¹ फासे माहारीज ऐहेकी वेअयो, देवा गोठ्या अने देवा राज्या हाऱ्या गोठ्या तो गावा गावाम आने आखतो फिऱ्यो, ताहा बारा चेला तिईया आरी आथा. ² पुतडे दुष्ट आत्मा आने दुखामने मुक्त केअल्या थेयया तिईया आरी आथ्या. जेहेकी मग्दालीया नगरा मरीयामने सात पुतडे काडले हाये, ती, ³ हेरोदा कारभारी जो आथो तिया थेये योहान्ना तेहकीज सुसान्ना आने आजी बिहऱ्या थेया, तिया सेवा आपु सोता मालमत्ते की केअहतल्या ⁴ आने मोडो माहाहा टोलो एकजागे आलो आथो आने गावागावामने माहा तिईयापाही आले ताहा तियाई दाखला दिइन आख्यो. ⁵ “पोरनारो आपो दाणा पोरा निग्यो; आने तो पाेअतलो ताहा थोडा दाणा पागवाटीप पोड्या आने ते पागुअेठा अविन दाबाय गिये आने बादलामने चीडाही ते खाई लेदा. ⁶ आने बाकी दाणा खोडकाप पोड्या ते उग्यापेन कोमाय गिया, काहाकी तीही पिजालो जागो नाहा आथो. ⁷ आने बाकी दाणा काटावाला जागाम पोड्या आने काटावाला चाडाई तियाल मोडे नाहा वेअरा देदे तेद ते हारा रीअती मोडे नाहा वेअये. ⁸ आने बाकी दाणा हारा जागाम पोडयो ते हारा रिती मोडे वेअेये होवपटी पाव्यो” अेहेकी आखीन तो मोअडाकी गोग्यो, “जियाल उनाया कान हाय तियाई उनाया” ⁹ ताहा तिया चेलाये तियाल फुछयो, ई दाखला अर्थ काय हाय? ¹⁰ फासे तियाई आखयो, देवा राजाम दोबल्या गोठ्या तुम्हाल ओहखा खतोर दान देदलो हाय. पेन बाकी लोकांन ती दाखला की आखाली हाय, ईयाखातोर की तियाई देखता बी तियाई वेरा नाय जोजे आने तियाई उनाईन बी तियान होमजा नाय जोजे. ¹¹ आजी दाखलो ओ हाय दाणो ओ देवा वाचन हाय. ¹² आने जे वाटीपने हाय ते उनानारे हाय, पेन पासे सैतान आवे आने तियाई विश्वास तिईन तारण तिला नाय जोजे तिया खातोर तिईया मोनामने वचन काडी टाकेहे. ¹³ आने खोडकापने जे हाय, ते उनाते ताहा वचन आनंद की मोनाम लेतेहे, पेन तियान मुळे नाहा रेअतेहे; थोडाज टेईम लुगु विश्वास तेअते फासे परीक्षा आवे ताहा विश्वासामने बारे वी जातेहे. ¹⁴ आने काटाम पोडनारो दाणो ओ उनानारो हाय, पेन आगला जाईन चींता आने धन आने इया जीवनामने सुख इयाकि गुदमरून जातहा ई खतोर जाहके फोलवे नाहा देते. ¹⁵ पेन हारा तोरतीय पोडनारो दाणे हे अेहेडो हाय, ते वचन उनाईन ते हाऱ्या मोनाम पक्कओ तिईन थोवहे आने धीर तिईन फोलवे देहे. ¹⁶ आने केडो ‍दीवो लागवे ताहा बासनाकी बुजतो नाहा तियाय खाटला अेटा थोवतो नाहा ता आवनाआराल उजवाडो देखाया जोजे तिया खातोर उचे थोवतेहे. ¹⁷ काहाकी प्रोगोट वेअनारो हाय तो बुजलो नाहा हाय नेअता होमजाय नाय आने उगडो पोडी नाय एंहेडो दोबनारो नाहा. ¹⁸ तियाल तुमा काय उनाते तो हारकी होमजा, काहाका जीयापाही वेअेरी तियाल देवाम आवी आने जियापाही नाहा तियापाही जो हाय अेहेकी तियाल वाटेहे तोबी