¹ फासे येशु एका देवलाम गियो, तिही एक माहु आथो तिया एक आथ हुकाय गिहीलो आथो. ² शब्बाथा दिहा दिही येशु त्या माहाल हारो केअहे का नाहा इ विन तियाप दोष लागवा केअता तिया विरोधी लोक तियाव नजर थोवी रेहला. ³ त्या एका आथा हुकाला माहाल येशुय आख्यो, “उठ आने इ माहा हुबुंर उबी रेअ.” ⁴ ताहा येशुय तियाहाल आख्यो शाब्बाथा दिहा दीही हारो काम केनु का माठो केनु, जिव वाचवुनु का जीव लेवनु यामने केल्लो काम हारो हाय?" पेन ते ठाकाज रिअया. ⁵ तियाहा मोन खाराब होय इ विन येशु निराश वि गियो आने तियाय रोगीकी होग्गान वेअयो, आने त्या एका आथा हुकाला माहाल आख्यो, “ तो आथ लांबो के” तियाय आथ लांबो केअयो आने तो हारो वि गियो. ⁶ ताहा परुशी पंथा लोक बारे जाईन तियाल (येशुल) आपु केहकी माय टाकुहु या बाबत चर्चा केअरा हेरोदीयांही तिया विरुध्द टोलवाया. ⁷ येशु तिया चेलाहां आरी गालील फुगारावेअल निंगी गियो, ताहा गालील हिवालामने खुबुज लोक तिया फासाडीने जातला ⁸ येशु जो मोडा चमत्कार केअतलो तो उनायन यहुदिया, यरुशलेम, इदोम आने यार्देन खाडी ति वेलने देश आने सोर आने सिदोन इयापाहल्या देशामने खुबुज लोक येशुय आला. ⁹ तिही खूबुज गोर्दी आथी तियाहा की येशु चुदाय नाय जा जोजे तिया खातोर तियांय एक उडी तियार की थोवा एहकी तिया चेलाहान आखी देदो, ¹⁰ काहाका तियाय खुबुज दुखी माहान हारे केअले तियाहाल जे दुखी माहे आथे ति मे तियाल आथ लागवा केअता होग्गे तिया उसे तुटी पोडा लाग्ये. ¹¹ ताहा पुतडो लागले माहे येशुल विइन तिया हुबुंर एठा पोडीन मोडाकी बोंबलीन आखतोले “ तु देवा पोयरो हाय”. ¹² ताहा येशुय ती दुख्यान ताकीत दिन आख्यो “मा बोद्दल केडालुज नाहा आखाहा.” ¹³ फासे येशु डोगावे चोडी गियो आने जे शिष्य तियाल जोसतलो आथा तियांय सोता वेले हाद्या आने ते येशुही आला. ¹⁴ ताहा येशुय तिया आरी राअ खातोर आने पोरमेहेरा हाऱ्या गोठ्या आखा बिहिरी जगाम जावा केअता बारा जुवान निवाड्या तियहाने प्रेषित हे नाम देदा. ¹⁵ आने तियाहावे पुतडे काडनु अधिकार राअ जोजे, ¹⁶ ताहा येशुय बारा जुवान निवड्या आने जो शिमोन या पेत्र इ नाव देदो. ¹⁷ जब्दी पोयरो याकोब आने याकोबा पावुहु योहान (इयाहान तियात बोअनेरर्गेस, इया अर्थ गाजनु पोयरा एहेकी नाव देदो.) ¹⁸ आंद्रिया, फिलीप्प, बर्थलमय, मत्तय, थोमा, अल्फी पोयरो याकोब, तद्य , शिमोन (जो कनानी आथो) ¹⁹ आने जियाय येशुल तिई देदो तो यहुदा इस्कार्योत. ²⁰ आने फासे येशु कोआ आलो, आने फासे ओता होग्गा लोक टोलवाय गिया का तियाहान मांडो खा बी टेम नाहा मिल्यो. ²¹ येशु मुनको फीरी गियोहाे एहकी माही आखतेले तीया खातोर तिया कोआमेने माहे तो उनायन तियाल तेअरा खातोर निग्ये. ²² तेहकीज यरुशलेम शहरामने आल्ला शास्त्री लोक बी आखा लाग्या का, तियाल काल्यापुत लागलो हाय, तिया खातोर (बालजबुल) तो काल्यापुतडा मदतीकी पुतडे काडेहे. ²³ ताहा येशुय तियाहान पाही हादीन आख्यो पुतडाल पुतडो केहकी काडी. ²⁴ जर एका राज्याम फुट पोडी गियी ता तोंओ राज्य केहकी टिकी सके. ²⁵ एहकीज जर एका कोआमे फुट पोडी ता ताे कोअ केहकी टीकी सेकनारो. ²⁶ जर सैतान सोतालुज विरोध केअरा लाग्यो आने तियामुज फुट पोडी ता तो टिकी नाय सकनारो आने तो पारवाय जानारो. ²⁷ खेरोंज केडालुज एगदा शक्तीवान माहा कोआमे विहीन चोरी नाय केअता आवनारी तिया कोआमे चोरी केअरा बेरी ता पेहला ती शक्तीवाला माहाल बांदा पोडी. ²⁸ आय तुमाहाल खेरोज आखुहु का, लोक केअताहा तिया केहेंडा बी पापाहा आने पोरमेहेरा निंदा बी माफी मिली. ²⁹ पेन जो केडोबी पवित्र आत्मा निंदा केअरी, तियाहाल किदीहीज माफी नाहा मिलनारी तो जोलामजुग्या पापाहा गुनालो वीअ जाहे. ³⁰ येशुय एहकी आख्यो काहाका ते एहेकी आखताह का येशुल पुत लाग्यो." ³¹ ताहा येशु याहकी मरीया आने तिया पावुहु तिही आले आने बारे उबी रिअन बिहीराल हादा मोकल्यो. ³² आने येशुआरी खुबुज लोक आथा तियाही तियाल आख्यो, "तो याहकी आने पावुहु बारे वाट जोवी रियेहे." ³³ मा याहकी आने मा पावुले केडे काय? एहकी तियाय तियाहान आख्यो. ³⁴ तिया आरी चारी चोमखी बोठला आथा तिया लोकाहान देखावीन आख्यो, “वेअरा मा याहकी आने मा पावु इ हाय.” ³⁵ काहाका जे मा पोरमेहेरा मरजीकी चालतेहे, तेंज माआ पावुह बोअही आने माअ याहकी हाय."