¹ Sa dua na tamata o Ananaiasa na yacana, vata ki Safaira na wajina, sa volitakia e dua na nona jiki ni vanua, ² sa vunia eso na kenai sau (sa kila vokiliga na wajina), sa yadjia eso ka taucia i na yavadra nai apositolo. ³ Sa tukunia o Pita, "Ananaiasa, e vacava ni sa vasinaijia na yalomu o Setani mo seni kinia vua na Yalo Tabu ka mo vunia eso nai sau ni nomu qele. ⁴ Ni sa tu liga iliu, sa reva beka ni ma nomu liga, ia ni sa volitaki oji, o sa reva beka ni lewa liga o iko? E vacava ni ko sa vananumakia kinia na ka ke i na lomamu? O sa reva ni seni vi ira na tamata, o sa seni liga vua na Kalou." ⁵ Ia ni sa rogocia na vosa ke, sa bale sobu o Ananaiasa ka ciba, a ra sa rava valevu kinia o ira keceliga sa rogocia na ka ke. ⁶ Sa tucake o ira na cauravou ka ologii koya, ka cola i tuba ka bulujia. ⁷ Ia ni sa oji e tolu beka na auwa, sa qai curu mai na wajina, sa reva ni kila na ka sa yaco. ⁸ Sa tukunia vua o Pita, "Tukunia mai vi au se drau sa volitakia na qele i nai lavo va gona" Sa tukunia o koya, "io, e va liga gona." ⁹ Sa qai tukunia vua o Pita, "E vacava ni drau sa lomavata mo drau vatovolea vaca na Yalo ni Turaga? Raicia, sa tu i darava na yavadratou o ratou sa bulujia na wajimu, ratou na colaji iko vokiliga i tuba." ¹⁰ Sa qai bale sobu sara i yavana o koya ka ciba. Ratou sa cola yani ka bulujia vata ki na wajina. ¹¹ A ra sa rava valevu kinia o ira kece nai soqosoqo le ni lotu vata ki ira keceliga ra sa rogocia na vika ke. ¹² Sa caka nai vatakilakila vata na ka e vivakurabuitaki e levu i na ligadra nai apositolo vi ira na tamata, A ra sa jiko lomavata keceliga i na varada ni Solomoni. ¹³ Sa reva ni dua vi ira sa vosa doudou me to vata ki ira; sa varokorokotaki ira o ira na tamata. ¹⁴ Sa vaikuritaki valevu vua na Turaga na tamata eso ra vabaujia, ra le levu na tagane vata na yalewa vokiliga, ¹⁵ ra sa yadji ira kinia ka ra sa tauvi-mate i na vitolo-ni-sala ka sa vadavoya i nai davodavo lelevu vata nai mocemoce lalai, me varurugia eso vi ira na yaloyalo i Pita ni sa qai yani kinia. ¹⁶ Ara sa le levu vokiliga sa qai mai na vikoro sa vavolivoliji Jerusalemi, ra sa yadjia mai eso sa tauvi-mate vata ki ira sa vararawataki ira na yalo velavela eso, ra sa vabulai keceliga. ¹⁷ Sa qai tucake na bete levu vata ki ira keceliga ra sa daujiko vata ki koya (o ira nai tokani i Setoki); ¹⁸ a ra sa sinai i na cudru ka ra sa tauri ratou nai avositolo, ka daini ratou i na vale ni vivesu. ¹⁹ Ia ni sa qai bogi sa dola na darava ni vale ni vivesu e dua na agilosi ni Turaga ka yadji ratou mai kinia, ka tukunia, ²⁰ "Dou qai ka tu i na vale ni soro ka tukunia vi ira na tamata na vosa keceliga ni bula ke." ²¹ Ia ni ratou sa rogocia, ratou sa curu i na vale ni soro ni sa savulaci caca ka vatavuvuli. Sa qai mai na bete levu vata ki ira sa dau jiko vata ki koya, a ra sa vasoqoni ira vata na matavilewai, vata ki ira keceliga na nodra matua na luve i Isireli, ra sa tala eso i na vale ni vivesu me yadji ratou mai. ²² A ratou sa yaco na ovisa ka ratou sa reva ni raici ratou i na vale ni vivesu, ka ratou sa lesu voki ka tukunia, ²³ "Kitou sa raicia djina ni sa sogo vakaukauwa tu na vale ni vivesu ka ra sa tu vokiliga nai vatawa