¹ ताहा येशु तिया नासोरी गावुम आलो आने तिया फासला फासला तिया चेला बी आला. शब्बाथ दिहाल येशु देवलाम परमेश्वरा हाऱ्या गोठ्या हिकवुतलो ताहा बाद्दा माहान नोवाय वाट्यो ² ताहा ते आखा लाग्या की ईयाल ऐ गोठ्या काहीने मालुम पोड्या ? ईयाल ओती ओक्कोल काहीने आली ? आने ईया आथाकी ओता मोडा चमत्कार केहकी वेताहा ?. ³ ओ ता एपली तीयु मरियोमुअ पोयरो तो हुतारुज हायकने ? आने इया पावुहु याकोब, योसे, यहुदा, शिमोन हाय आने तियाअ बोया हाय आपु गामाम रहते कने ? ⁴ फासे येशुय तियान आख्यो, “जे पोरमेरूह आखली गोठ जाहेर केअनारा तिया सन्मान जातुलाम नाहा वेताे ऐहकी नाहा हाय, पेने तिया नगराम आने जातुलाम तिया कुटूुबाम तिया सन्मान नाहा वेतो.” ⁵ आने तिहाम थोडाज लोकापे आथ थोविन हारे केये, बास, तिया शिवाय बिजे मोडो काम काय नाहा केता आलो. ⁶ तियापे विश्वास नाय केअयो तियाअ लीदे तियाल खुब नवाय वाट्यो फासे येशु परमेश्वरा हाऱ्या गोठ्या आहिल्या पाहिल्या गावुन हिकवुतो फिऱ्यो. ⁷ फोसे येशुय बारा चेलाहान हादे आने तियान बेन बेन जुवानु जोडी की मोकला लाग्यो. तियाय तियांन पुथडे काडुला अधिकार देदो. ⁸ आने तियाय तियान आख्यो की “जाहा तुमा जावा लाकडी शिवाय बिजो काहिज नाय लेवुला, नाहा मान्डो लेवुला, नाहा झोकी लेवुला आने पाेयसा बी नाय लेवुला. ⁹ पेन चापले पोविन निगजा आने बेन डोगल्या नाहा पोवा. ¹⁰ आने तियाय तियान आख्यो जि कोवाम तुमा जा तिहीने नगर हुदरुतो नाहा तावक लुग रेजा. ¹¹ आने जिही तुमा जाहा तिही तुमा स्वागत नाहा केयो आने तुमाह गोठ्या नाहा ऊनाया तीहीने निगीन जाती वेला तियान साक्ष देवुला ती इकी आपु पागु ऊदलो तिहीज फोकडी देऊला. ¹² फासे चेला तिहिने निगी गिया आने लाेकाहान पापाहा बद्दल पासतावो केरा ऐहकी आखता फिरा लाग्या. ¹³ आने तियाहाय खुबुज पुथडान लोकाहामने ओडी काड्या आने खुबुज दुखाहान तेल लागवीन हारे केये. ¹⁴ हेरोद राजाल येशु बद्दल मालुम पोड्यो, काहाका येशु बद्दल बादहा लोकोहान मालुम आथो, ते आखतला बाप्तिस्मा देनारो योहान मोलामेने फासे उठ्योहो, तिया खातोरुज तियाकी इ नोवाय लागे एहेंडे मोडे मोडे कामे वेअतेहे. ¹⁵ बाकी लोक आखतला का पोरमेहेरूह आखली गोठ जाहेर केअनारा जुना जोमानाअ एलीया हाय बिहरे थोडाक लोक आखतला आगला जे भविष्यवक्ता आथा तियामेरोज ओ बी भविष्यवक्तो हाय. ¹⁶ पेन इ उनाइन हेरोदाय आख्यों जिया योहाना मुनको माय वाडी टाकावलो तो जिवतो वेयोहाे.” ¹⁷ हेरोदाय तिया पावहु फिलीप इया थेयील राखी लेदली आथी इ गोठ तियमा विरुध्द हाय एहेंकी योहानाय हेरादाल आख्लो तिया खातोर हेरोदाय माहे मोकलावीन योहानाल तिइन ली आवीन