¹ फाचे येशु एका देवलाम गियो, तिही एक माहु आथो तिया एक आथ हुकाय गिहीलो आथो. ² शब्बाथा दिहा दिही येशु त्या माहाल हारो केहे का नाहा इ विन तियाप दोष लागवा केता तिया विरोधी लोक तियाव नजर थोवी रेहला. ³ त्या एका आथा हुकाला माहाल येशुय आख्यो “उठ आने इ माहा हुबूंर उबी रे.” ⁴ ताहा येशुय तियाहाल आख्यो शाब्बाथा दिहा दीही हारो काम केनु का माठो केनु, जिव वाचवुनु का जीव लेवनु यामने केल्लो काम हारो हाय ? पेन ते ठाकाज रिया. ⁵ तियाहा मोन खाराब होय इ विन येशु निराश वि गियो आने तियाय रोगीकी बाठ्ठान वेयो, आने त्या एका आथा हुकाला माहाल आख्यो, “ तो आथ लांबो के” तियाय आथ लांबो केयो आने तो हारो वि गियो. ⁶ ताहा परुशी पंथा लोक बारे जाईन तियाल (येशुल) आपु केहकी माय टाकुहु या बाबत चर्चा केरा हेरोदीयांही तिया विरुध्द टोलवाया. ⁷ येशु तिया चेलाहां आरी गालील फुगारावेल निंगी गियो, ताहा गालील हिवालामने खुबुज लोक तिया फाचाडीने जातला ⁸ येशु जो मोडा चमत्कार केतलो तो उनायन यहुदिया, यरुशलेम, इदोम आने यार्देन खाडी ति वेलने देश आने सोर आने सिदोन इयापाहल्या देशामने खुबुज लोक येशुय आला. ⁹ तिही खूबुज गोर्दी आथी तियाहा की येशूु चूुंदाय नाय जा जोजे तिया खातोर तियांय एक उडी तियार की थोवा, एहकी तिया चेलाहान आखी देदो, ¹⁰ काहाका तियाय खुबुज दुखी माहन हारे केले तियाहाल जे दुखी माहे आथे ति मे तियाल आथ लागवा केता बादे तिया उसे तुटी पोडा लाग्ये. ¹¹ ताहा पुथडो लागले माहे येशुल विन तिया हुंबुर एठा पोडीन मोडाकी बोंबलीन आखतोले “ तु देवा पोयरो हाय”. ¹² ताहा येशुय ती दुख्यान ताकीत दिन आख्यो “मा बोद्दल केडालुज नाहा आखाहा.” ¹³ फाचे येशु डोगावे चोडी गियो आने जे तियाल जोजतला तियांय हाद्या ते इशुही आला. ¹⁴ ताहा येशुय तिया आरी रा खातोर आने पोरमेहेरा हाऱ्या गोठ्या आखा मोकला केता बारा जुवान निवाड्या. ¹⁵ आने तियाहावे पुथडे काडनू अधिकार रा जोजे, ¹⁶ ताहा येशुय बारा जुवान निवड्या जो शिमोन या पेत्र इ नाव देदो. ¹⁷ जब्दी पोयरो याकोब आने याकोबा पावुहु योहान (इयाहान तियात बोअनेरगेस, इया अर्थ गाजनु पोयरा एहेकी नाव देदो.) ¹⁸ आंद्रिया, फिलीप्प, बर्थलमय, मत्तय, थोमा, अल्फी पोयरो याकोब, तद्य , शिमोन (जो कनानी आथो) ¹⁹ आने जियाय येशुल ति देदो तो यहुदा इस्कार्योत. ²⁰ आने फासे येशु को आलो, आने फासे ओता बाठ्ठा लोक टोलवाय गिया का तियाहान मांडो खा बी टेम नाहा मिल्यो. ²¹ येशु मुनको फीरी गियोहाे एहकी माही आखतेले तीया खातोर तिया कोमेने माहे तो उनायन तियाल तेरा खातोर निग्ये. ²² तेहकीज यरुशलेम शहरामने आल्ला शास्त्री लोक बी आखा लाग्या का तियाल काल्यापुथ लागलो हाय तिया खातोर (बालजबुल) तो काल्यापुथडा मदतीकी पुथडे काडेहे. ²³ ताहा येशुय तियाहान पाही हादीन आख्यो पुथडाल पुथडो केहकी काडी. ²⁴ जर एका राज्याम फुट पोडी गियी ता तों राज्य केहकी टिकी सके. ²⁵ एहकीज जर एका कोमे फुट पोडी ता ताे कोअ केहकी टीकी सेकनारो ? ²⁶ जर सैतान सोतालुज विरोध केरा लाग्यो आने तियामुज फुट पोडी ता तो टिकी नाय सकनारो आने तो पारवाय जानारो. ²⁷ खेरोंज केडालुज एगदा शक्तीवान माहा कोमे विहीन चोरी नाय केता आवनारी तिया कोमे चोरी केरा बेरी ता पेहला ती शक्तीवाला माहाल बांदा पोडी. ²⁸ आय तुमाहाल खेरोज आखुहु लोक केताहा तिया केहेंडा बी पापाहा आने पोरमेहेरा निंदा बी माफी मिली. ²⁹ पेन जो केडोबी पवित्र आत्मा निंदा केरी, तियाहाल किदीहीज माफी नाहा मिलनारी तो माही पापाहा गुनालो वी जाहे. ³⁰ येशुय एहकी आख्यो काहाका ते एहकी आखताह का येशुल पुथ लाग्यो ³¹ ताहा येशु याहकी मरीया आने तिया पावुहु तिही आले आने बारे उबी रिन बिहीराल हादा मोकल्यो. ³² आने येशूु आरी खुबुज लोक आथा तियाही तियाल आख्यो तो याहकी आने पावुहू बारे वाट जोवी रियेहे. ³³ मा याहकी आने मा पावुले केडे काय ? एहकी तियाय तियाहान आख्यो. ³⁴ तिया आरी चारी चोमखी बोठला आथा तिया लोकाहान देखावीन आख्यो, “वेरा मा याहकी आने मा पावु इ हाय.” ³⁵ काहाका जे मा पोरमेहेरा मारजीकी चालतेहे, तेंज माआ पावुहु आने बोअही आने माअ याहकी हाय.