¹ Ni kitou sa daini ira ka kitou sa varewa ka mua yani vadodonu i Kosa, i na siga taravia i Roti, ia mai vaka i na koro o Patara. ² Ni kitou sa raicia e dua na waqa sa soko yani i Finiasi, kitou sa vodokia ka soko yani. ³ Ni kitou sa raici Kipiro, kitou sa soko balejia na yasa i mawi ni waqa, ka kitou sa soko i Siria ka kele yani i Taia, ni sa sobu kinia nai usana ni waqa. ⁴ Ia ni kitou sa raici ira sa lotu, kitou sa jiko kinia me vitu na siga. Ni sa vavuna na Yalo Tabu, ra sa tukunia vi Paula me kua ni qai voki o koya i Jerusalemi. ⁵ Ni kitou sa vaojia na visiga kinia, kitou sa qai cavu tu ka qai yani, sa vitalatala vi kitou o ira keceliga vata ki ira na wajidra vata ki ira na luvedra. Kitou sa yaco mada i nai bili ni koro, kitou sa qai tekiduru i matasawa, ka masu, ⁶ ia kitou sa vitataunaki vataki kitou. Kitou sa vodo i waqa, a ra sa suka voki i nodra vivale. ⁷ Ni kitou sa soko mai Taia, kitou sa yaco i Toleme. Sa kitou vikidavaki vata ki ira na viwekani ka jiko vata ki ira me dua na siga. ⁸ I na siga taravia kitou sa qai vata ki Paula ka yaco i Sisaria. Kitou sa curu i na vale ni Filipi, nai vavuvuli, o koya sa dua vi ira na le vitu, ka kitou sa jiko vata ki koya. ⁹ Sa le va na luvena goneyalewa, ratou sa dauparofisai. ¹⁰ Ia ni kitou sa jiko me vica na bogi mai kinia, sa qai sobu mai Jutia e dua na parofita o Akapo na yacana. ¹¹ Nii sa curu mai vi kitou o koya, sa tauria nai beleji ni Paula. Sa vesukia na ligana vata na yavana ka tukunia, "Sa vake na vosa ni Yalo Tabu, 'Ara na vesukia vake na kai Jutia mai Jerusalemi nai taukei ni beleji, a ra na solia i na ligadra ra sa reva ni lotu.'" ¹² Ni kitou sa rogocia na vika ke, o kitou vata ki ira vokiliga nai taukei, kitou ma vamasuji koya me kua ni qai cake i Jerusalemi. ¹³ Sa qai tukunia o Paula, "Na cava dou sa vayacoya, ni dou sa tagi ka vamosia na lomaqu? Niu sa reva ni varau meu vesu laliga, meu mate vokiliga mai Jerusalemi i na vuku ni yaca ni Turaga o Jisu. ¹⁴ Ia ni sece ni varogocia o koya, kitou sa galu liga ka tukunia, "Me yaco liga na nona lewa na Turaga." ¹⁵ Ia ni sa oji na visiga gona, kitou sa vasosolo na nitou i yaya ka qai cake i Jerusalemi. ¹⁶ Eso vokiliga ra sa lotu mai Sisaria, ra sa qai vata ki kitou. A ra sa yadjia e dua sa lotu makawa o Nasoni, na kai Kipiro, me kitou moce i nona vale. ¹⁷ Ni kitou sa yaco i Jerusalemi, ra sa vacegui kitou i ina reki o ira na viwekani. ¹⁸ Ni siga taravia sa qai vata ki kitou o Paula vata ki Jemesa, a ra sa jiko kinia o ira keceliga na matua. ¹⁹ Ni sa vikidavaki vata ki ira o koya, ra sa qai tukunia yadudua na vika sa caka na Kalou i na kedra maliwa na vimatanitu i na nona vunau jiko. ²⁰ Ni ra sa rogocia, ra sa vavinavinaka vua na Kalou, ra sa tukunia vua, "Ikodou na wekai kitou, o sa raicia, ra sa le vica na udolu na Jiu ra sa vabaujia. A ra sa gumatua keceliga me ra muria na vunau. ²¹ Ia ka so sa tukuni iko vi ira, ni o sa vavulici ira keceliga na Jiu, ra sa jiko i na kedra maliwa na kai vimatanitu tani, ka me ra daini Mosese, ni o sa tukunia me ra kua ni cilivi ira na gone, se muria nai valavala makawa. ²² Na cava beka me da