¹ फासे येशु खाडी तेडीप हिकवा लाग्यो, ताहा ता खाडी तोडीप जाईन बोठो आने होग्गा लोक खाडी तोंडीप आथा, ² तो तियान दाखलो दीन काहिक गोठ्या हिकवा लाग्यो, आने तो तियाहान आखा लाग्यो. ³ एक,एक पोनारो बीय पाेरा खातोर निंग्यो. ⁴ आने तो पोअतुलो ताहा एहकी वेयो का, काय बीय वाटीम पोडलो तो चिडाहाय आविन खाय लेदोलो. ⁵ थोड्या बीया खेडकाली जमिनप पोड्यो तिही तियाल हारी जमिन नाय आथी कादु उंचेज आथो तिया खातोर ते माहारीज उगीवोल्ये. ⁶ पेन सूर्य उंसे आवताज तोपाकी कोमाय गिये आने मुले नाय आथे तियाल हुकाय गिये. ⁷ थोड्या बीया काटाला चाडाम पोड्ल्य आने काटाला चाडा होसाटाकी वादी गिये,आने तियाल तियान कायज पिक आलो नाहा. ⁸ थोड्या बिंया हारी जमिनीम पोड्या ते उगी आल्या मोडे विये तियान पिक आले आने तिया तिसपट, साठपट, शंभरपट आतों पिक आलोंं. ⁹ तो आखा लाग्यो, "जियान उनानु कान हाय ते उनाय." ¹⁰ तो एखोलज आथाे तिया आरी बारा माहे आथें जे आथे तियाही तियान दाखला बाराम फुच्यो, ¹¹ तो तियान आखा लाग्यो, "देवा राज्या रहस्यदान तुम्हान देदलो हाय, पेन बारेनु प्रत्येक गोठ दाखलाकी आखुला आवेह, ¹² इया केअता का तियान डोवा देखता देखाय पेन तियान देखाय नाय ? उन्हांया खातोर तुमा उन्हाया, पेन होमजा नाहा, नेअय ता कदाच ते फिरी आने देव तियान माप की दी." ¹³ तो आखा लाग्यो, "ओ दाखलो तुम्हान हम्यो का नाहा, आने आथी बिहीरा दाखला तुम्हान केहेकी होमजी? ¹⁴ पोनारा वचन पोरेहे. ¹⁵ वाटीवे वचन पोरा जातेह तिहीने लोक ए हाय का, तियाय उनाताज सौतान आविन तियामेने पोअले वचन बुची ले हे. ¹⁶ तेहेकीज खडकाळ जमीनुम पोअले हाय ते, वचन उनाताज ते आनंदाकी पालन केअतहे; ¹⁷ तियामेने मुले नये आथे तियाल ते थोडेज टिकतेहे, वचना खातोर संकट का सतावणी आवे; ताहा विश्वास सोळी देतेहे. ¹⁸ काटाम पोले हाय ते वचन उनाय लेतेहे, ¹⁹ पेन जगा चिंता, पैसा चिंता, संपत्ती मोह आने बिहीरी गोठीकी लोब तियाहाम विहीन वचनाले दोबावी देहे, आने तो बिगर काम ऐहेडो विइ जाहे, ²⁰ आने जो हारा जागाम पोंलो हाय तो ते वचन उनाते खेरे पेन केडो तीसटोका, केडो साठ टोक्का, केडो शंबर टोक्का फोलवो देतेहे." ²¹ आजी येशुय तियान आख्यो, "दिवो मापाथुले नेअता खाटलाथुले थोवा लावताहा का? दिवीप थोवा लावतेहे. ²² प्रत्येक गोठ्या दोबावल्या ते उगड्या पडी आने प्रत्येक गुप्त गोठ्या जाहेर वेनाऱ्या हाय. ²³ जियाल कान हाय ते उनाया." ²⁴ तो तियाहान आखा लाग्यो “तुमा जे काय उनातेहे तियु गोठिम हासविन ऱ्या, जिया मापाकी मोजाहा तियाज मापाकी तुम्हान बी मोजीन दियाम आवी. ²⁵ आने जियाप हाय तियाल आजी देवाम आवी आने जियाप नाहा हाय तियापे ने जे कई हाय ते ले लेवाम आवी. ²⁶ आजी तो आखा लाग्यो, "देवा राज्याम एहेकी हाय का, जेहेकी का एगदो माहाव तोरतीम बींजी टाके. ²⁷ राती हुवी जांहे आने दिहया उठेहे आने ते बिंज्या उगत्याहा आने वादत्याहा इ केहंकी वेअरेहे तो तियाहान मालुम नाहा, ²⁸ जमिन तित तिया पिक देहे, पेहेला मोवर, फासे कोहें आने कोहांम पोराला दाना. ²⁹ पिक तियार वेअरेहे ताहा तियाल तुरुत दाहोलो लागवुतेहे काहाकी वाडुलो टेम आवी गियोहो." ³⁰ आजी तो आखां लाग्यो, "आपु देवा राज्या तुलना केहंडा आरी आपु की शेकतेह नेअता केल्लां दाखलाे वापरुजी? ³¹ तो राई दाना होस हाय, जो जोमीनुम पोनु टेमाम पृथ्वीपनु आख्या दाना देख हानो वेरी तेबी. ³² तो पोईन उगेहे तहा आख्या चाडाहा देख मोडो वेरेहे, तियाल मोड्यो डांग्या आवत्याहा आने तियु सायुं चिडे तियाप कोरुवो बनवि शेकतेहे." ³³ एहेडो खुब दाखला दीइन, जेहेकी तियाहा की उनावले तेहकी, तो तियाहान वचन आखतुलो. ³⁴ आने दाखला वाचीन तो तियाआरी गोगुतलो नाय आथो, पेन एखलाम तो तिया शिष्याहान आख्या गोठ्या हमजाविन आखतुलो. ³⁵ तो दिहीअ वाअतीवेल येशु तिया चेलाहान आखा लाग्यो, “आपु तेसलीमेर जाता हा.” ³⁶ फांसे तियाय गर्दील सोडीन जेहेकी तो आथो तेहेकीज ते तियाल बी आरी लि गीये. तिया आरी बिहीरे बी उडीप आथेंह. ³⁷ ताहा वाराआरी मोडो वादलो सुट्यों आने पायालाठा उड्याप आवा लाग्या का, तो पायावाय पोराया लाग्यों. ³⁸ पेन येशु फासला भागाम तोकयापे मूनको थोविन हुतलो आथो. ते तियाल उठविन आखा लाग्या, “गुरुजी आपु बुडी रियाहा तेबी तुल पोडली नाहा का?” ³⁹ फांसे तो उठ्यो आने तियाय वारगाल धमाकाव्यो आने दरीयाल आख्यो, “शांती राख! आने ठाको रेअ.” फांसे वारगो बोंद बेयो आने तिही मोडी शांती आली. ⁴⁰ तियाय तियाहान आख्यो “तुम्हा काहा बिताहा? तुम्हापे आजीबी विश्वास नाहा का माय तुमनेह बचावी सकुह?” ⁴¹ फांसे ते खुब बी गिया आने एक विहीराल आखा लाग्या, “ओ पेन केडो हाय? वारो आने दोरीयो बी इया उनाताहा?