¹ ताहा तियाई बारा शिष्याल हादीन होग्गान होग्गा पुतडाल आने रोगे हारे केअराआ सामर्थ आने अधिकार देदो ² आने तियाई तियान देवा राजु संदेश आखा खातोर आने रोग हारे केअेरा मोकले. ³ तियाई तियान आख्यो, "वाटीम जा खातोर काई बी ल्या नाहा; लाकडी आने पिशवी आने मांडो आने पौयसा ल्या नाहा आने बेन-बेन पोतडा जोड ल्या नाहा. ⁴ आने केलाबी कोओमे तुमाहा जा, तिईज ऱ्या आने तिहीने निगी जा. ⁵ जितेहे तुम्हान अंगिकार नाहा केअते तोताहा विरुध्द तुमाहा साक्षी वेअेरा जोजे तियाल तुमाहा नगरामने निगती वेले तुमाहा पागा उदलो झोटकीन निगा" ⁶ ताहा ते निगे होग्गा ठिकाणे देवा हाऱ्या गोठ्या आखता आने रोग हारा केअेते गावा गावाम फिरी गिया. ⁷ ज्या गोठ्या वेअतुल्या त्या उनाईन हेरोद राजो खुप घोटालाम पोडी गियो, काहाका “योहान मोअलाअमने उठलो हाय” अेहेकी खुप माहा आखतले; ⁸ आने खुप लोक आाखतले, “ऐलीयो प्रकट विईयो” आने बिहीरे आखतले “जुना संदेष्टामने केअेडोएक उठ्याे” ⁹ ताहा हेरोदाई आख्यो, योहाना मुनको आय वाडी टाअकेहे, पेन जिईया गोठ्या आय उनाय रिईयो हाय ओ केअेडो हाय?" आने तो तिईयान मीला वेअेयतलो. ¹⁰ फासी प्रेषिताई फिरी आविन ज्या गोठ्या वेअेल्या त्या पुऱ्या आख्या. ताहा तियाई तियान आरी लिईन बेथसौदा नावा गावाम एकवेले लीइ गेईओ. ¹¹ पेन त्या गोठील माहाये उनाईन ते तिईयाफासला गिये. ताहा तिईया तो स्वागत कीईन तो तिईयान देवा राज्या गोठ्या आखा लाग्यो आने जिईया हारो वेअनु गरज आथी तियान तियाई हारे केअेये. ¹² दिही पारवातो आलो, ताहा बारा प्रेषित आविन तियाल आखा लाग्या, "महाहान वाटे लागवा दे, काहाका ते आहीपाही गावाम आने खेताम जाईन रिई आने खावनु सोय केअेरी; काहाका आपु जोंगलाम हाय. ¹³ पेन तिईयाई तियान आख्यो, “तुमाहा तियान खावनु द्या. तियाई आख्यो, "आमाही जाईन ई माहा वाटो खावुनु काय बी नाहा लीइ आला, पेन आमाहा पाही पाच मांडा आने बेन मासल्या हाय बिहीरो कायबी नाहा” ¹⁴ काहाका ते पाच हजार पुरूष आथा. ताहा तिईयाई चेलाहान आख्यो, "पाचास पाचास लोका टोल्या किईन तियान बोहावा. ” ¹⁵ फासे तिईयाई जेहेकी आख्यो तेहेकी होग्गान बोहावे. ¹⁶ तिईयाई पाच मांडा आने बेन मासल्या लिईन उच्चे होरगा होवे विईन आर्शिवाद देदो. आने तिईया तुकडा किईन माहा टोलान द्या खातोर चेलाल आख्यो. ¹⁷ ताहा हाेग्गा माहा मांडो की ताराई गिईया; आने तिईयाई रिअई गिईला मांडा तुकडाकी बारा सिबल्या पोराई गिईया. ¹⁸ आने अेहेकी विईओ तो अेखलो प्रार्थना केअतलो ताहा तिईया चेलो तिईया आरी आथा, ताहा तिईयाई तियान पुसीन आख्यो, टोलामने माहा माल केडो हाय आखताहा? ¹⁹ पासे तिईयाई उत्तर दिइन आख्यो, "बाप्तिस्मा केअेनारो योहान, पेन कोअताक लोक आखताहा ‘ऐलियो,' आने कोअताक आखताहा जुना संदेष्टामने केअडोएक फासो उठ्यो." . ²⁰ तियाई तियान आख्यो, पेन तुमाहा मान केअेडो आखताहा? ताहा पेत्राई तिईयाल उत्तर दिईन आख्यो, “देवाहा ख्रिस्त.” ²¹ पेन ई गोठ केअेडाल आखा नाहा अेहेकी तिईयाई तियान आज्ञा देदी. ²² आने आख्यो, “माआहा