¹ Sa varaici ira matua na matavilewai o Paula ka tukunia, "Ikodou na viwekani, au sa muria jiko ka yacovia na siga ke na ka au sa nanumakia sa dodonu i na mata ni Kalou." ² Sa tukunia o Ananaiasa na bete levu vi ira sa tu voleka vua me ra tavia na gusuna. ³ Sa qai tukunia vua o Paula, "Ena tavi iko na Kalou, o iko na lalaga sa boro vulavula. O sa jiko beka me va na vunau, ia dou sa tukunia vi au meu tavi, i na ka sa reva ni vana vunau?" ⁴ Sa qai tarogia o ira sa tu voleka, "O sa vosavacacatakia beka na bete levu ni Kalou?" ⁵ Sa qai tukunia o Paula, "Au sa reva ni kila, ikodou na viwekani, ni sa bete levu o koya. Ni sa volai, 'Mo kua ni vosavacacataki koya sa lewai ira na kai nomu."' ⁶ Ni sa raicia o Paula ni sai tokani ni Setoki eso vi ira, ka so voki ra Farisi, sa kaci o koya i na matadra na matavilewai, " Ikodou na viwekani, au na Farisi, na luve ni Farisi. I na vuku niu sa vadjinajia ni na tucake voki na mate au na tarogi kinia." ⁷ Ni sa vosa oji vake o koya, sa tubu na vileji vi ira na Farisi vata ki ira nai tokani ni Setoki, sa tawase rua kinia na le levu. ⁸ Ni sa dautukunia o ira nai tokani ni Setoki sa reva na tucake voki mai na mate, se agilosi, se yalo, sa dautukunia o ira na Farisi, sa djina ruarua. ⁹ Sa levu na qoqolou, sa qai tucake o ira na vunivola ra nodrai tokani na Farisi, ra sa viba, ka tukunia, "Kitou sa reva ni raicia e dua na ka ca vua na tamata ke. Ia ka vacava ke sa vosa vua e dua na agilosi se na yalo?" ¹⁰ Ni sa qai tubu na vileji levu, sa rava na turaga levu ni valu de ra basuraki Paula, sa vosa vi ira na sojia me ra qai sobu me ra kalirakia mai vakaukauwa vi ira, ka me ra yadjia i na bure ni valu. ¹¹ I na bogi taravia sa tu voleka vua o koya na Turaga ka tukunia, "Mo vacegu liga Paula, ni sa kilikili mo tukuni au mai Roma vokiliga, me va o sa tukuni au i Jerusalemi." ¹² Ni sa siga mai, sa bukia vere eso vi ira na Jiu, ka ra sa vivadreji i na bubului, ka tukunia me ra kua ni kana se somi me rawa mada na nodra vamatei Paula. ¹³ A ra sa le vasagavulu vacaca ra sa bukia na vere gona. ¹⁴ A ra sa qai mai vi ira na bete levu vata ki ira na matua ka tukunia, "Kitou sa vivadreji i na bubului levu me kitou kua ni kania e dua na ka me rawa mada na nitou vamatei Paula. ¹⁵ Ia, o ikodou vata ki ira vokiliga na matavilewai, me yadji koya sobu mai vi ikodou me va dou sa via tarogia vadodonu i na vukuna. Ia o kitou, ni sebera ni yaco o koya, kitou sa varau tu me vamatea." ¹⁶ Sa rogocia na vere ke na luvena-tagane na ganei Paula, sa qai ka curu i na bure ni valu ka tukunia vi Paula. ¹⁷ Sa qai kacivia e dua vi ira na turaga ni valu o Paula ka tukunia, "Yadjia na cauravou ke vua na turaga levu ni valu, sa dua na ka sa tu vua me tukunia vi koya." ¹⁸ Sa qai yadjia me rau qai vua na turaga levu ni valu, sa tukunia vua, "Sa kacivi au o Paula na tamata sa vesu tu, ka tukunia meu yadjia mai vi iko na cauravou ke. Ni sa dua na ka sa tu vua me tukunia vi iko." ¹⁹ Sa qai tauria na ligana na turaga levu ni valu ka rau sa qai vajikijiki vataki rau, sa tarogia, "Na cava beka na ka sa tu vi iko o sa via tukunia vi au?" ²⁰ Sa qai tukunia o koya, "Sa ra lomavata o ira na Jiu me ra vamasuji iko mo yadji Paula sobu ni vulaci vi ira i na matavilewai, me va o sa via tarogia vadodonu eso na ka i na vukuna. ²¹ Ia mo kua ni varogocia na nodra vamamasu, ni ra sa le vasagavulu vacaca ra sa lawavakia. Ra sa vivadreji vataki ira i na bubului me ra kua ni kana se somi me ra vamatei koya mada iliu. A ra sa qai varau tu, ra sa warakia liga mo vadonuya vi ira." ²² Sa qai vacala na caravou na turaga levu ni valu me qai yani, sa varojia, "Mo kua ni tukunia vua e dua ni o sa mai vatakila vi au na ka ke." ²³ Sa kacivi rau e le rua na turaga ni valu o koya, ka tukunia, "Varautakia na sojia e le rua na drau, vata na tamata e le vitusagavulu ra vodo ose, vata ki ira na tamata e le rua na drau sa vaiyaragi i na moto, me ra qai i Sisaria. Me ra qai i Sisaria i nai katolu ni bogi." ²⁴ Me varautaki vokiliga eso na ose me vodo kinia o Paula me yadji vavinaka i Sisaria vi Filikesa na kovana. ²⁵ Sa vola nai vola o koya ka vake: ²⁶ "Oi au o Kilotiu Laisiasa vua na turaga vinaka sara o Filikesa, sa loloma. ²⁷ Na tamata ke ra ma tauria na Jiu, a ra voleka ni ra vamatea; ia au sa qai yadji ira na sojia ka vabulai koya, niu sa kila sa kai Roma o koya. ²⁸ Ia niu sa via kila se cava ra sa beitaki koya kinia, au sa yadjia i na nodra matavilewai. ²⁹ Au sa raicia ni sa beitaki o koya i na ka eso e vilejitaki i na nodra vunau, ia ka reva na ka sa beitaki vua sa dodonu me mate kinia se me vesu. ³⁰ Ia ni sa tukuni mai vi au ra sa lawavaki koya o ira na Jiu, au sa variri meu vatala yani vi iko, au sa vosa vokiliga vi ira ra beitakia me ra tukunia i matamu na vika sa beitaki kinia o koya. Sa loloma." ³¹ Sa qai yadji Paula o ira na sojia, me va sa varoji vi ira. A ra sa yadjia i na bogi i Adipatiri. ³² I na savulaci, ra sa daini ira sa vodo ose me ra qai vata ki koya, a ra sa lesu voki i na bure ni valu. ³³ Ia ni sa yaco i Sisaria o ira ke, ra sa solia nai vola vua na turaga ka varaitaki Paula vokiliga vua. ³⁴ Ni sa wilikia oji na turaga, sa tarogia se o cei na nona vanua. Ni sa qai kila sa kai Sisilia, ³⁵ sa tukunia, "Au na rogoci iko ni ra sa yaco mai o ira ra sa beitaki iko." Sa varojia me vatawai i na vale ni vilewai ni Eroti.