¹ Jjumetae ma paliwaisi itorobajü penatsi nuenejja jjamü jawata, piaja bo Israel. ² Pebi apo perrabü jayatsiwa jopa; bajara apo nonata pünaetsane ikatsia; bajara powa naita jjuto jematsianatsi piaja irata; ajibi itsajiwi peyotsinsejjatsi. ³ Marra jjua jjumaitsi SEÑOR NÜ DIOS jumitsi: Patomarra pona miles ponü beje to nako patsianatsi cien (100) ponü beje pa monae pona cien (100) nakopatsiana diez (10), pejinawana paewi piaja bota Israel. ⁴ Marra jjua SEÑOR NÜ jumaitisi pia jabota Israel: "¡Nejaire pona ponarre!" ⁵ Pütsa jaitame Betel; pútsa junuame Gilgal jawata; na pona poname pütsa Beerseba jawata. Gilgal juniawaetsia nunekonitsiana, Betel aponae jjae naetsane itsakuene jawa. ⁶ Jjaire SEÑOR NÜ pona ponarre, pütsa itsimü be isoto piaja boota José tajjuena, ajibi tsane pe itajubijiwiyo Betel jawata. ⁷ ¡Bajara pa monae ejanaena pejjania jawani pe atsaja jawa penowia jawanü irrabelia jjuabiana. ⁸ DIOSO ejana atjübü piajawa, itjotjiana pe merrawi bajaya kunua; bajara ponü ejjana matakabi pe kirijaijawa merrawi, pe kotia manuamene merra jawata; runae ejjana ira jumawerreka. SEÑOR NÜ ira pewunü. ⁹ Kanajetairaka pia bejejawa najatsiayo pe asaü beje jawa pe bijianae jawa pia kuene saüjawa. ¹⁰ Bajara pa monae itoya tsabiabi pa monae mojjujiobatsi toma baupa itapata, nawekua tajayo ta biabe pe kuai kuaijaiwi pejjaniajai liwalisi. ¹¹ Tsipaji jjamü irrayo taneme bepejiabivi wekua pitame pejjae jawa nejjanü, pena kueneabijawa, jjamü apo na pona ponaenü tsane bajara jota. Jaina uva (viñedos) pa bianü pejjunia kuene, itsia apo apae tsane vinorra. ¹² Tsipaji jjanü yapütaniji jjuabeje neyabarra kuai kuaijai jawa ayai jawanua pebisia kuene ne ejjanaejawa, jamü jumatabu faefaenae ejjaname pejjane panaenü, ejjaname pebisia kuene nawakua tsatame pena mata wenonaenü baupa tomara jawata. ¹³ Bajara pa kuenia, pejania jamata kuenewi imoya tsane bajara pamatabi, tsipaji baja pe ayai mata kabi. ¹⁴ Jairre pjjania kuene pütsa pebisia kuene, ne pona ponae nejja. Bajara pa kuenia SEÑOR NÜ DIOS, jania waetsia kayajawa pona ponaena, itsa jumaitsimü bajara ponü rabaja. ¹⁵ Itoyamürre pia beje jawa, asiwamürre pejjana panae jawa. Itsimürre pejjania kuene tomara jawata. Tsipae SEÑOR NÚ DIOS, jamatabü kuene jane panaejitsipa pa monae José. ¹⁶ Bajara pa kuenia, majjua jumaitsi SEÑOR NÜ DIOS ejércitos, SEÑOR NÜ: "Natsinuena dajjita dajjita jawa, bajara pa monae jumaitsane tomara tua tuajjua, jumaitsi tsane ¡Ake! ¡Ake! Bajara pa monae junatsiana pe ubiwi pe jamatabü nuewi peto atanewitsi nuena. ¹⁷ Dajjita viña pabi nuena. Tsipaji janü najetaru kaenajü jjamü tua tuajua, jumaitsi SEÑOR NÜ. ¹⁸ ¡Aké jamütsane pajiwi jitsipa piaja mata kabi SEÑOR NÜ! ¿De jjuajitsia jitsipame piaja matakabi SEÑOR NÜ? kirrijuitsane ajibitsane penaitayotsi jawa, ¹⁹ Pa kuenia jiwitonü wekua nejaba jirraba newutjü ikatsia namatajüna tsonü, itsajume pona boyabelia nakobe buata pe pejumata ikatsia sinetsi jomo. ²⁰ ¿Rauta piaja mata kabi SEÑOR NÜ kirrijai apo na pebetsimeta? ¿pe nuejawa ajibi pe kotia? ²¹ Itoyanü, ajitsipaenü ne ejanaejawa apo barrüyanü pane nubenae jawata. ²² Nerrajutsimü ata tsane be pematamo netajuitsi jawa be pematamo pekuai, apo pitsinü tsane, apotaenü ata tsane be pe matamo pena yanatsijawa ne wiatsiwi pena sitsinü. ²³ Tijirre jjanü wekua pejjume nenajjuanaejawa; apo jumetajitsi paenü pejjume nija arpa. ²⁴ Baitsi itsiata, pejjania kuene nawu tsiana be merra, pe rowiajawa nawota pe ne asaü merra. ²⁵ ¿Neto kaponame be pematamo jawa pe tsewi ira jawaberrena cuarenta (40) pawü beje, piaja bo Israel? ²⁶ ¿Yotsiana Sicut be rey nü, Quiyún paiaja dioso tulupü, pe jitsipaewi panakua pijiwi pejjanaewi pajjamü nejja. ²⁷ Bajara pa kuenia, kabarrü ponana tsi itsa panabelia Damasco, jumitsi SEÑOR NÜ, dajjita jiwi piaja DIOS ejércitos.