तियापाने काडाम आवी. ¹⁹ ताहा तिया याहकी आने पावु तिईयपाही आले खुप गोर्दी आथी तियाखातोर तिईयापाई तियान जाता आले नाहा ²⁰ ताहा केडाई तेबी तियाय आख्यो, तो याहकी आने पावु तुल मिला खातोर बारे उबी रिये हाय. ²¹ आने तियाई तियान आख्यो, देवा वचन उनानारे जे हाय तेज माआ पाऊ आने याहकी हाय. ²² आने त्या दिहाम अेहेकी वेअयो की, तो आपो चेलाआरी ‍उडिम बाेठ्यो आने आपु दोरया पार जाजी अेहेकी तियाई तियान आख्यो आने उडी चालवा लागे. ²³ फासी उड्यो चालवा लागे ताहा येशु हुवी गियो. ताहा दोऱ्याम वादुलो आलो उड्याम पाय विहा लाग्यो आने ते संकटाम पोडी गिया. ²⁴ ताहा ते येशु पाही आला तियाल उठवा लाग्या गुरुजी, आपु बुडा लाग्या ताहा तियाई निंदीमने उठीन वाराल आने पायाल धोमकाव्यो; फासी तो ठाको विअन गोयो. ²⁵ ताहा तियाई तियान आख्यो, तुमाहा विश्वास किही हाय? ते बी गीया आने ठाकाज रिइन एकबिहिराल आखा लाग्या, ओ केअेडो हाय? वाराल आने पायाल बीआज्ञा केअहे ते बी तिया गोठ्या मानतेहे. ²⁶ ताहा ते गालील दोऱ्या हुमुंर गरसेकरा प्रदेश तिही गिया ²⁷ ताहा तो तोरतीवे उत्यो, तिही गावाम केअडोएक माऊहु तियाल मिल्यो; तियाल पक्के पुतुडे लागलो आथे तियाई खुप दिहीयाकी पोतडे पोवले नाय आथे आने तो कोआमे नाहा रेअतलो तो माहणाम रेअतलो. ²⁸ ताहा येशुल विअन तो खुप बोबल्यो तिया आगला पोडीन मोडांकी बोबल्यो, येशु देवा पोयरा, तो मा काय संबध? मायु तुल पागे पोडु, माल त्रास दोहो नाहा. ²⁹ काहाकी तो तिया दुष्ट आत्माल त्या माहामने निगीजा आज्ञा केअतुलो आथो; काहाका तियाई तियाल खुप दा तेअलो आथो; माहा तियाल हाकलीकी आने बेडीकी बांधी थोवतला तेबी तो ताेडीन पुतुडाकी खेताम जातो रेअतलो. ³⁰ आने येशु ही तियाल पुसयो, तो नाव काय हाय? तियाई तियाल आख्यो सैन्य, काहाकी तियाम खुप पुतडे पोराले आथे. ³¹ आने आमाल आगीकुडाम जा आज्ञा नाहा केअेवो, अेहेकी ते पुतडे तियाल विनंती केअतले ³² ताहा तिही खुपज डुकरा टोलो चोरतुले आने तियाम पोराया तु आमाला आज्ञा दे अेहेकी तियाई विनंती केअेई ताहा तियान आज्ञा देदी. ³³ ताहा ते पुतडे त्या माहामने निंगीन डुकराम विही गिये आने तो टोलो दोवडुतो आवीन दोऱ्याम पोडी गियो आने डुकरे मोअय गियो. ³⁴ पासी चारवाले ई विईन नाही पाेड्या आने तियाई जी गोठ वेई ती गावाम आने खेताम जाईन आखी. ³⁵ ताहा जी गाेंठ वेअई ती वेअरा माहे बारे येशुपाही आला, ज्या माहामने पुतडे निगलो आथे तो माआहु पोतडे पोवलो शुध्दीप आथो आने येशु पागापाई बोठलो तियाई वेअयो; आने ते बी गीये. ³⁶ फासी जिमाही ती गोठ वेअली आथी तियाई तो पुतडो लागलो केहेकी हारो वेअयो ती गोठ तियाल आखी. ³⁷ ताहा गरसेकरा आहीपाही होग्गा माहाही तियाल