¹ एक दिही थोडाक परुशी लाेक आने शास्त्री लाेक यरुशलेमने आलला, ते टोलवायन येशुय आला. ² तियाहाय येशु चेलाहांमने थोडाक चेलाहान आथ नाय तुवता मांडो खाता देख्यो. ³ काहाका परुशी लोक आने बादा यहूदी लोक डायाहां रीती रीवाज पालतला, ते हारकी आथ तुव्या सीवाय मांडो नाय खातला. ⁴ बाजारामने लाल्ली केल्ही बी वस्तु ते तुव्या शिवाय खता नाहा आने ते डायाहा रीती रीवाज पालतला आने तेहेंकीज गिलास, वेंडे, पितला बासने चोलीन तुवनु एहकी खुब नियम ते पालतला, ⁵ इया खातोर तिया माहांय येशुल फुच्यो, “तो चेला आथ नाय तुवता मांडो खाताहा, ते डायहा रीत्या काहाल नहा पालता ?” ⁶ येशुय तियाहान आख्यो, “तुमा ढोंग केताहा, यशया भविष्यवक्ताल परमेश्वराय तुमा बाबतीम आगलोज भविष्य एहेकी लेखाव्यो ⁷ ‘ते लाेक मान मुयाकी मान-पान देताहा, पेन तियाहा मोने मां इहीने दुर हाय, ते मां भक्ती नाकामा केताहा, काहाका ते माहाय ठरवुला नियम धर्मा तियम हाय एहेंकी किइन हिकवुताहा. ⁸ काहाका तुमाहाय परमेश्वरा नियम सोडी देदाहा आने माहा रीत्या पालताहा.’ ⁹ आजी तियाय तियाहान आख्यो, ‘ तुमा डयाहा रीत्या पाला खातोर परमेश्वरा नियम केहेंकी हारी रितीकी सोडी देताहा.’ ¹⁰ काहाका मोशेय आख्यो, ‘तु तो याहाकी-बाहाका मान राख, जो याहाकी-बाहाकाल हारो नाय गोगतो वेरी तियाल नक्कीज माय टाका जोजे.’ ¹¹ पेन तुमा आखताहा, ‘केडो बी तिया याहाकी-बाहाकाल आखी जो काय आय तुमाहान दाआ आथो, तो माय परमेश्वराल दान की देदो.’

¹² ता याहाकी बाहाकाल देवनु गोरज नाहा एहेंकी किइन तुमा तियाल तिया याहाकी-बाहाका सेवा केरा देताज नाहा.

¹³ ऐहंकी किइन तुमाहाय तुमा रीताहीकी परमेश्वरा नियम तोडी टाकाव्या, तेहेंकीज एहेंडे बिहीरे खुबुज कामे केताहा.” ¹⁴ ताहा येशुय लोकाहान तियाही हादीन आख्यो, “ तुमा बादे मा उनाया आने होमजी ल्या.”

¹⁵ एहेंकी केल्लीज वस्तु नाहा, जी माहाम बारेने जाइन अपवित्र केहे, पेन जी वस्तु माहामने निंगेहे तोज माहाल अशुध्द केहे जियाहा उनानु खातोर कान हाय, तियाहांय हारकी उनाय ल्या.

^{16 17} तियांय लोकाहान तिहीज रां देदे , आने कोमे गियो ताहा तिया चेला तियाल दाखला बोद्दल फुच्यो,

¹⁸ येशुय तियाहान आख्यो, “तुमाहान ओती बी आकल नाहा हाय का ? जी वस्तु माहा माजमे जाहे ती माहाल अशुध्द केतो नहा, इ तुमाहान नाहा होमजातों का ?

¹⁹ खावनु वस्तु मोनाम नाय पेन डेडीम जाहे, आने फासे तियाहाल ओगी टाकतेहे, एहेंकी आखीन येशुय बादी खावनु वस्तु चोखी हाय इ आख्यो.”

²⁰ आजी तियांय आख्यो, “जो माहा अंत:करणामने बारे निंगेहे तोंज माहाल अशुध्द केहे.”

²¹ काहाका माजमेने म्हणजे अंत:करणामने खाराब विचार बारे पोडताहा जेहकी, खारोब कामे, चोरी, खुन,

²² सिनालों, लोब, खोटोपोण, ठोगबाजी, हुनाटाय, हेवा, खोटी नजरीकी वेअनु , निंदा केअनु, अभिमान केअनु, मुर्खता इ. बांदो निगेहे.

²³ ए बाद्या गोठ्या माहामनेज निगत्याहा, आने माहाल अशुध्द केत्याहा,

²⁴ फासे येशु तिहीने निगीन सोर आने सीदाेन हिवालाम आलो आने तो तिही एका कोवाम गियो इ केडाल मालुम नायपोडा जोंजे एहेकी तिया वीचार आथो पेन तो दोबी नाहा सक्यों.

²⁵ ताहा तुरुतुज एकी बाई पोयरील पुथ लागलो आथो, ती येशु बोद्दल गोठ्या उनायन येशुही आली आने तीया पागे पाेडी.

²⁶ ती बाई ग्रीक आथी आने सिरीयामने फिनीशीया इही जन्म वेली आथी, तियुय येशुल रांव्या किइन आख्यो,”मा पोयरीमने पुथडो काडी दे.

²⁷ येशुय तियुल आख्यो, ”पोयराहान पेहली तारायन खाय ला दे काहाका पोयरांहा मांडो लिइन कुतराहान टाकनु इ हारो नाहा हाय”

²⁸ ताहा ती बाईय येशुल आख्यो, “इ खेरीज हाय प्रभु, पेन कुतरे बी ता टेबला थुले पोयराहा वेने टाकाय जाहे ती मांडो विसीन खातेहे,”

²⁹ ताहा येशुय बाईल आख्यो, “तो आखनु हारो हाय, तु जो, तो पोयरीमने पुथडो निगी गियोहो.”

³⁰ जाहा ती बाई तियु को गियी ताहा तियुय ती पोयरील खाटलापे हुतली देखी, आने तियुमने पुथडो निगी गेहलो आथो.

³¹ फासे येशु साेर आने सिदाेन हिवालाम निगीन दकापलीस हिवालाम लुगीन गालील पुगाराही जाय पोच्यो.

³² ताहा लोक एका बेरा आने ताेतऱ्या माहाल येशुय ली आवीन राव्या किइन आखा लग्या तो आथ इया पे थोव

³³ ताहा येशु ती माहाल लोकाहा टोलामने बारे ली जाइन तिया कानाहाम आकड्या काल्या आने फासे आकडीपे थुकीन तिया जिभील आथल्यो.

³⁴ आने होरगा वेल विइन हां टाकी आने आख्यो, “इफ्फाथा” (इया अर्थ खुली जो.)

³⁵ ताहा तो माहु उनाया लाग्यो आने तिया जिभी गाठ तुरुतुज सुटी वी गियी आने तो हारी रिते गोगा लाग्यो.

³⁶ ताहा येशुय तीया लोकाहान हारकी होमजावीन आख्यो, इ गोठ केडालुज आखाहा मां, पेन येशु जियाहान आखलो ते वादुज तिया गोठ्या आखा लाग्या.

³⁷ तिया लोकाहान खुबुज नोवाय लागी आने ते आखा लाग्या “तियाय जो बी काय केयो तो हारो केयोहो, बेराहान उनानु आने मुकाहान गोगनु सोकती देदी.”