¹ जाहा येशु लोकाहान तिया होग्गा गोठ्या आखी पारवायों ताहा तो कपार्णहुम आलो. ² ताहा एका अधिकाऱ्या मोयालो आवत्यो दु:ख की मोय जानारो आथो ³ तीइ अधिकाऱ्याय येसु बोद्दल गोठ्या उनायन यहुदी महाहा डायाहान आख्यो तुमा जायन रावांया कीइन तियाल आखजा ताहा, तो आविन मा आवत्याल वाचविली, ⁴ ताहा ते येशु ही आविन रावांया कीइन आखा लाग्या, तु तिया जिव वाचावी ले, काहाका तो अधिकारी माहु खुब हारो हाय. ⁵ काहाका तो आमा देशअवे प्रीती केअहे आने तिया आमनेहेन भक्ती केरा देवाकोआ बी बांदी देदो हो. ⁶ ताहा येशु तियाहा आरी चाली गियो आने ति अधिकाऱ्या माहा पोंगो जागेज रेहलो ताहा ति अधिकाऱ्याय तिया हेंगात्याल येशु ही मोकलीन आख्यो, ओ प्रभु, वोहखो केअेहो नाहा, तु मा कोआ आवो ओतिही मा लायकी नाहा. ⁷ माय तोही आवा बी लायक नाहा तु तो मुयाहाकीज बी आखी देहो ते बी मा आवत्यो हारो वी जाय. ⁸ काहाका माय बी बिहिरा अधिकाऱ्या आथानिसे काम किहु मा आथानिसे बी बिहारा काम केअताहा; आने माय तियाहान आव एहेकी आखुहु ताहा तो आवेहे आने बिहिराल जो आखुहु, तो जअहे मा दासालअ आखुहु, इ काम केअे आने तो ते काम केअे. ⁹ जाहा येशु इ उनायो ताहा तियाल खुबुज नोवाय लाग्यो, ताहा तिया फाचला फाचला खुबुज माहा टोलो आवतोलो येशुय तियाहाल वेयो आने आख्यो, ओडो मोडो विश्वास मायु इस्त्राएलाम बी नाहा वेअयो ¹⁰ आने जे मोकलुला आथा, ती कोअ फिरी आला ताहा तो सेवक हारो वी गियोहो एहेकी तियाहा नजरिम आलो. ¹¹ आने बीहीरअ दिही फाची एहेकी वीअयो का, तो नाईन नावा गावामने जाहलो ताहा शिष्य आने खुब माहा टोलो बी तिया आरी जाहलो. ¹² जेहेकी तो गावा हिंवा जागे आलो केल्ला तेबी मोअला मुर्दाल बारे ली आवतले, तो मोअलो मुर्दो तिया याहकी एखलोज पोयरो आथो.आने ति बाय विधवा आथी; आने गावामने खुबुज माहे तियु आरी आथे. ¹³ आने ति विधवा बाईल विइन प्रभुल तियीपे खुब दया आली आने तियील आख्यो “रोडोहो नाहा” ¹⁴ आने जागे जायने तियाय तिरडील आथल्यो, “ताहा जे माहे खांदा देनारे आथे ते ठाकेज जागाप उबे री गिये आने तियाय आख्यो, पोयरा, माय तुल आखुहु, उठ! ¹⁵ आने तोंओ माेअलो उठीन बोठो आने गोगा लाग्यो; पेन येशुय तियाल तिया याहकील होप्यो. ¹⁶ ताहा बांदाहान खुब बिख लागी आने तियाही देवा गौरव केअता आख्यों, "आमाहिमे मोडो भविष्यवादी प्रकट वेयोहो, आने देवाय आपु लोकाहा भेट लेदीही". ¹⁷ येशु बाबतीम हि बातमी आख्या यहुदीया प्रांताम आने जागऱ्या परिसोराम फेहेलाय गियी . ¹⁸ ताहा योहान शिष्याही इ होग्गो योहानाल जायन आख्यों, ¹⁹ ताहा योहानाय तिया बेन चेलाहान तियाही फुचा मोकल्यो आने जो आवनाराे तो तुज हाय का आमा बिहीरा वाट जोवजी? ²⁰ जाहा ते माअहे तियाही आले, आने तियाही आख्यो बाप्तीस्मो केअनारा योहानाय आमाहान तोही इ फुचा मोकल्योहो का, जो आवनारो तो तुज हाय का आमा आजी बिहीरा वाट जोवजी? ²¹ त्याज टेईमाप येशुय खुब माअहा रोग, आजार, दु:खे हारे केअये, खुब माअहामेने पुतडे काड्ये, आंधलान देखते केअये. ²² आने येशुय तियाहान आख्यो, “जा आने जो तुमाही वेयो आने उनाये तो योहानाल जायन आखा, आंधले वेअतेहे, लगडे चालते हे, कोडलो रोग हारे वेतेहे, बेरे उनातेहे, मोअले माही जीवितो केअेराम आवतेहे आने गरीब लोक सुर्वाता उनातेहे ²³ आने जो केडो बी मा बाबतीम ठोकरातो नाहा तो धान्य". ²⁴ हाती योहानाय तिया लोकाहान मोकलुला ते चालु पोड्या ताहा येशु योहान बाबतीम लोकाहान आखा लाग्यो, "तुमा डोगाहाम काय वेरा गेहेला? वाराकी आलेहे तो पातडो का? ²⁵ आजी तुमा काय वेरा बारे गिहीला? हाराम हारे पोतडे पोवले माहाल का? वेरा, खुब तेज रंगा पोतडे पोविन मज्या केअनारे माहे राजवाडाम रेतेहे ²⁶ अजी काय