¹ Ia ni sa oji na mawe, sa kacivi ira ra sa lotu vata o Paula, sa tatau ka qai tani yani vake i Masitonia. ² Ni sa qai vi ira oji na vivanua ke o koya, ka vavulici ira valevu, sa qai sara i Kirisi. ³ Sa jiko mada kinia me vula tolu, ra sa bukia kena vere o ira na Jiu, ni sa varau soko i Siria, sa nakijia o koya me qai i Masitonia i na nona lesu voki. ⁴ Ratou sa qai vata ki koya i Esia o Sopatero na kai Peria; o Arisitako vata ki Sekudu, o rau na kai Cesalonaika; o Keio na kai Tapi, vata ki Timoci, ki Tirofimo rau na kai Esia. ⁵ O ratou ke ratou sa qai iliu ka waraki kitou mai Tiroa. ⁶ Ia ni sa oji mada na gauna ni kana madrai reva ni valeveni, sa qai soko tani i Filipai ka bogi lima kitou sa qai yaco mai Tiroa. Kitou sa jiko kinia me vitu na siga. ⁷ Ia i nai matai ni siga ni wiki, ni sa soqoni vata o ira sa lotu me ra dovi madrai, sa vunau vi ira o Paula. Ni sa varau me qai i na savulaci, sa vunau jiko ka yacovia ni sa lomaloma ni bogi levu. ⁸ Sa levu na cina i nai taba loma ni vale icolo, kimamu sa soqoni vata kinia. ⁹ Sa dua na cauravou na yacana o Utiko, sa voleka i na darava icolo, sa moce lutu sara. Ia ni sa vunau vadede o Paula, sa bi na nona moce, sa lutu sobu mai na katolu ni taba loma ni vale, ia ni sa laveji icolo sa mate tu. ¹⁰ Sa qai sobu o Paula, sa davo i delana, ka mokolakia. Sa tukunia, "Dou kua ni kidro, ni sa jiko vua na yalona." ¹¹ Ni sa qai voki icolo o koya sa dovia na madra ka kana. A ra sa vivosaki vadede ka yacovia ni sa kida na savulaci, sa qai yani o koya. ¹² Ra sa yadjia mai na cauravou ni sa bula ka sa vacegui valevu. ¹³ Kitou sa liu yani ka vodokia na waqa ka soko i Aso, ni kitou sa nanumia me kitou vavodoki Paula kinia. Sa vake na nona lewa, ni sa via taubale o koya. ¹⁴ Ia ni kitou sa sota vata mai Aso, kitou sa vavodokia ka yaco i Mitilini. ¹⁵ Ni kitou sa soko tani yani i vanua ke, ka yaco me donui Kio . I na siga taravia kitou sa bogi dua mai Samo, ka bogi dua voki kitou sa yaco i Milito. ¹⁶ Ni sa lewa oji o Paula me soko baleji Efeso, ka me kua ni jiko vadede mai Esia; ni sa variri, ke rawa vua, me jiko mada mai Jerusalemi ka yaco na siga ni Penitiko. ¹⁷ Mai Milito sa talai eso na turaga i Efeso, me qai vi ira na nodra matua nai soqosoqo le ni lotu. ¹⁸ Ni ra sa yaco vua, sa tukunia vi ira o koya, "Dou sa kila na noqui valavala, i na visiga keceliga, au ma jiko kinia ki ikodou, me vatekivu i nai matai ni siga au ma qai mai kinia i Esia. ¹⁹ Au sa qaravia na Turaga i na yalo e malumalumu sara, ka levu na waini ni mataqu, vata na dauvere sa yaco vi au ni ra sa bukia na kequ vere o ira na Jiu. ²⁰ Au ma reva ni rava meu kua ni tukunia e dua na ka sa yaga vi ikodou, au vavulici ikodou, ni dou sa soqoni vata i na vivale vokiliga, ²¹ niu ma varojia jiko vi ira na Jiu vata vi ira vokiliga na kai vimatanitu tani, na vivutuni vua na Kalou vata na vabaujia na noda Turaga o Jisu Karisito. ²² Ka raicia, au sa qai i Jerusalemi ka ni sa uqeji au na yaloqu, niu sa reva ni kila se cava na yaco kinia vi au, ²³ ke liga ni sa vatakila vi au na Yalo Tabu i na vikoro keceliga ka tukunia sa waraki au nai vesu vata ki na rarwa. ²⁴ Ia au sa reva sara ni nanumakia na noqu bula me ka talei vi au ka me'u vaojia liga na noqu cakacaka vata nai tavi sa solia mai vi au na Turaga o Jisu, meu vatakila nai tukutuku-vinaka ni loloma ni Kalou. ²⁵ Ka raicia, au sa kila dou na reva ni raicia voki na mataqu, o ikodou keceliga au ma qai vata i na kemudou maliwai ka vunautakia na matanitu. ²⁶ O koya liga au sa vadjinadjina kinia vi ikodou i na siga ni kua, niu sa reva ni cala i na vukuna e dua sa cudruvi. ²⁷ Niu sa reva ni rava ni tukunia vi ikodou na loma ni Kalou taucoko. ²⁸ O koya liga mo dou varaici ikodou vata ki ira keceliga na qele-ni-sipi sa lesi ikodou kinia na Yalo Tabu mo dou nodrai vatawa. Mo dou vakania nai soqosoqo le ni lotu ni Kalou, o ira sa volia o koya i na nona dra liga. ²⁹ Niu sa kila ke, niu sa qai tani i vanua ke, na qai curu mai vi ikodou eso na woliva ca sara, ka ra na reva ni lomani ira na qele-ni-sipi. ³⁰ Ena tubu vokiliga icolo eso na tamata vi ikodou ka ra na vosatakia na ka e vivacalai, me mari ira kinia ra sa lotu me ra muri ira. ³¹ O koya mo dou qai vatawa ka nanumakia ni sa tolu na yabaki au reva ni cegu kinia na vunauci ikodou keceliga i na siga vata na bogi ka vawai jiko na mataqu. ³² O ikodou na viwekani, au sa qai tataunaki ikodou vua na Kalou vata ki na vosa ni nona loloma o koya sa rawa me vakatataki ikodou ka solia vi ikodou mo dou i votavota vata ki ira keceliga sa vasavasavataki. ³³ Au sa reva ni kocovia na siliva, se na koula, se nai curucuru ni tamata e dua. ³⁴ Dou sa kila vokiliga ni sa daucakacaka na liga ke me so na ka e yaga vi au, vata ki ratou vokiliga ratou sa jiko vi au. ³⁵ I na ka keceliga au sa vatakila vi ikodou, ni sa kilikili mo dou daucakacaka vake mo dou vukei ira sa malumalumu, mo dou nanumakia vokiliga na vosa ni Turaga o Jisu, ni sa tukunia o koya, "Sa ka ni vivakalougatataki valevu me soli ka, ka valailai liga me tauria na ka."' ³⁶ Ia ni sa vosa oji va gona o koya, sa tekiduru ka masu vata ki ira vayadualiga. ³⁷ Ara sa tagi kece saraliga, ka mokoji Paula ka reguci koya. ³⁸ Sa rarawa valevu na lomadra i na vuku ni vosa sa tukunia o koya, ni ra sa reva ni raici koya voki. A ra sa qai vitalatala vua i waqa.