¹ "Ikodou na viwekani vata ki ikodou na matua, dou varorogo mai niu sa tukuni au vi ikodou." ² Ia ni ra sa rogocia sa vosa o koya vi ira i na vosa va-Iperiu, ra sa jiko lo sara. Sa tukunia o koya, ³ "O au djina na Jiu, au ma sucu mai Tarisu mai Sisilia, ia au ma susugi i na koro ke ka sa vatavulici au vadodonu o Kamalieli me va na nodra vunau na matua. Ia au ma gumatua i na vuku ni Kalou, me vataki ikodou keceliga i na siga ni kua. ⁴ Ia au ma vacacani ira na Lotu vake me ra mate, ia au ma vesuki ira ka daini ira i vale ni vivesu eso na tagane vata eso na yalewa, ⁵ sa noqui vadjinadjina na bete levu vata ki ira keceliga na matua. Au ma tauria na nodrai vola vi ira na viwekani ka qai i Tamasiko, meu yadji ira ra sa jiko kinia i Jerusalemi ni ra sa vesuki,me ra cudruvi. ⁶ Sa yaco niu sa qai yani ka volekaji Tamasiko, ni sa siga levu tutu, sa dua na rarama levu sa cila vasauri mai lomalagi ka vavolivoliji au. ⁷ Au sa bale sobu i na qele ka rogocia e dua na vosa sa tukunia vi au, 'I Saula, I Saula, o sa vacacani au i na vuku ni cava?' ⁸ Au sa qai tarogia, 'O cei beka o Ikonu, Turaga?' Sa tukunia vi au o koya, 'Oi au o Jisu na kai Nasareci, o koya o sa vacacania.' ⁹ A ra sa raicia djina na rarama o ira sa qai vata ki au, a ra sa reva ni rogocia na vosa ni koya sa vosa mai vi au. ¹⁰ Au sa qai tarogia, 'Na cava meu vayacoya, noqu Turaga?' Sa tukunia mai vi au na Turaga, 'Cavu tu, ka qai i Tamasiko. Ia ena tukuni kinia vi iko na ka keceliga sa lesi vi iko mo vayacoya.' ¹¹ Ia niu sa reva ni rai rawa i na vuku ni kena remoremo na rarama gona, ra sa tuberi au o ira sa qai vata ki au, au sa yaco kinia i Tamasiko. ¹² Sa dua na tamata o Ananaiasa na yacana, sa tamata lotu djina me va na vunau vata sa rogo vinaka vi ira keceliga na Jiu ra sa jiko mai kiinia. ¹³ Sa qai mai vi au, sa tu ka tukuni vi au, 'Na wekaqu Saula, mo rai vinaka.' Ia i na jiki ni siga gona, au sa raici koya. ¹⁴ Sa tukunia o koya, 'Sa djigitaki iko na nodra Kalou na noda matua, mo kila na lomana, ka raici Koya na Yalododonu, ka rogocia na vosa ni gusuna.' ¹⁵ Ni ko na dautukuni koya vi ira na tamata keceliga i na ka o sa raicia ka rogocia. ¹⁶ O sa qai vaberabera voki i na vuku ni cava? Tucake, mo papitaisotaki, ka savajia tani na nomui valavala ca, ni o sa masujia na yaca ni Turaga.' ¹⁷ Ni oji na noqu lesu voki mai Jerusalemi, niu sa masu jiko i na vale ni soro, au sa raicia na raivotu. ¹⁸ Au sa raici koya ni sa tukunia vi au, 'Kusa mo qai tani vatotolo i Jerusalemi, ni ra sa reva ni vabaujia na nomui tukutuku baleji au.' ¹⁹ Au sa qai tukunia, 'Ikonu na Turaga, ra sa kila niu ma daini ira i na vale ni vivesu ra sa vabauji ikonu ka vakanakuitaki ira i na vale ni lotu keceliga. ²⁰ Ni sa vadavei na dra ni Sitiveni o koya ma dautukuni ikonu, au ma tu voleka vokiliga kinia, ka vinakatakia na nona mate, ka maroroya na nodrai curucuru ra sa vamatea.' ²¹ Sa qai tukunia vi au o koya, 'Qai tani yani, niu na talai iko vayawa vi ira na kai vimatanitu tani.'" ²² Ra sa qai rogoci koya ka yacovia mada na vosa ke. A ra sa qai tabalakia icolo na domodra ka tukunia, "Me yadji tani i vuravura na tamata sa vake, ni sa reva ni dodonu me bula." ²³ Ni ra sa qoqolou, ka vidaiyakia na nodrai curucuru, ka viritakia na kuvu ni qele i na cagi, ²⁴ sa tukunia na turaga levu ni valu me ra yadji koya i na bure ni valu. Sa tukunia me tarogi ni sa vakanakuitataki, me kila o koya se cava ra sa qolouvaki koya kinia va gona. ²⁵ Ni ra sa vesukia jiko na wa, sa tarogia o Paula vua na turaga sa tu kinia, "E tara beka vi ikodou mo dou vakanakuitatakia na kai Roma, ni se bera mada ni vilewai?" ²⁶ Ni sa rogocia na turaga gona, sa qai tukunia vua na turaga levu ni valu ka tukunia, "Mo lewai iko vinaka i na ka o na varau vayacoya? Ni sa kai Roma na tamata ke." ²⁷ Sa qai mai na turaga levu ni valu ka tukunia vua, "Tukunia mai vi au, se o sa kai Roma se reva?" Sa tukunia o koya, "Io." ²⁸ Sa qai tukunia na turaga levu ni valu, "Sa ka levu nai lavo au sa volia kinia meu lewe ni vanua gona. Sa tukunia o Paula, "Au sa sucu mai kinia." ²⁹ Ara sa qai tani sara o ira sa lesi me ra tarogi koya. Sa rava vokiliga na turaga levu ni valu ni sa kila ni kai Roma o koya, i na vuku ni nona vesuki koya. ³⁰ Ia i na savulaci, ni sa via kila o koya na kena djina ni ka ra sa beitaki koya kinia o ira na Jiu. Sa serekia na kenai vesu ka tukunia vi ira na bete levu vata kina nodra matavilewai keceliga me ra qai mai. Sa qai yadji Paula sobu ka vaturia i matadra.