पाेयराई खुपज दु:ख वेठी आने वडील लोक आने मुख्य याजक आने नियमशास्त्रा मास्तुऱ्या ईयाहाय येशुल नकार केअेरी आने मायटाकाम आवी. आने तिसरे दिही फसो उठावाम आवी ई विईनु खुब जरुर हाय. ²³ आने तिईयाई होग्गान आख्यो, “केडाल माआपासअला आवनु इच्छा वेअेरी तिईयाई आपु बधंस्तभ उचलीन माआ फासला चाला." ²⁴ काहाका जो केडो आपो जिव वाचावा होदेहे तो तियाल गोमावी दि, पेन जो केडो मा केअेता आपो जीव गोमावी तो तियाल वाचावी. ²⁵ काहाका माआहाई होग्गो जुग मिलवीन आपो जिव गोमाव्यो आने आपो नाशा किई लेदो ते काय हारो विई? ²⁶ जो कोडो बी माआ आने माआ वोचना लाज तेअरी, तिईयाकेअता लाज जाहा माआहा पोयरो तिईया बाहका आरी आने पवित्र दुताआहा गौरवाकी आवी ताहा तेअरी. ²⁷ आने आय तुमाल खेऱ्यो आखु, ईयामने ईही उबे रेअनारे अेहेडी बी हाय, ते देवा राज वेअरा शिवाय तियान मोअतु नाय आवी?" ²⁸ आने ई गोठ्या आखल्या फासला आठ दिहाकी अेहेकी वेयो की, पेत्र आने योहान आने याकोब ईयान लिईन तो प्रार्थना केअेरा डोगाप गीयो. ²⁹ तो प्रार्थना केअतलो ताहा तिईया मुया रूप बोदली गियो आने तिया पोतडे पांढे चोमकुनारे वी गिये. ³⁰ आने ताहा, बेन माआहे तिईयाआरी गोठया केअतले; ते मोशे आने एलीया आथे, ³¹ ते तेजस्वी देखातला आने ज्या गोठ्या तो येरूशलेम देशाम केअनारो आथो, त्या गोठ्या ते गोगतला. ³² ताहा पेत्र आने तिईयाआरी जे आथे ते निंदकी पोराय गिईला आथे, पेन ते पुरा उठी गिईया ताहा तिईयाई तिईयअ तेज आने बेन माआहे तिईयाआरी उबे आथे तियान वेअेये. ³³ ताहा अेहेकी वेअेयो की तियाईने दुर वेअतला ताहा पेत्राल येशुही आख्यो.“ "गुरुजी, इही रेअवनु ओेतो हारो हाय; ताहा आमा तीन माडवा पाडु तोओखातोर एक आने मोशेखातोर एक आने एलीया खातोर एक” आपो काय गोगीरिईया तियान होमजुतलो नाय. ³⁴ तो ई गोठ्या केअतलो ताहा एक बादलो अविन तिईया उच्चे सावाली केअरा लाग्यो आने ताहा ते वादलाम वीही गिईया ताहा ते बी गिईया. ³⁵ आने वाआदलामने आवाज आलो, तियाईआख्यो “ओ माआ निवुडलो पोयराे हाय, ईया तुमाआ उनाया” ³⁶ ई वाणी वेअेइ ताहा येशु अेखलोज देखायो आने ठाकाज रिया आने ज्या गोठ्या तिईयाई विअेयो तियामने केडालुज त्या दिहाम आख्याे नाहा. ³⁷ आने केहेकी विईयो का बिहीरा दिही ते डोगापने अेठा उत्या ताहा मोडो टोलो तियान मिला आलो. ³⁸ ताहा वेअरा, टोलामने एका माआहाई मोडाकी बाेबलीन आखा लाग्यो, गुरुजी, माआयु तुल पागे पाेडु, माआ पोयराल वेअरा, काहाका तो मा एकुज पोयरो हाय. ³⁹ आने वेअरा, केडो पुतडो तियाल तिईलेहे आने ओ बोबलेहे, ताहा ईयाल तो अेहेकी मोअडी देहे तिया मुयामने फेवदयो आवी जाय, तो ईयाल खुप त्रारास देखाडे आने खुप टेमाई ताहा सोडीन निगी जाय. ⁴⁰ आने तियामने तो काडाम आवा जोजे तियाल आय तो चेलाही विनंती केअई, पेन तियाईकी नाहा निग्यो. ⁴¹ ताहा येशुही उत्तर दिईन आख्यो, ओ अविश्‍वास्य आने विपरीत पिढी, माई तुमाहा आरी कोअतेलुगु रेअवु आने कोतोक तुमाल हमजावु ? तु तो पाेयराल इही लीइ आव. ⁴² ताहा तो पाही आवा लाग्यो तोतामुज पुतडाही