¹ “ताहा येशु कफर्णहूम नगराम आलो आने तो को आलो एहकी माहांन मालुम पोड्यो.

² ताहा ओते माहे टोलवाये का कोमे जागो बी नाय आथो, ओतोहोज नाहा ता बाना बारे बी जागो नाय आथो, आने ताहा तो तियाहान देवा वचन आखतोलो. ³ फाचे थेडेहेक माहे एका पुरा पांगला माहाल तियाहाय ली आले, ती पांगला माहाल चार माहि ऊसली ली आल्ले,

⁴ खुबूज गोरदी आथी तीयाहाल ती माहाल येशु जाग ली जाता आवतोलो नेय, ताहा तो पोंगाप चोडिन येशु जीही आथो तिहीने कोवले फेडी टाकीन , खाटलामेन ती पांगला माहा खाटलो एठा उताव्यो. ⁵ येशु ति माहा विश्वास देख्यो आने आख्यो, “पोयरा तो पापा माफी वी गियी,” ⁶ तीही नियमशास्त्र हिकवुनारा बोठला आथा ते तियाहा मोनाम एहकी विचार केतला, ⁷ “इ माहू एहकी काहा गोगी रियोहो ? खोटों गोगेहे ! देवा शिवाय पापा माफी केडो दी सकतो ?,” ⁸ आने ते तियाहाला मोनाम एहकी विचार की रियहा ऐहकी येशुय आत्माद्वारे जाय काड्यो, आने तियाहान आख्यो “तुमा तुम्हा मोनाप एहकी काहा इतवुताहा ? ⁹ तो पापाहा क्षमा वी गियाीही, एहकी या पांगला माहाल आखनु सोपो हाय का, उठ आने तो खाटलो विसीन चालतो वे ऐहकी आखनु बेन्याहाम केल्लो सोपो हाय ?,” ¹⁰ तियाहान होमजाया जोजे का माहा पोयराल तोरतीप पापा क्षमा देवूलो अधिकार हाय तियाहाल तीयाय त्या पांगला माहाल एहकी आख्यो. ¹¹ माय आखु तुल “उठ तो खाटलो उसलीन को जो” ¹² आने तो तुरुतूज उठ्यो, आने बाठ्ठा हुंबूर तिया खाटलो विसीन बारे निग्यो ; आने ते बाद्दान नोवाय लाग्यो आने देवा गौरव केते आखा लाग्ये “आम्हांय एहंडो कीदिहीज तेयो नाहा.” ¹³ येशु फाचो खाडी होवे गियो आने खुब माही तियाजागे आले आने तियाय तियाहान हाऱ्या गोठ्या आख्या, ¹⁴ फाचे तो जा लाग्यो ताहा तियाल अल्फी पोयरो लेवी याल जकात नाकाप बोठलो वेयो, आने येशुय लेवील आख्यो “मा फाचला आव” आने लेवी उठीन येशु फाचला गीयो, ¹⁵ फाचो एहकी वेयो का येशु लेवी को मांडो खा बोठो, तिही येशु आने शिष्य मांडो खातला ताहा तियाहा आरि खुबूज जकातदार आने पापी माही बी आथे काहाका ते खुब आथा आने तीया फासला आला आथा. ¹⁶ ताहा शास्त्री परुशी पंथा लोकाहाय ही विइन तिया चेलाहान आख्यो “ओ पापी माहे आने कर वसूल केनारा आरी केहकी मांडो खाहाये ? ¹⁷ इ उनायन येशुय तियाहान आख्यो ”हारा माहान डॉक्टरा गरज नाहा रेती ता जो दुखी माहु हाय तियालुज डॉक्टरा गरज रेहे” आय ता धर्मी माहान नाह ता पापी माहान तारा खातोर आलोहो. ¹⁸ जाहा योहाना चेला आने परुशी पंथा लोक उपास केतुला ताहा थोडाहाक माहाय आवीन येशुल आखा लाग्ये “योहाना चेला आने परुशी पंथालोक उपास केताहा पेन तो चेला काहानाहा उपास केता ? ¹⁹ येशुय तियाहान आख्यो “जावलुगु वोराड्या आरि वोवडो हाय तावलुगु ते केहेकी उपवास केरी ? जावलुगु वोवडो तियाहा आरि हाय तावलुगु त उपास केनारा नाय, ²⁰ पेन एहंडो दिही आवी जाहा वोवडो तियाहामने काडी लेवाम आवि ताहा ते उपास केरी ²¹ केडोज बी नावा पोतडा ठीगलो जुना डोगलील लागवुते नाहा, जर केडो एहकी केतो वेरी ता नोवा पोतडा ठिगलो जुना पोतडाल फाडी टाकनारो आने तो सिंडो मोडो वी जानारो. ²² केडोज बी नोवो दाराक्षा रोहो जुनी चांबडा पिशवीम थोवतो नाहा, जर केडो एहकी केतो वेरी तां दाराक्षा रोहो ती पिशवील फाडी टाकी आने तो रोहो वेराय जाय, आने पिशवी बी फाटी जाय. तियाहाल नोवो दाराक्षा रोहो नोवी चांबडा पिशवीमुज थेवतेहे. ²³ ताहा एहकी वेयो का, येशु शब्बाथ दिही खेतामने जाहलो, ताहा तिया चेला कौंअहे मुडा लग्या. ²⁴ ताहा परुशी लोकाहाय तियाल आख्यो, "वेरा शब्बाथ देहा दिही एहंडो काम केअनु नाहा, तो ए काम काहा केताहा ? ²⁵ येशुय तियाहाल आख्यो, “तुम्हाहा शास्त्राम नाहा वाच्यो का जाहा दावीद राजो आने तिया आरि आथे ती माहान पुख लागी तियाहान खा जोजतोला ताहा तियाहाय काय केयाे ? ²⁶ अब्याथार ओ माेडो माहायाजक आथो ताहा आने तो देवा मंदीराम केहेकी गीयो , आने देवाल चोडवुलो मांडो जो याजका शिवाय केडोज नाहा खाय सकतोलाे तो तियाय केहकी खादो, आने तिया हेंगात्याहान बी देदो इ तुमाहाय नाहा वाच्यो का” ? ²⁷ आने येशुय आजी तियाहान आख्यो, “शाब्बाथ ओ माहाकेता बोनाव्या, ता माहाल शब्बाथा केता बोनवूलाम आलो नाय ?” ²⁸ या खतोर का (आय )माहा पोयरो शाब्बाथा बी मालीक हाय”