¹ Ikodou na viwekani, ikodou sa kila vinaka ni sa reva ni maumau laliga na nitou ma qai jiko mai vi ikodou. ² ia ni kitou a vararawataki mada i liu, ka vacacani sara mai Filipai, me va dou sa kila, kitou sa qai doudou liga ena vuku ni nitou Kalou me tukunia sara vi ikodou nai tukutuku-vinaka ni Kalou, a sa ka levu na vivoraji. ³ Na nitou i tukutuku ni vamamamasu ke vi ikodou sa reva ni vayacori i nai naki vatani se reva ni savasava, se me kitou vatarabetakia kinia e dua. ⁴ Ia kitou sa vunautakia liga me vaka sa vinakajia na Kalou, ka ni sa nanumia o koya ni sa ganiji kitou me kitou yadjia nai tukutuku vinaka. Sa reva ni kitou saga ke me ra vinakaji kitou kinia na tamata, na Kalou liga, o koya sa vatovolea nai naki ni lomada. ⁵ Dou sa kila ni kitou sa reva ni vosa ni vicavilaki laliga, se taucia e dua na vosa me ubia na yalo ni kocokoco, sa nitou i vadjinadjina kinia na Kalou. ⁶ Kitou sa reva vokiliga ni vinakajia me ra dokai kinia na tamata mai vi ikodou se mai vi ira na tani. ⁷ Ka djina liga ni ma rawa ni kitou vacolaji ikodou i na levu na ka, ni kitou sai apositolo i Karisito, Ia kitou sa yalo vinaka liga i na ikodou maliwa, me va e dua na marama djina sa qaraunia ira vinaka na luvena. ⁸ O koya ke, ina vuku ni nitou lomani ikodou, kitou sa reva ni vinakajia laliga me kitou wase vi ikodou nai tukutuku vinaka mai vua na Kalou, ia na nitou bula vokiliga, balejia ni ikodou sa rui bibi ka lomani djina sara vi kitou. ⁹ Ikodou na nanumia jiko na viwekani ni nitou cakacaka vata na nitou oga ni kitou ma daucakacaka jiko ina siga vata na bogi, me kitou kua sara kinia ni vaicolacolatakia e dua vi ikodou i na gauna kitou sa vunautakia jiko kinia vi ikodou nai tukutuku vinaka ni Kalou. ¹⁰ Dou sa vadjinadjina vata na Kalou i na kena savasava, dodonu ka reva ni cala na nitou i varau vi ikodou sa vabaujia. ¹¹ Me va ikodou sa kila ni kitou ma va na tama vi ira na luvena na nitou tuberi ikodou yadudua, ¹² ka vacegui ikodou, ka vauqeji ikodou mo dou varaitakia nai varau ni bula sa kilikili vua na Kalou, o koya sa kacivi ikodou jiko ina nona matanitu lagilagi. ¹³ Kitou sa vavinavinaka vokiliga vua na Kalou i na vuku ni nomudou ciqomia na Vosa ni Kalou ikodou ma rogocia mai vi kitou. Ina nomudou rogocia ka ciqomia na Vosa ni Kalou, ikodou sa vabaujia vaidjina ni sa tukutuku djina liga na Kalou. Ni sa cakacaka jiko na Kalou i na nomudou bula ikodou sa vabaujia. ¹⁴ Sa mani yaco vi ikodou na wekaqu na ka ma yaco vi ira na visoqosoqo le ni lotu ni Kalou mai Jutia, o ira sa ni Karisito Jisu, ikodou ma sota vokiliga na vivacacani mai vi ira liga na wekamudou me va na nodra ma sota kaya o ira mai vi ira na Jiu; ¹⁵ o ira ke ra ma vamatea na Turaga o Jisu Karisito, vata ki ira vokiliga na parofita, o ira ma vacacani kitou; ra sa reva ni vinaka vua na Kalou, ra sa vicaji vokiliga vata ki ira keceliga na tamata. ¹⁶ Ra ma tovolea vokiliga me ra tarovia na nitou vunau vi ira na kai matanitu tani, me ra vabulai kinia. Ia na nodra caka gona, sa qai levu cake liga na nodrai valavala ca, ia sa qai yaco vi ira na cudru ni Kalou. ¹⁷ Kitatou na viwekani,e djina liga ni kitou sa va na gone luveniyali ina vuku ni noda vitawasei valekaleka, sa vayago liga, ka reva ni vayalo - kitou sa nanumi ikodou valevu ka tovolea vakaukauwa me da visotaraki voki ina matana votu. ¹⁸ Kitou sa via qai vi ikodou, o au madaliga au ma tovolea vavica me'u lesu yani vi ikodou, ia sa tarovia liga na nitou i qaiqai o Setani. ¹⁹ Ia sa qai cava na nitou i nuinui, se na ka me kitou marautakia, se nai sala vatui me kitou cibitakia i na mata ni noda Turaga o Jisu ni sa lesu voki mai o koya. ²⁰ Sa djina sara, sai ikodou na vu ni nitou vacibicibi vata na marau.