caka? Ni ra na rogocia djina ni o sa yaco mai. ²³ O koya mo dou qai vayacoya na ka ke kitou sa tukunia vi iko. E le va na tamata sa jiko vata ki kitou, ratou sa bubului. ²⁴ Mo yadji ratou ka vasavasavataki iko vata ki iratou, ka volia na nodratou i madrali, me ratou tasia na uludratou. Me ra kila keceliga kinia ni sa reva ni djina ka keceliga o sa tukuni kinia vi ira. A ra na vulicia vokiliga ni o sa muria vokiliga na vunau i na nomui valavala. ²⁵ Ia i na vukudra na kai vimatanitu tani ra sa vabaujia, da sa vola oji kinia ka lewa, me ra maroroi ira liga mai na ka sa cabo ina vimatakau, mai na dra vokiliga, vata na ka sa kuna, vata na daudara." ²⁶ Sa qai yadji ratou na tamata o Paula, ia ni sa vasavasavataki koya vata ki iratou i na savulaci. Sa curu i na vale ni soro, me tukunia na siga ena oji kinia na vasavasavataki ka me cabori nai madrali i na vukudratou yadua. ²⁷ Ni sa varau oji na vitu na siga, ni ra sa raici koya i na vale ni soro o ira na Jiu mai Esia, ra sa vauqeji ira na tamata keceliga ka tauri koya. ²⁸ A ra sa qoqolou, "Ikodou na Isireli, dou vivuke mai. O koya ke na tamata sa dauvavulici ira na tamata kece, i na vivanua keceliga, me ra caji ira na kai noda vata na vunau, i vanua ke. Sa yadjia vokiliga eso ra sa kai matanitu tani i na vale ni soro, ka sa vadukadukalitakia na jikina tabu ke." ²⁹ Ni ra ma raicia iliu ni ra ma jiko vata i na koro o Timofilo na kai Efeso, a ra sa nanumakia sa yadji o Paula i na vale ni soro. ³⁰ A ra sa mawe keceliga na le ni koro, a ra sa cici vata o ira na tamata ka tauri Paula. A ra sa yaratakia mai na vale ni soro, i tuba ka sogojia sara na darava. ³¹ Ia ni ra sa saga me ra vamatei koya, sa yaco vua na turaga levu ni mata sojia nai tukutuku, ni sa mawe o Jerusalemi taucoko. ³² Sa yadjia sara o koya eso na sojia vata so na turaga lalai, ka cici sobu vi ira. Ia ni ra sa raicia na turaga levu vata ki ira na sojia, ra sa cegu na vaculaki Paula. ³³ Sa qai toso voleka na turaga levu ka tauri koya, sa tukunia me vesu i na sinucodo. Sa tarogia se o cei o koya vata ka cava vokiliga sa vayacoya. ³⁴ A ra sa dui kacivakia na ka tani o ira na le levu. Ia ni sa reva ni kila o koya na kena djina i na vuku ni mawe, sa qai tukunia me yadji o Paula i na bure ni valu. ³⁵ Ia ni sa yaco o koya i nai kabakaba, sa yaco ni ra sa vibiliyaki koya o ira na sojia balejia na nodrai valavala kaukauwa na le levu. ³⁶ Ni sa le levu na tamata ra sa muria, ka qolouvakia, "Yadji koya tani!" ³⁷ Ni sa tuberi jiko o Paula i na bure ni valu, sa tukunia o koya vua na turaga ni valu, "E tara meu vosa mada vi ikodou?" Sa qai tukunia o koya, "O sa kila na vosa va-Kirisi? ³⁸ O sa reva beka ni o koya na kai Ijipita o koya ka vere i na gauna sa oji ka yadji ira i vikau e le va na udolu na Daulaba?" ³⁹ Sa qai tukunia o Paula, "O au na Jiu, na kai Tarisu mai Sisilia. Sa reva ni koro kaisi na noqu koro. Ia au sa masuji ikodou mo dou daini au mada meu vosa vi ira na tamata." ⁴⁰ Ia ni sa vatara o koya, sa tucake o Paula i nai kabakaba ka vatabataba vi ira na tamata. Ia ni ra sa jiko lo sara, sa vosa vi ira o koya i na vosa va-Iperiu. Sa tukunia,