i na mata ni darava i tuba, ia ni kitou sa dola, sa reva ni dua kitou sa raicia i loma." ²⁴ Ia ni ra sa rogocia na vika gona na turaga ni vale ni soro vata ki ira na bete turaga, ra sa kidroa kinia se na tubu beka me vacava na ka ke. ²⁵ Sa qai mai e dua ka tukunia vi ira, "Raicia, o ratou na tamata dou ma dainia i na vale ni vivesu ratou sa tu i na vale n i soro ka vatavulici ira na tamata." ²⁶ Sa qai na turaga vata ki ratou na ovisa ka yadji ratou mai, ia ratou sa reva ni caka vakaukauwa ni ratou sa rerevaki ira na tamata, de ra vavocaki iratou i na vatu. ²⁷ Ia ni ratou sa yadji ratou mai, ratou sa vaturia i na matadra na matavilewai. Sa tarogi ratou na bete levu, ²⁸ ka tukunia, "Kitou ma reva beka ni varojia matua vi ikodou mo dou kua ni vatavuvuli i na yaca ke? Ia ka raicia dou sa vasinaiji Jerusalemi i na nomudou i vavuvuli ka dou sa nakijia vokiliga me kitou tarogi i na dra ni tamata ke." ²⁹ Sa qai vosa o Pita vata ki ratou nai apsitolo, ka tukunia, "Sa kilikili ki kitou me kitou talairawarawa vua na Kalou ka me kua liga vi ira na tamata. ³⁰ Na nodra Kalou na noda matua sa vaturi Jisu voki mai, koya dou ma vamatea ni dou ma valiligia i na dua na kau.

³¹ O koya sa vaceceretakia na Kalou i na ligana i matau me Turaga kai Vabula, me solia kinia na vivutuni vi ira na Isireli vata na vabokoci ni valavala ca. ³² Kitou sa yaco vokiliga me i vadjinadjina i na vika ke, ka sa vakinia na Yalo Tabu, o koya sa solia na Kalou vi ira sa talairawarawa vua." ³³ Ia ni ra sa rogocia ra sa cudru valevu ka ra sa bose me ra vamatei iratou. ³⁴ Sa qai tucake i na kedra maliwa na matavilewai e dua na Farisi o Kamelieli na yacana, sa vu-ni-vunau ka sa rogorogo vinaka vi ira na tamata keceliga; ka tukunia me yadji vamalua i tuba o ratou na apositolo. ³⁵ Sa qai tukunia vi ira, "Ikodou na tamata ni Isireli, dou lewai ikodou vinaka i na vuku ni ka dou sa nanumia mo dou vayacoya vi ratou na tamata ke. ³⁶ Ni sa tubu cake iliu o Cuta, sa dautukutukuni koya ma ra qai to vata ki ira na tamata eso, ra sa wili vata ra sa le va beka na drau. Sa qai vamatei koya ke vata ki ira keceliga ra sa talairawarawa vua ka ra sa vasesei ka oji yani. ³⁷ Sa oji ke sa qai tubu cake o Jutasa na kai Kalili i na gauna sa volai kinia na tamata ka ra sa le levu sa yadjia tani o koya me ra muri koya. Sa rusa vokiliga o koya ke, vata ki ira keceliga ra sa talairawarawa vua ra sa vasesei. ³⁸ Ia ke, au sa tukunia vi ikodou, Dou kua soji ni vacalai ratou na tamata ke, dou daini ratou jiko, ia ke ka va tamata nai naki ke se na cakacaka ke, ena varusai liga. ³⁹ ia ke ka mai vua na Kalou, dou na reva ni varusa rawa; de dou na raicia beka ni dou sa vivala vata ki na Kalou." ⁴⁰ Ra sa qai yalovata ka tukunia ia ni ra sa kacivi ratou nai apositolo ka kanakuitataki ratou, ra sa varojia matua vi ratou me ratou kua sara ni vosa i na yaca i Jisu, a ra sa qai sereki ratou me ratou qai. ⁴¹ Ia ni ratou sa qai tani i matadra na matavilewai ka ratou sa marau ni ratou sa yaga me ratou vacacani i na vuku ni yacana. ⁴² Ia i na visiga keceliga, i na vale ni soro vata i na vivale keceliga, ra sa reva ni cegu na vatavuvuli ka vunautaki Jisu ni sa koya na Karisito.