatakilakila eso sa solia na Kalou vi koya me caka i na kemudou maliwa, me va dou sa kila. ²³ O koya ni sa soli oji yani vi ikodou me va ka sa nakijia na Kalou ka lewa iliu; dou sa tauria ka vakojia i na kauveilatai ka vamatea i na ligadra na tamata ca. ²⁴ Ia o koya sa vaturia cake na Kalou, ni sa serekia nai vau ni mate, ni sa reva ni rawa me vauci jikoliga kinia o koya. ²⁵ Ni sa vosa me baleji koya o Tevita, ka kaya, 'Au ma raici Jiova jikoliga ni sa tu i mataqu, ni sa tu o koya i na ligaqu i matau me'u reva kinia ni yavalaji. ²⁶ O koya sa marau kinia na yaloqu, sa marau kinia na yamequ. Ena vacegu vokiliga na lewequ i nai nuinui. ²⁷ Ni konu na reva ni dainia na yaloqu mai etesi, se dainia na nomu Le dua yalosavasava me vuca mai.

²⁸ Konu sa vatakila mai vi au na sala ni bula; konu na vasinaiji au i na marau mai na matamunu.' ²⁹ Ikodou na viwekani, dou vosojia me'u doudou ni'u sa tukuni Tevita na matua vi ikodou, ni sa mate o koya ka bulu ka sa tu liga vi kita na nonai bulubulu ka yacovia na siga ke. ³⁰ Ia ni sa parofita o koya, sa kila ni sa bubului vua na Kalou, ni na tubu mai vua o ira na vatubuya mai kinia o koya na Karisito, me va na lewena me jiko i na nonai jikojiko vaturaga. ³¹ Ia ni sa kila iliu sa tukunia na nona tu cake voki mai na mate na Karisito, ni na reva ni dai tu mai etesi, se na vuca mai na lewena. ³² O Jisu ke - sa vaturia cake na Kalou, ka sai vadjinadjina ni ka ke o kitou keceliga. ³³ Ia ni sa yadji icolo i na liga i matau ni Kalou, ka rawa o koya mai vi Tamana na Yalo Tabu ka yalatakia, sa qai sovarakia mai na ka ke mo dou sa qai raicia ka rogocia. ³⁴ Ni sa reva ni qai cake i lomalagi o Tevita, ia sa tukunia o koya, 'Sa tukunia o Jiova vua na noqu Turaga, "Mo jikoliga i na ligaqu i matau, ³⁵ me'u vamalumalumutaki ira mada na nomu meca mei tutu-ni-yavamu.'" ³⁶ O koya ke, me qai kila sara kinia na mataqali taucoko ni Isireli ni o Jisu ke o koya dou ma vakojia i na kauveilatai, sa lesia na Kalou me Turaga ka Karisito vokiliga. ³⁷ Ia ni ra sa rogocia, sa laucoka na yalodra, a ra sa tukunia vi Pita vata ki ira nai apositolo sa vo, "Ikodou na viwekani, na cava me kimamu caka?" ³⁸ Sa qai tukunia vi ira o Pita, "Dou vivutuni ka papitaisotaki ikodou yadua i na yaca i Jisu Karisito ka me bokoci kinia na nomudou i valavala ca, ka dou na rawa na Yalo Tabu mei solisoli. ³⁹ Ni sa caka vi ikodou na vosa ni yalayala vata vi ira vokiliga na nomudou gone vata ki ira keceliga ra sa tu vayawa, vata ki ira keceliga sa kacivi ira vua na Turaga na noda Kalou." ⁴⁰ Ia sa levu voki na vosa sa tukunia o koya ka varojia ka tukunia, "Dou vabulai ikodou mai nai tabatamata takelo ke." ⁴¹ Ia o ira sa vabaujia na nona vosa, ra sa papitaisotaki ka sa kenai kuri vi ira sa lotu i na siga gona e le tolu beka na udolu na tamata. ⁴² A ra sa qaravia matua na nodrai vavuvuli nai apositolo ka ra vilomani i na dovi madrai vata ki na masumasu. ⁴³ Sa kani ira keceliga na rere, sa levu na ka e vivakurabuitaki vata nai vatakilakila ra sa caka o ira nai apositolo. ⁴⁴ Ia o ira keceliga sa vabaujia ra sa jiko vata, a ra sa dui solia na nodrai yau yadua me ra taukenia vata, ⁴⁵ a ra sa volitakia na nodra vanua vata na nodrai yau, a ra sa vota vi ira keceliga me vaka na nodra dui dravudravua. ⁴⁶ A ra sa gumatua sara i na qai i na vale ni soro i na visiga. A ra sa lomavata, a ra sa dovi madrai i na vivale, a ra sa kania na kedra i na marau vata ki na yalo djina, ⁴⁷ ni ra sa vavinavinaka jiko vua na Kalou, a sa vinakaji ira o ira na tamata keceliga, ia na Turaga sa vaikuritakia vi ira nai soqosoqo le ni lotu i na visiga na tamata ra sa vabulai jiko.