कोंडी देदलो. ¹⁸ इ तियाय तिया पावहा थेय हेरोदिया खातोर केयाे काहाका तो पावाहा थेयील राखुनु इ तो चुक हाय एहेंकी योहानाय हेरोदाल आखलो. ¹⁹ इया खातोर हेरोदिया योहाना आरी दुश्मनी किइन तियाल माय टाका आथो पेन तेहकी नाय वी सेक्यो. ²⁰ काहा का योहान धर्मी आने चोखो माहु हाय इ जाईन हेरोद बितलो आने तियाल सामभालतलो. योहान जाहा हेरादाल गोठ्या आखे ताहा हेरोद काबराय जातलो पेन तेबी खुशीकी गोठ्या उनाय लेतलो. ²¹ फासे एक खुबुज आनंदा दीही आलो तो हेरोद राजा जोन्मा दिही आथो तिया खातोर तिही तियांय तिया माेडा अधिकाऱ्याहान माेडा सिपाडाहान आने गालील देशुमने पुढारी लोकांहान मांडो खाआ खातोर हादले. ²² ताहा हेरोदिया पोयरीय माज जाईन नाच काम केयो, तो विन हेरोद आने तिया आरी जे लोक आथा तिया बादाहान खुश केये, हेरोद राजाय तिया पोयरील आख्यो " माग माग. आज तु जो मागहो तो आय तुल देहे." ²³ हेरोद तिया पोयरील शपथ लिन आखेहे, तु जो बी मां वे मागहो तो आय तुल देहे, मापे आरदो राज्यो मानगोहो तेबी आय तुल देहे. ²⁴ ती बारे गिई तियु याहकिल फुसा लागि, “आय काय मांगु ?” तियु याहाकिय आख्यो कि “तु बाप्तिस्मा केनारा योहाना मुनको मागे.” ²⁵ ताहा ती पोयरी तुरुतुज माज राजाही जाइन आखा लागी “मान बाप्तिस्मा केनारा योहाना मुनको एकी थालीम थोविन आमीज मागावी दे.” ²⁶ ताहा राजो निराश वी गियो, पेन तियांय शपथ खादली आथी तियुकी आने आरी जे लोक बोठला आथा तियांहाकी ती गोठ तियांय पुरीज केरा पोडी. ²⁷ राजांय तुरुतुज योहाना मुनको वाडीन ली आवा खातोर एक सिपाडाल हुकुम दिइन जेलाम मोकल्यो, सिपाडाय जेलाम गिया आने याेहाना मुनको वाड्यो. ²⁸ तोज मुनको थालिम थोविन ली आविन राजाय पोयरील देदो, आने पोयरीय याहाकील देदो. ²⁹ इ उनाईन तिही योहाना चेला आला आने तियाय डिल उखलिन माहाणाम थोवी देदो. ³⁰ फासे चेला लोगु येशुय टोलवाया, आने तियाहांय जो काम केयो, जो हिकव्यो तो येशुल आखी देखाव्यो. ³¹ ताहा येशुय तियाहान आख्यो, “चाला आपु जोंगलाम शांत जागावे जाईन थोडाेक आराम किहु , काहाका तिही खुब लोक आवतला आने जातला तिया खातोर तियाहान मांडो खावुला बी टेम नाय मिलतलो. ³² ताहा ते उडीम बोहीन जोंगलाम तिगी गिया. ³³ पेन खुबुज लोकाहाय तियाहान जाता देखीन ओखी लेदो आने तिया बादा गावुमने लोक चालतांज निग्या, ते दोवडीन येशु आने तिया चेलाहा पेहलाज तिही जाय पोच्या. ³⁴ येशु उडीमने उतेहे ताहा तियांय खुबुज लोक टोलवाला देख्या, तियाहान विइन दोया की आली काहाका पालनारा नाहा रोता एहेंडा मेडाहां होस ते आथे. आने तो तियाहान खुबुज गोठ्या हिकवा लाग्यो. ³⁵ वाअतो पोड्यो ताहा येशुअ चेलाहा जाईन येशुल आखताहा, “आपु जोंगलु जागाम हाय आने वाअतो पोडी गियोहो. ³⁶ तु लोकाहान आखी दे ताहा ते गावाहाम आने खेतुम जाइन तिया तियाहांज खावनु बेचातों ली आवी.” ³⁷ येशुय चेलाहान आख्यो, तुमाज, तियाहान काय तेबी खावुला द्या. “आमा बेन होव चांदी रुप्याहा मांडा बेचाता ली लावीन देजी का ? ?” ³⁸ येशुय तियाहान आख्यो, तुम्हा जा आने लोकाहान फुसा तुम्हाप कोता मांडा हाय ? जाइन लोकांहान फुच्यो ताहा तियाहांप बास, पाच मांडा आने बेन मासे ओतेज आथे. ³⁹ येशुय तियाहान आख्यो, लोकाहा चारापे टोला टोलाकी बोहीजा ⁴⁰ ताहा लोक होव - होव आने पाच्हा-पाच्हा ऐहकी टोलाम बोठा. ⁴¹ ताहा येशुय ते पाच मांडा आने बेन मासे आथाम लेदे आशिर्वाद मागीन मांडा मुड्या आने वाटी खावावा खातोर चेलाहान देदा, ते मासे बी बांदाहान वाटी देदे. ⁴² ताहा बादा लोक खाइन ताराया, ⁴³ आने वादला मांडा तुकडाहा की बारा सिबले पोराये आने थोडेक मसे बी वादी गेहले. ⁴⁴ मांडो खानाराहाम आदमीज पाच हाजार आथा ⁴⁵ येशुय तुरुतुज तिया चेलाहान आख्यो आय लोकाहान वाटे लागवुहु तांव तुमा उडीम बोहीन फुगारा ती तोडीपे बेथसैदा गावाम जा. ⁴⁶ आने तो लोकाहान वाटे लागवीन एखलोज डोगापे प्रार्थना केरा गियो. ⁴⁷ वातो वी गियो ताहा तियांहा उडी फुगारा भोर वोसमे आथी आने येशु एखलोज तोरतीप आथो ⁴⁸ जाहा वारो हूुंबुरने खुबुज चालतलो तिया खातोर ते चाटला ठोकी-ठोकींन थाकी गेहला, इ येशुय देख्यो ताहा वेगरे तीन ते सोव वाज्ये वेरी येशु पांयापने चालीन तियाहांही आलो, तो तियाहांसे आगाडी निंगी जानारो आथो. ⁴⁹ पेन चेलाहांय तियाल पायावे चालता देखीन “आ पुथ हाय एहेंकी होमजीन खुबुज बोंबली उठ्या काहाका ते बादा तियाल विइन काबराय गेहला. ⁵⁰ पेन येशुय तुरुतुज तियाहा आरी गोठ्या केरा लाग्यो “हिंमत तेरा आंय हाय, बियाहा मां” ⁵¹ तो उडीम चोडी गियो ताहां वारो ठाको रियो,इ विइन चेलाहान खुबुज नोवाय लागी. ⁵² काहाका तियाहान मांडा गोठी ओर्थ होमजायो नाहा. काहाका तियाहा मोने कठीण वी गेहले आथे. ⁵³ फासे ते तिया तोडीपे गनेसरेत सेहेराही जाय पोच्या, आने उडी तोडीपे बांदी थोवी. ⁵⁴ आने ते उडीमाने उतुअतांज लोकाहाय येशुल आख्यी लेदो. ⁵⁵ आने ते लोक पाहीने बादा देशाहाम दौडी गिया आने दुख्याहान खाटलाहापे हुवाविन येशु जिही हाय एहेंकी मालुम पोडतलो तिही ली जा लाग्या. ⁵⁶ आने येशु गांवाहाम, खेताहाम जिही बी जाहलो, तिही लोक दुख्याहान बाजारा वेसला जागाम ली आवीन थोवतला आने येशुल राव्या किइन आखतला, तु तियाहान तो पोतडाहा कोर तेबी आथली ला दे आने जोता दुखी लोक तिया पोतडा कोराल आथलुतला ते बाद्दाज हारा व जाहला.