विनंती केअेई तु आमाहिने दुर जातो रेअ काहाका ते लोक खुप बी गिअला आथा फासे तो उडीम बोहीन तिईने फसाला आलो. ³⁸ आने जो माआहुमने पुतडे निगलो आथे तो, माल तुमाआरी राअ द्या, अेहेकी येशुपाही विनंती केअतलो, पेन तो तिईयाल सोडीदीइन आख्यो, ³⁹ "तु कोआ जो आने देवाई तो खातोर केअेहेडे मोडे कामे केअले हाय ते आख." फासे तो जाईन येशुई तिईयाखातोर केहेडे मोडे कामे केअले आथे. त्या गोठ्या गावाम जाईन तिईयाई आख्या. ⁴⁰ फासे येशु फिरी आलो ताहा माहाय तीया खुशीकी स्विकर केअये, काहाका ते होग्गे माआहु वाट वेअतले. ⁴¹ ताहा वेअरा, याईर नावा केअडो एक माआहु आलो; तो ते सभास्थाना मोडो अधिकारी आथो; आने तियाई येशु पागे पाेडीन, तु माआ कोआ आव, ऐहेकी तियाल विनंती केअेई. ⁴² काहाका तियाल बारा बोराहा एकुज पोयरी आथी आने ती मोअरा आथी. फासी तो जाअतुलो ताहा टोलो आवीन तिईया आगला पासला गोर्दी केअतला. ⁴³ आने बारा वोरेओ रोगोत निगुलो आथो अेहेडी केडीएक थेय, जी (आपो होग्गा पोयसा टोक्का वैद्यांवर खर्च की टाकयु ) केअडाईनबी हुदरूई नाहा. ⁴⁴ तिईयोई तिईया पासला आवीन तिईया पाेतडाल आथ लागव्याे आने तोतामुज तिईयो रोगोत निगुलो पारवाई गिईयो. ⁴⁵ ताहा येशुही आख्यो, माल केअेडाई आथ लागव्यो? ताहा होग्गे नाग्हा आखतलो पेत्र आने जे तिईया आरी आथे ते तिईयाल आखा लागे, गुरुजी टोलो खुब हाय तो तुमाल चिपली रेईयो. ⁴⁶ ताहा येशुही आख्यो केअडाई माल आथ लागव्याे काहाका मआमने शक्ती निंगी ही माल हाेमजायो. ⁴⁷ फासी ती थेय आपोल दोबाय नाव ई विअईन, थुर थुर कापती आली आने तिईया आगला उपडु पोडीन माआयु काहा तुला आथ लागव्यो आने तुरुत आय केहेकी हारी विइ गिई, ई होग्गा लोकाहा तिईयोई आख्यो. ⁴⁸ ताहा तियाई तिईल आख्यो, पोयरी, तो विश्ववासाही तुल तारी लेदो. शांती की जो. ⁴⁹ तो आजी गोगतलोज तोतामुअज सभास्थाना अधिकाऱ्याहीने केडो एक आलो आने तियाई आख्यो, तो पोयरी मोअय गिई गुरुजील आजी तारास नाहा द्यो. ⁵⁰ पेन येशुय उनाईन तियान उत्तर देदो, बीया नाहा, विश्वास तेरा, ती हारी वी जायई. ⁵¹ फासी कोअमे पेत्र आने योहान आने याकोब आले ताहा पोयरी बाहको आने याहकी तियाशिवाय केडालुज माजमे आवा देदे नाहा. ⁵² आने तियो खातोर रोडतलो आने शोक केअतुलो, पेन तियाई आख्यो, रोडोमाआ काहाका ती मोअई नाहा, ती निदीम हाय. ⁵³ तेबी ती मोअय गिई हाय ई जाईन ते तियाप ओहा लागे. ⁵⁴ पेन तियाई तियो आथ तिया आथाम लिइन तियोल हाद किइन आख्यो, पोयरी, ऊठ. ⁵⁵ ताहा तियो आत्मो फासी आलो ती ताहाज उठी गिई फासी तिईल खा द्या अेहेकी तियान आज्ञा देदी. ⁵⁶ आने तियो याहकी बाहकाे चौकाय गिये पेन ज्या गोठ्या वेयो ते केडाल आखा नाहा अेहेकी तियाई ताकीद दिइन आख्यो.