वेरा बाहिर गिहीला ? एगदा संदेष्टाअ वेरा का? बिहीरो मोडो हाय,आय तुमाहान आखुहु, संदेष्टासे बी जो मोडो हाय तियाल. ²⁷ वेअरा, आय मा निरोप्यो तो आगाडी मोकलुहु; तो आगाडी वाट्या हुदरावी; तो इही हाय जिया बोद्दल नियम शास्त्राम लेखलो हाय ²⁸ आय तुम्हाल आखुहु जे बायीही की जोल्मुला हाय तियाहाम बाप्तीस्मा देनारो केडोज मोडो नाहा, पेन जो केडो पोरमेहेरा राज्याम होग्गाहा से हानो हाय, तो तियासे बी मोडो हाय ." ²⁹ इ उनाएन बांदा लोकाहाय आने कर पट्टी वसुल केनाराय बी योहान आथुकी बाप्तीस्मो लिइन परमेहेराल खेरो मानी लेदो. ³⁰ पेन परूशी आने शास्‍त्री माहा हाय योहाना आथाकी बाप्तीस्मो नाहा लेदो आने परमेहेरा गोठ्या नाय मान्या. ³¹ परमेहाराय आखे, "आय इ पिढीमाहाल केहेडा होस आखु इ केहेडे हाय? ³² जे पोयरे बाजाराम बोहीन इया तियाल हातके अताहा तिया होस ते हाय, आमहाय तुमा खातोर गीते आख्ये तेबी तुमा नाच्या नाहा, आमा दु:खा गीते आख्यो तेबी तुमा रोड्या नाहा एहेकी ते आखताहा. ³³ काहाका बाप्तिस्मा केअनारो योहान मांडो नाहा खाता आने दाराक्षारोहो नाहा पिता आलोहो तेबी तुमा आखतहा का, याल पुत लाग्योहो ³⁴ माअहा पोयरो (आय) खातो पितो आल्लो हाय आने तुमा आखताहा देखा ओ खादाड आने पिदाड माअहु हाय, कर पट्टी उगरावनाराहा आने पापी लोकाहा हेंगात्यो हाय. ³⁵ पेन ओक्कल आपु होगा पोयरोहा से खेराम खेरी ठरवाय गेहेली हाय". ³⁶ फासे एका परुशी माहाय येशुइल मा कोअ मांडो खा चाल एहकी राअव्हा किइन आख्यो. ताहा तो तिया आरी कोअमे जायन मांडो खा बोठो ³⁷ आने वेरा, येशु तिया परूशी माअहा कोअहे मांडो खां बोठोहो इ जाआयन तिया गावामेने एक पापी बाय गुंदालो तेल लिइन आली. ³⁸ ताहा ती बाय तिया फाचला पागाही उबी रिइन तियु आहवाकी परमेहेरा पाग पिजवीन तीयु मुनंका चोथ्याहा की पाग पुसीन पागाहान खुब गुहु दिइन पागाहान तो गुंदालो तेल लागवुतली. ³⁹ इ विईन परुशी मांहु जियाय येशुल मांडो खा खातोर हादलो, तो तिया मोनाम विचार केरा लाग्यो, "जर ओ भविष्यवक्तो रेअतो ता जाय लेअतो जी तियाल आथलेहे ती केहेंडी आने केल्ली बाय हाय, तियाले ती पापी हाय, ते तियाल मालुम वेअरी ". ⁴⁰ ताहा येशुय तियाल आख्यो, "शिमोना मान तुल एक गोठ आखुनु हाय," तियाय आख्यो, "गुरूजी आख." ⁴¹ येशुय आख्यो, 'एका सावकारापणे बेन जाअवाही कर्ज लेदलो आथो; एकाय पाच होव चांदी रुप्या आने बिहीराय पन्नास चांदी रुप्या लेदलो . ⁴² तिया बेन्याहावे बी कर्ज सुटा केअता काविहींज नाय आथो तियाहा खातोर तियाय तियाहा कर्जो माफ की देदो. आमी तुल काय लागेहे ती बेन्याहामेने केडो तियावे वाद प्रीती केअरी?" ⁴³ ताहा शिमोने आख्यो, “मान एहेकी लागेंहे, जिया वाद कर्जो माफ की देवाम आलो तो. ”ताहा येशुय तियाल आख्यो, “तुयुय खुब हारो विचार केअयो." ⁴⁴ ताहा यीसुय बायीवेल फिरी विइन शिमोनाल आख्यो, “तुयुय इयो बायोल देखी का? आय तो कोअ आलो ताहा तुयु मान पाग तोवा केअता पाय नाहा देदो; पेन इ बायीय तियु आहवाकी मा पाग पिजव्या आने तियु चोटयाहाकी मा पाग पुस्या. ⁴⁵ तुयु मान गुहु देदो नाहा, पेन इ बाइय मा पागाहान गुहु देवुल सोड्यो नाहा. ⁴⁶ तुयु मा मुनकाल तेल लागव्यो नाहा, पेन इ बाईय पागाहान गुंदालो तेल लागव्यो, ⁴⁷ आय तुल आखहु “इयो खुब पापे आथे माफ वी गीये; काहाका इयोय खुब प्रीती केअयीही; पेन जीया थोडाहाज पाप माफी वेअयीही तो वायज प्रीती केअनारो” ⁴⁸ ताहा येशुय तियुल आख्यो, “बाई तो पापाहा माफी वी गीयीही." ⁴⁹ ताहा तीया आरी मांडो खा बोअहानारा तियाय तियाहा गोठ्या केरा लाग्या, “पापाहा बी माफी देनारे ओ केडो हाय? ⁵⁰ ताहा तीयाय ती बाईल आख्यो, “तो विश्वासाकी तु वाचाय गियीही शांती की जो."