तियाल अेठा पाडीटाके आने खुब मोअडी टाक्यो, पेन येशुही त्या अशुध्द आत्माला धोमकाव्यो आने त्या पोयराल हारो किईन तिईया बाहकापाही मोकल्यो. ⁴³ ताहा देवाही ई माहान सामर्थ्य विईन होग्गा माहा चकीत वी गिईया आने तो जी कामे केअेतलो त्या होग्गा गोठीप होग्गे माहे नोवाय केअेतलो तो तिईयाई आपो शिष्यान आख्यो, ⁴⁴ ई गोठ्या तुमाहा हाऱ्या इतवी थोवा काहाका माआहा पोयराल माआहा आथाम देवाम आवी. ⁴⁵ पेन ही गोगनु तिईयान होमज्यो नाहा आने तिईयान होमजाया नाय जोजे तियाल तिईयाईने गुप्त थोवाम आल्या; आने ते ई गोठील पुसा बीतला. ⁴⁶ पासे आपो मेने केअेडो मोडो हाय इयाललिइन तियाम वादविवाद आलो. ⁴⁷ ताहा येशुही तिईया मोनामेने गोठ्या जाईन एका हानापोयराल पाही हादीन उबे केअेयो, ⁴⁸ आने तियाई आख्यो, जो केअेडो माआ नावा की ई बालकाल स्विकारी तो माल मानिलीइ, आने जो केअेडो माआल मानिलीई तो जीईयाई माल मोकल्यो तिईयाल मानिलीई; काहाका तुमाहा होग्गामने जो होग्गाईने हानाे हाय तोज मोडो हाय. ⁴⁹ ताहा योहानाही आख्यो, "हे गुरुजी, आमाही केअेडो ऐकाल तो नावाकी पुतडे काडता देख्यो, आने आमाही तिईयाल तेहेकी केअेरा नाहा आख्यो काहाका तो आमाआरी तो फासला नाहा चालतो. ⁵⁰ ताहा येशुही तियान आख्यो, "तिईयाल मना नाहा केअेरा, काहाका जो तुमाहा प्रतिकुल नाय तो तुमाहा अनुकुल हाय.' येशु यरुशलेम शहरां जाअ खातोर निंगी गीयो; ⁵¹ आने अेहेकी वेअयो तियाल उच्चे लिई जावनु टेम पाही आलो ताहा यरुशलेम गावाम जा खातोर तिईयाई आपो जावनु मोन किईन आपो मुय वोलव्यओ. ⁵² ताहा तिईयाई आपो आगला निरोप मोखल्यो, ताहा ते गिगींन तिईया खातोर तियारी केअरा खातोर शोमरोना एक गावाम गिईया, ⁵³ पेन तिईयान माने नाहा, काहाका यरुशलेम गावाही जावनु तियान बंदी आथी. ⁵⁴ ताहा तिईया चेला याकोब आने योहान ई वेईन तियाल आखा लाग्या, "हे गुरुजी, ऐलीयाई केअेयो तेहेकी बादलामने आग पाडीन इया नाश केयेरा तु आम्हाल आज्ञा केअे, अेहेकी तो मोन हाय का?' ⁵⁵ पेन तिईयाई वोलीन तियान धोमकावीन आख्यो, "तुमाहा केल्ला आत्मा हाय तुमान मालुम नाहा का'; ⁵⁶ काहाका माआहा पोयरो माहाआ जिवनु नाश केअेरा नाहा, ते तियाल ताराआ आलो हाय.” हाती ते बिहीरा गावम गिये. ⁵⁷ आने ते वाटीपने चालतले ताहा केअडोएक तियाल आखा लाग्यो, “जीही बी तु जाहो तिही तो पासला आय आवेहे.” ⁵⁸ ताहा येशुही तिईयाल आख्यो, “ खोकडांस बिळे आने वादलामेले विडाल कोरू हाय, पेन ताआहा माहा पोयराल मुनको थोवा केअता जागो नाहा.” ⁵⁹ ताहा तिईयाई बिहीरा एकाल आख्यो, “माआ पासला आव, “पेन तियाई आख्यो, “हे गुरुजी, पेअेले माल जा देये आने माआ बाहकाल बुजा दे,” ⁶⁰ ताहा येशुई तियाल आख्यो, मोअलाल आपो मोअलान बुजा दे, पेन जाईन देवा राजुखातोर घोषणा केअे. ⁶¹ ताहा आजी एक जा आखा लाग्यो, हे गुरुजी, माआयु तो फासला आवेहे, पेन पेअेलो माल माआ कोआमेऱ्यान मिलीन आवा द्ये. ⁶² पेन येशुही तियान आख्यो, जो केअेडो आवुताल आथ लागविन फासली गोठीही वेअतो रेअहे अेहेडो केअेडोज देवा राजु केअेता उपयोगी नाहा.