¹ “ताहा येशु कफर्णहूम नगराम आलो आने तो कोआ आलो एहकी माहांन मालुम पोड्यो. ² ताहा ओअते माहे टोलवाये का, कोअमे जागो बी नाय आथो, ओतोहोज नाहा ता बाना बारे बी जागो नाय आथो, आने ताहा तो तियाहान देवा वचन आखतोलो. ³ फासे थेडेहेक माहे एका पुरा पांगला माहाल तियाहाय ली आले, ती पांगला माहाल चार माहि ऊसली ली आल्ले. ⁴ खुबुज गोरदी आथी तीयाहाल ती माहाल येशु जागे ली जाता आवतोलो नेय, ताहा तो पोंगाप चोडिन येशु जीही आथो तिहीने कोअवले फेडी टाकीन , खाटलामेने ती पांगला माहा खाटलो एठा उताव्यो. ⁵ येशु ति माहा विश्वास देख्यो आने आख्यो, “पोयरा तो पापा माफी वी गियी." ⁶ तीही नियमशास्त्र हिकवुनारा बोठला आथा ते तियाहा मोनाम एहकी विचार केअतला, ⁷ “इ माहु एहकी काहा गोगी रियोहो ? खोटों गोगेहे ! देवा शिवाय पापा माफी केडो दी सकतो?" ⁸ आने ते तियाहाला मोनाम एहकी विचार की रियहा ऐहकी येशुय आत्माद्वारे जाय काड्यो, आने तियाहान आख्यो “तुमा तुम्हा मोनाप एहकी काहा इतवुताहा? ⁹ तो पापाहा क्षमा वी गियीही, एहकी या पांगला माहाल आखनु सोपो हाय का, उठ आने तो खाटलो विसीन चालतो वेअ ऐहकी आखनु बेन्याहाम केल्लो सोपो हाय? ¹⁰ तियाहान होमजाया जोजे का, माहा पोयराल तोरतीप पापा क्षमा देवुलो अधिकार हाय तियाहाल तीयाय त्या पांगला माहाल एहकी आख्यो. ¹¹ माय आखु तुल “उठ तो खाटलो उसलीन कोअ जो.” ¹² आने तो तुरुतूज उठ्यो, आने होग्गा हुंबुर तिया खाटलो विसीन बारे निग्यो; आने ते बाद्दान नोवाय लाग्यो आने देवा गौरव केअते आखा लाग्ये “आम्हांय एहंडो कीदिहीज वेअयो नाहा.” ¹³ येशु फासे खाडी होवे गियो आने खुब माही तियाजागे आले आने तियाय तियाहान हाऱ्या गोठ्या आख्या, ¹⁴ फासे तो जाअ लाग्यो ताहा तियाल अल्फी पोयरो लेवी याल जकात नाकाप बोठलो वेअयो, आने येशुय लेवील आख्यो “मा फासला आव” आने लेवी उठीन येशु फासला गीयो. ¹⁵ फासे एहकी वेअयो का, येशु लेवी कोअ मांडो खा बोठो, तिही येशु आने शिष्य मांडो खातला ताहा तियाहा आरी खुबुज जकातदार आने पापी माही बी आथे काहाका ते खुब आथा आने तीया फासला आला आथा. ¹⁶ ताहा शास्त्री परुशी पंथा लोकाहाय ही विइन तिया चेलाहान आख्यो, “ओ पापी माहे आने कर वसूल केअनारा आरी केहकी मांडो खाहाये?" ¹⁷ इ उनायन येशुय तियाहान आख्यो ”हारा माहान डॉक्टरा गरज नाहा रेअती.ता जो दुखी माहु हाय तियालुज डॉक्टरा गरज रेअहे” आय ता धर्मी माहान नाहा ता पापी माहान तारा खातोर आलोहो." ¹⁸ जाहा योहाना चेला आने परुशी पंथा लोक उपास केअतुला ताहा थोडाहाक माहाय आवीन येशुल आखा लाग्ये “योहाना चेला आने परुशी पंथालोक उपास केअताहा पेन तो चेला काहा नाहा उपास केअता ? ¹⁹ येशुय तियाहान आख्यो “जावलुगु वोराड्या आरी वोवडो हाय तावलुगु ते केहेकी उपवास केअरी ? जावलुगु वोवडो तियाहा आरी हाय तावलुगु ते उपास केअनारा नाहा, ²⁰ पेन एहंडो दिही आवी जाहा वोवडो तियाहामने काडी लेवाम आवी ताहा ते उपास केअरी ²¹ केडोज बी नावा पोतडा ठींगलो जुना डोगलील लागवुते नाहा, जर केडो एहकी केअतो वेअरी ता नोवा पोतडा ठिंगलो जुना पोतडाल फाडी टाकनारो आने तो सिंडो मोडो वी जानारो. ²² "केडोज बी नोवो दाराक्षा रोहो जुनी चांबडा पिशवीम थोवतो नाहा, जर केडो एहकी केअतो वेअरी तां दाराक्षा रोहो ती पिशवील फाडी टाकी आने तो रोहो वेअराय जाय, आने पिशवी बी फाटी जाय. तियाहाल नोवो दाराक्षा रोहो नोवी चांबडा पिशवीमुज थेवतेहे". ²³ ताहा एहकी वेअयो का, येशु शब्बाथ दिही खेतामने जाहलो, ताहा तिया चेला कौंअहे मुडा लग्या. ²⁴ ताहा परुशी लोकाहाय तियाल आख्यो, "वेअरा शब्बाथ देहा दिही एहंडो काम केअनु नाहा, तो ए काम काहा केअताहा?" ²⁵ येशुय तियाहाल आख्यो, “तुम्हाहा शास्त्राम नाहा वाच्यो का, जाहा दावीद राजो आने तिया आरी आथे ती माहान पुख लागी तियाहान खा जोजतोला ताहा तियाहाय काय केअयाे? ²⁶ अब्याथार ओ माेडो माहायाजक आथो ताहा आने तो देवा मंदीराम केहेकी गीयो, आने देवाल चोडवुलो मांडो जो याजका शिवाय केडोज नाहा खाय सकतोलाे तो तियाय केहकी खादो, आने तिया हेंगात्याहान बी देदो इ तुमाहाय नाहा वाच्यो का?" ²⁷ आने येशुय आजी तियाहान आख्यो, “शाब्बाथ ओ माहाकेअता बोनाव्या, ता माहाल शब्बाथा केअता बोनवुलाम आलो नाय ?” ²⁸ या खतोर का (आय )माहा पोयरो शाब्बाथा बी मालीक हाय”.