¹ Koya gona kitou sa reva ni vosojia rawa na nitou via raici Ikodou, kitou sa mani nakijia kinia me kirau sa jiko liga mai Aceni. ² Kirau sa talai Timoci, na wekada, kai tokani ni dauviqaravi ni kena vatetei nai tukutuu vinaka i Karisito, me vakaukautakia na nomudou vabaujia. ³ Me kua ni dua me vayalaji ina vuku ni vivacacani ke, ikodou sa kila jiko va ikodou na vivacacani ke, sa jiki ni nona lewa na Kalou me balejia kita. ⁴ Ni kitou sa jikovata ki ikodou, kitou ma tukunia rawa jiko kinia ni kitou na vacacani ina vuku ni vabaujia ia me va ikodou sa kila, sa mani yaco djina me vakinia. ⁵ Ke na vuna au talai Timoci yani kinia, ni'u sa reva ni vosojia rawa, meu kila nai tuvaki ni nomudou vabaujia, niu sa taqayatakia de mani veretaki ikodou na tevoro ka qai vavuna me ka wale kinia na nitou cakacaka. ⁶ Ia ni sa lesu voki mai o Timoci ka sa qai vata mai nai tukutuku rogorogo vinaka ni nomudou vabaujia vata na nomudou loloma. Sa mai tukunia vi kitou o koya nomudou dau vanuinui vinaka jiko mai ka ikodou sa vinakajia mo dou mai raici kitou me va liga na levu ni nitou gadrevia me kitou raici ikodou. ⁷ Koya gona ikodou na viwekani, ina gauna kitou sotavia kinia na vivacacani vata na ka rarawa, kitou sa vayaloqaqataki ina vuku ni nomudou vabaujia: ⁸ balejia ni kitou sa qai bula vaidjina, ke u sa tudei jiko vua na Turaga. ⁹ Na cava me kitou tukunia rawa me varaitakia vavinaka na levu ni nitou vavinavinaka vua na Kalou me baleji ikodou vata na levu ni marau sa mai yaco vi kitou ina vukumunu, ina nitou tu ke ina mata ni noda Kalou? ¹⁰ Kitou sa masulakia vagumatua ina siga vata na bogi, me da na sota, ka me kitou varautakia na vika ko nu gadrevia me balejia na nomudou vabaujia. ¹¹ Me qai varautakia na Kalou na Tamada vata na noda Turaga o Jisu na sala me kitou yaco rawa yani kinia vi ikodou! ¹² Me qai vatuburi ikodou cake na Turaga ka vasinaiji ikodou ina loloma vi ira na viwekani, ka me vuabale yani na loloma ke vi ira na tamata keceliga me va na levu ni nitou lomani ikodou. ¹³ Ia me qai vataudeitakia o koya na lomamudou me reva ni cala ka savasava ina mata ni Kalou na Tamada ina gauna sa lesu voki mai kinia na noda Turaga o Jisu Karisito vata ki ira kece na nona tamata yalosavasava.